從前到80T，望見1:24 汽車模型，都會被其精細做工吸引，但望一望個售價，告訴自己還是多來80T 望算了，不要發夢買一台回家，何況都無位擺！
不過認真望下架1:24，其實都無想象中咁精細，賣千幾蚊還覺得物有所值，但加價加到去二千幾蚊就會覺得失望！所以點好都唔夠1:1 咁好，因為1:1 就連車箱的凳都係細個坐開，充滿感情。不過架1:24 唔係我的，轉手前一日點都要拎出黎欣賞欣賞。1:150 拎過、1:76 拎過、1:1 坐過，係1:24 未拎過，未拎過的朋友可以想象一下自己係超人，拎起成架雙層巴士^^"。
1:24 巴士 vs 1:76 hiace。巴士係馬路上已經大大架，模型都大大架真係好有氣勢，不過我就玩唔起咁貴的模型，屋企都無位擺，但今次全世界共只生產180架，非常珍貴，網上的炒價亦倍數上升... 作為賣模型的山禾模型公司亦帶頭加價，加到去一萬二千八百蚊，真係好心佢啦，做壞晒D規矩，本編非常討厭呢D 行為！
前軸轉向功能太正了，成架模型即刻變成栩栩如生的真車！不過轉向幅度就得果少少地...
1:24 巴士 vs 1:76 hiace，同為BC的出品。
縮圖黎睇個內籠，好有真車感覺！一台模型有實物感覺係好緊要，唔通而家buzes 的S3BL 都叫得做模型咩？
下層及上層
天花的光管怪怪地，不過未見過呢款車，未能判斷。
車門大開~
司機位，可以見倒車速計的刻度！好正，但可惜的係司機位呢個窗無做到開關，變左梗窗...
熱狗巴士用的長凳，凳上的銀色鐵扶手已經成為不能忘記的特點。不過真車的凳在扶手位應該較倚背直立，因此模型的凳有少少扣分。
入油位~
吉拿引擎???
當年呼籲市民巴士超載犯法的訊息廣告：超載屬違例 乘客請合作。前排還有網民不滿山禾炒高模型價，改為：超貴屬違例 三婆請合作！三婆、山禾是某模型店的近音。而家交通營辦商年年加價，交通票價實在太高，巴士公司大可考慮整番個廣告：超貴太無良 港鐵請合作！
唔影番近期少入作總結，都唔自覺原來近月入車係咁瘋狂！但都以追舊車為主，早排追番bc 的富豪奧林匹克，近日又追番carz 的丹尼士禿鷹同jumpwell 的N364 及312 亞比安、BL...
一直覺得 bc 的貨車類模型出得唔錯，就算自己對貨車無特別好感，都會被模型吸引要買番部。
風機3N... 幾年前官方出3N 果陣，覺得個模同312 的3N 實在相差太遠，聽聞個模係舊模改出黎，所以始終買不下來，就算一套彩虹色係幾咁壯觀都唯有無視！但就正如當習慣月的亮再也看不見渺小的星光，基本上所有官方巨龍都無可能同312 的巨龍有得揮，咁係咪姐係永遠都唔洗買？直到bc 呢個模改出風機及某些不明原因變為非官方出品，仲要出89C，先捨得科水買一部，點知陸續有黎... 而家仲要追番之前出左的風機1A...
而當年官方出開龍果陣，一睇已經覺得個模同312 的S3N 實在相差太遠，但假設你接受到Buzes 的S3BL 玩具模的話，開龍、密龍、禿鷹呢D 相信無理由接受唔倒，但買新城模型又無乜優惠，所以一直未入。點知等咁耐都係無其他靚價途徑入手，還是要到80T...
另外ATENU 出果時完全無購買意慾，但而家出的都變晒精細版，售價更貴，所以自覺普通版更加珍貴，反正自己又無E50D，買一部絕不過份吧！不過可惜谷模...
黎緊有一款幾有感情的車會出：AD... 日前見倒幅圖真係要講粗口！我寧願你用番ADS的數據加長變番11米，都好過搵本身已經唔多像真的密龍改... 實物未出現還可以安慰自己是影相角度求其導致效果欠佳！但又無法說服自己其實個模假設做得好，理應任何角度都無問題... 失望！
一直以來，我都認為一個星期得星期日一日紅假係太少，唔知係咪同人唔願郁的本性有關。5月過了一個連踩的月份，連日朝九晚九、六及日朝九晚六甚至朝七晚八都試過，除左無左坐坦克蘭的時間之外，夜晚番到屋企食完飯已經好夜，玩OMSI 的熱情也減少左。黎緊更加大挑戰，連日朝七晚二三！減左交通時間、沖涼時間，幸好每日應該都有四小時可以訓覺的... 對於一些需要放假休息的人民來說，是超大挑戰！不過即管試下，我非常落意接受呢個挑戰！反正對上一次咁FULL TIME 已經係當年頻密做老臨的時期，要夜晚開工，日間番學，生活都好正架！凌晨利蘭奧林比安出旺角再搭小巴，個天仲係黑的，番到屋企已經天光，第二朝? 又要番... 黎緊成個月都無假放，所以將會減少貼文(反正其實寫完無人睇，志在自己生活上有點紀錄同埋一個不錯的照片分享平台)。
bc 最近推出的1:76 貨車類模型起初話賣75，臨出之前又改左做83...。不過對上一次因差佬車、火粥車賣98，票價曾有同樣比例上調，故與是次$83相比，票價將會有所"下調"！乘客請留意，切勿多付車資，不設找續！
新票價(短途$3.7；長途$5.2)：
是次票價"下調"約為15%，是自2014年11月以來的第一次，也是連續8次上調以來的第一次，可見市面物價上升驚人！另外非常不滿港鐵將於下月全面加價4.3%，根據票價自動加減機制，屆時Wmb "需要"按相同幅度上調票價！
寫此文時有唔少事想分享，但過程中好多都唔記得左，無謂辛苦諗番起。文尾分享一段自己錄的Need For Speed 9 遊戲片段，首歌係錄game 時背後 youtube 播的，估唔到唱完果陣咁岩衝線！每次睇都好有賽車鬥志...
