不過有時D野邪就係邪永遠有錢要你洗, 好似早幾個月少左買巴模想話追番堆1:400 聯合航空、美國航空舊色飛機同埋dw 幾年前出既1:400 NASA space shuttle, 到最近買少左飛機諗住省錢但點知就有好多想買既巴模出左黎包括carz ADS、ATENUfacelift、Toy1 315、buzes LF、LM、P&T XF/DMS、bc 1:24 XF/DMS......, 到而家捱過左1:24 既衝擊準備回氣減少買巴模既時候, 就竟然揾倒超人高斯大膠及超人力斯細膠仲有本書展都無既超人寫真集... 呢度粗略估計又會令Wmb營運資金蒸發過千港元! 八月又係Wmb資金調動月份, Wmb的營運資金將再蒸發達一萬港元... 更不敢提車隊更新帶來的沉重負擔... 睇黎我八月宗旨都係四個字:積極OT。
由十幾年前Wmb 靠自己真金白銀買第一架巴模(第一架獻左俾buzes)至今車廠有超過二百五十架汽車、接近一百架飛機, 如果將以上所有模型以原價套現估計可為Wmb 增購兩部ADS... 突然覺得咁多年既功績都唔係白費既 :o
話有意栽花花不開無心插柳柳成蔭其實講緊兩方面, 第一當然係本來無打算玩1:24 事關一黎售價太貴二黎土地供應不足屋企無位展示三黎其實DMS 唔係自己最喜愛既車型(出勝利二型既話打家劫舍都要搶一部), 但錯有錯著幫左人買最後無心插柳自己要左、第二就係一向有意栽花既1:76 buzes 利蘭十一米新模大失所望, 夢想中既完美利蘭十一米車隊破滅, 反而一向都被自己忽略既BC 1:24 DMS 今日望番竟然被霸氣既體積所吸引, 人生第一架1:24 模型就咁就獻左俾best choose!
先扯開少少話題，post 番兩年前幫人買既呢部1:24 KMB DMS，係交付主人之前小心翼翼咁拎過出黎欣賞。呢部係2015年4月 best choose(bc)出既九巴1:24 DMS(限量180部), 果時係覺得1:24 唔值得買... 的確仔細度、功能上係勝過好多1:76、1:43，但其實如果論精細，都仲有好多位可以再改善... 例如司機位個窗開唔倒、無做上層潛望鏡、上層電鐘、車胎像真度不足等等。不過我對上層車頭的推拉式窗戶比較有親切感，因為自己坐開既熱狗都係呢隻窗，無論晴天雨天都總有人會打開呢個窗，晴天時風迎面吹來；雨天時就看透世態每種風雨披身打我面，雞翼窗版本就只有少數例如開龍、老虎豪！
超載屬違例 乘客請合作，呢句口號係以前針對巴士超載而刊登在巴士車身的一個廣告，最記得係岩岩出呢部模型個陣, 某炒店(山和模型)乘機加價炒賣, 短時間內加價近一倍, 有人因而在社交網站把口號改成加價屬違例 三婆請合作! 真係笑死人!
如果可以出倒1:24坦克蘭, 我擔心日夜都對住部車，飯都唔洗食... 對於著迷的物件我可以不停望住佢，望住架車時間好快過! 先唔好話1:24 個DMS模係咪2005年既水準, 就算2017年起新模出我諗有d 野都一樣, 現成1:24 最大問題係唔會同你每個角落都執到真既一樣咁仔細, 例如車殼內面既窗框無同你油番黑邊同銀邊, 但無可能自己拆車上番色, 因為結構複雜, 要"真既一樣"唯有好似1:24 Routemaster 自砌版先可以係裝拼過程中每個位置執到靚一靚, 因為一黎架車係自己砌自然對成品有一份執著, 二黎有時間心機去加工(彌補模具本身不足之處)而不會像外面生產商為趕工而出現QC問題, 始終專心裝一部同交功課裝二百部係有分別...
兩年拎過呢架1:24 DMS上手, 但當時覺得太大部, 又唔係超級精細(可能睇慣1:1)加上我又唔係珍寶迷, 買咁大架DMS 擺係度有點多此一舉, 所以無乜意欲入手但今次中巴反而覺得愛不惜手, 顯然我係鐘意中巴多D^^" 旁人常奇怪地說我每日都搭九巴出入, 竟然對中巴既車較感興趣? 就連1:1 都想髹中巴色, 呢樣真係解釋唔倒! 就係喜歡呢個簡單而有智慧既配搭~
以前自己資訊科技落後, 所接觸的媒體不多, 要睇或者買巴士模型多數要去80T, 其實多數只係齋睇唔敢買事關當年(2001-2002年右)一部1:76 巴士索價高達298... 真係那有錢! 最記得N年前(應該2008年前?)沙田新城市仲有80T果時, 每次去到佢門口都總會望下佢show 出黎嗰堆1:24, 有英國Routemaster、London DMS、城巴DMS、中巴DMS, 嗰時見到1:24 車身上既骨位每粒釘都有凸起, 入面每張凳都有凳腳同扶手, 俾我印象係好真實, 2006年前既1:76 巴模普遍水準係比較差, 只有少數車係令人心動例如dw 平治O305、bc LV、祖比倫、LF、BR 等。而bc 十一米豪、dw 都城呢D模具較為精確既車都仲未面世, 更沒有出現近兩三年才在1:76 市場上佔越來越多既精細版, 所以係仿真度呢方面有強烈對比之下1:24 係非常之震撼! 之不過正如前面所講多數只係齋睇唔敢買, 2005年一部1:24 九巴DMS為例售價高達1398! 可能因為1:24 太大部同埋太貴關係, 不太受歡迎, 到而家都無乜出新型號, 來來去去都以DMS居多...
珍寶巴士簡介(網上資料) : 香港的中巴及九巴於1970年代大量引入載客量大的丹拿/利蘭Fleetline新巴士, 中巴是香港首間率先大量引進丹拿珍寶的巴士公司, 曾於1974年宣傳Fleetline巴士時與空中女王「珍寶」波音747飛機作比喻，比喻Fleetline 為巴士界中的珍寶。
"倫敦珍寶"是指英國倫敦運輸局公司於1970年至1978年間引進的30呎長丹拿/利蘭珍寶巴士，統稱為DMS。它們是倫敦運輸局於1965年引入後置引擎巴士試驗後大量引入的型號。倫敦珍寶共2646輛, 均是按倫敦運輸局的規格建造，例如機械配搭依照倫敦運輸局的一套規格、車身委託Park Royal及都城嘉慕威曼建造。其中大部分巴士採用一人控制模式。
倫敦運輸局引入DMS 原意是以一人控制巴士以減低成本同時更新車隊, 不過巴士在倫敦的表現不獲好評，包括營運效益及方便程度不及設有售票員的巴士，而為了符合倫敦運輸局的規格，動力組合要作出修改來配合，例如選用全自動波箱跟原本丹拿的設計有出入，雖然令巴士滿足了倫敦運輸局的買車要求，卻令性能表現不太可靠，壞車率偏高，一人控制巴士在倫敦市中心反而令行車時間增加, 故此DMS普遍不太受歡迎。結果自1979年起，倫敦運輸局便開始把旗下的倫敦珍寶出售，其中多輛巴士透過Ensignbus公司轉售至倫敦以外及海外的巴士公司。
踏入八十年代初, 中巴、九巴在1950至1960年代投入服務的半駕駛艙巴士已屆退役之齡而且為數不少，同時適逢香港地鐵通車，巴士公司為面對車源緊張及地鐵的正面競爭，也從代理商Ensignbus引進倫敦DMS巴士。除了中巴、九巴外，DMS亦得到當時新成立的雅高巴士及業務剛起步的城巴垂青，因此曾一度有370輛DMS巴士被引進香港, 分別為中巴207輛、九巴100輛、城巴33輛、雅高30輛。另4輛DMS在1990年代中由必達巴士運往香港改成開頂巴士，但可惜未能領牌，最後被強行拆毀。
中巴是香港最早引進DMS的公司，也是數量最多的。原本中巴引入倫敦寶的目的是要行走接駁地鐵站的M線，但由於倫敦寶在香港的表現良好，因此中巴再加碼訂購，並將之派往港島北岸主幹線服務，亦因其靈活性高，更一度成為南區赤柱路線6、6A、61、63、64、65、66的主力車款。中巴合共訂購208輛DMS，但其中1部在卸下葵涌貨櫃碼頭時發生嚴重意外導致車身幾乎全毀，所以最後有206部客車及一輛訓練車, 於1980年至1984年間投入服務。而為了節省零件儲存空間及維修成本，中巴在選購DMS時，指定選擇使用Gardner 6LXB引擎及Park Royal車身的DMS，不過當時有不少Park Royal車身DMS是配用利蘭引擎的，於是Ensignbus按照中巴要求先把配有Park Royal車身但使用利蘭引擎的DMS改配Gardner 6LXB引擎再付運香港。當時吉拿方面無法提供足夠引擎供替換，以致有6輛售予中巴的DMS(XF65-69、T19)到港初期仍使用Leyland O.680引擎，後來於1984年至1985年才改用Gardner 6LXB引擎。
其中XF34在付運香港前，被Ensignbus用作示範車，為此Ensignbus對XF34的改裝也比同期的XF多，包括全面採用Percy Lane的全幅式推拉車窗、將四塊閘式的前閘後半部移走及換上傍板、把尾軸上的橫向座位改為背對背形式。Ensignbus在完成改裝及髹上中巴色彩後，代表Ensignbus出席1980年的英國商用車展及同年的Cobham London Bus Rally，隨後在1980年7月交付中巴。
DMS 最大特色是車頭的路線牌箱，倫敦運輸局參考Routemaster設計，把DMS的牌箱設計成途經地點、路線號碼、目的地點的3格窗牌箱模式。中巴在XF投入服務初期，牌箱上原本的途經地點窗用來顯示目的地，原有的長形目的地窗則被廢除。不過在運作一段時間後中巴發現此牌箱設計對日常營運引致不便。原本該途經地點牌箱在倫敦運作時因不需要時常變動，所以倫敦運輸局把它的搞手柄設在上層牌箱內，但當中巴把它改變為目的地牌箱後，司機每次抵達總站後須在上層打開牌箱蓋轉換目的地。中巴為解決問題，在1982年開始研究改裝牌箱的可行性。中巴以XF115作試驗，把整套牌箱降低至下層擋風玻璃之上，再在車外加設搞手柄, 但司機依然要離開駕駛席才可進行搞牌動作，成效未如理想，而且改裝工程複雜，於是再另行作研究! 在此之前有數輛XF依XF115的設計把牌箱改裝，而XF135在不改變牌箱外型下，曾試驗性被按裝一套很複雜的搞牌系統。後來中巴想出把XF原來的號碼牌箱移向中間及恢復使用長形目的地牌箱，形狀像"反T型"，再設計一套槓桿搞牌系統，成效十分理想，故中巴決定在1983年起以"反T型"為藍本分批改裝其餘未改裝牌箱的XF，此後XF擁有有別於中巴一般左邊目的地右邊路線編號的牌箱! 但個別XF 在前期作試驗性改裝的例如XF135、XF152及XF176等則維持早期改裝模樣直至退役。
自中巴首輛DMS(XF1)於1980年2月投入服務後，除了牌箱外，XF的車身在中巴悠長的服役期內也作出不少改動。早期的XF與在倫敦服務時分別不大，車廂設施幾乎沒有任何改變，座位依舊使用原裝的絲絨面，車頭上層仍維持使用雞翼窗，下層仍是原裝的弧型擋風玻璃，而客窗是在原有的英式半格窗下加裝推拉式車窗，使外型成一個「田」字。在行走一段時間後，絲絨座位與非空調車廂的配搭並不太適合熱帶地區、其次是那些由Ensignbus改裝的「田字窗」在行車時發出噪音及在雨天時出現漏水問題、而車頭上下層原裝車窗的設計在炎熱天氣下令車廂環境焗促。針對以上問題中巴在1981至1991年間作出了一系列改善工程。
1.所有絲絨座位被改為中巴珍寶標準的深藍色人造皮面
2.把「田字」窗改為由YOUNG或Percy Lane出品的全幅式推拉車窗(於1991年11月或以前退役的XF沒有被改裝)
3.將下層車頭的弧型擋風玻璃更換及拉直，並加設兩隻左下右上的雞翼窗
4.在上層車頭的雞翼窗損壞時，以全幅式推拉車窗取代(有不少XF在退役時上層仍使用雞翼窗)
5.另外所有XF在引擎室上左右兩邊原本設有裝飾旁板，但全部在1984年之前被拆除
除了以上的改善工程外，206輛中巴XF客車的車廂外觀跟在倫敦服役時分別不大，依然是灰色與白色的配搭，有些甚至還留下倫敦運輸局的車廂告示。唯獨是XF118因曾發生火警，在修復時車廂防火板改用中巴標準的淺藍色，同時在車頂加設電鐘帶。
中巴首兩輛退役的XF是在1986年1月22日除牌。由於受到輿論及股東壓力，於1988年12月至1992年夏季期間，中巴加速淘汰載客量少於100人及不設風油軚的雙層巴士，所以在1987年12月至1991年6月期間有一定數量的XF退役! 另外於1993年及1995年因中巴先後失去28條及14條路線引致車隊過剩，大量XF、LF及LX 被集體除牌，除了其中8輛在1994年經商人運往中國大連行走外，其餘均在香港拆毀。最後一輛退役的XF是XF196(DD5273)在1997年3月底退役，而訓練巴士(T19、T20/XF154、T21/XF192)則於1998年中巴專營權結束而退役並被拆毀, 總括而言DMS在中巴服役的時間平均超過10年，比它們在倫敦行走的時間還要長。
Best Choose
2005年剛推出的一部1:24 DMS售價應該不多於1498(一部1:76 售298), 2017年一部1:24 DMS 的建議售價已經達2800(一部1:76 售460)!! 1:24 個售價真係升得好過份(當然我係用discount 價買，絕對唔會用2800買！^^), 以前堆1:24 出左一段時間先至賣得晒, 但而家係出之前唔訂分分鐘無貨派! 多得D炒家炒店囉, 上次部九巴DMS 某些店不停加價, 由二千幾隔幾日就加到五千幾, 間接咪搞到D 售價高左然後係下一次有新車出嗰時反映出黎囉, 俾著我係生產商架車本來賣二千幾當我二千俾貨你, 轉個頭你炒到五六千, 予其俾你賺不如我定貴D 個價自己賺左先啦... 你估一部模型個售價加幅真係如實反映咁高成本咩, 炒價就真... 最後受害既又係良心買家, 姐係我!! 本來今次1:24 我係無心插柳的情況下入手, 但眼見出左之後搶得咁西利, 某炒店上星期已加價接近二千, 自己手頭上呢部你話如何叫人不愛不惜手?!
熱烈歡迎1:24 中巴倫敦珍寶加入Wmb Transport Department!! 現在Wmb Transport Department 管理既車隊日益龐大, 類似1:24 呢種大比例模型既紙盒都無位擺, 所以已經同高達套裝紙盒一樣 : 存倉為安。
我個人覺得bc 既車雖然唔稱得上做得好好但算係幾有心做車, 例如1:24 大比例巴模、1:76 貨車類如果唔係bc 做既話相信至今都無其他生產商做。亦都想提一提近兩年為左賣貴幾十蚊而氾濫的精細版, 係03年bc已經做過先軀, 不過程度上未至於精細, 03/04/05 年出過的1:76 LV、BR、N、BL座位都改良過, 有做到熱狗座位上的扶手及有前軸轉向功能, 座位唔似一般巴模一件膠過而係一張張痴上去, 在此之前CSM出既廣告巨龍座位都一張張痴上去及有前軸轉向功能(可惜CSM巨龍係錯模因為3+2做晒2+2, 而2+2車尾就做晒3+2的凸牌箱...)。而當時N、BL一部賣288; LV、BR一部賣268, 根本無乘機加價, 或者果時炒風無而家咁勁! 其實有好有唔好, 好的係座位改良過, 唔好既係人手痴容易歪 / 打風, 對生產商黎講工序多左, 成本增加, 之後出果D 巴模又變番座位地板一體化及無前軸轉向, 最多油番一劃銀色扮熱狗座位上的扶手... 基於03年有生產商做過先軀, 而家賣果D巴模憑乜460呢?! 唔係Toy1 幾年前推到D車上398, NS、80T幕後製造售罄假象我諗而家D巴模唔會加價加得咁快...
講番1:24中巴DMS, 無聊又計一計中巴1:24 DMS 總共出過幾多? 睇番record原來今次XF173係第四次出, 第一部係標準色XF139/CX908, 2005年10月推出, 限量398部、第二部係標準色XF187/CE6365, 2005年12月推出, 限量288部、第三部係有藍白廣告XF24/CE6826, 2009年1月推出, 限量150部、今次呢部第四部係標準色XF173/DA1349, 2017年7月20日推出, 限量200部。Total 1036部, 可以見倒標準色係越出越少! 以中巴1:24 DMS出左4次黎講下次仲會唔會再出真係唔敢講, 中巴兩款牌箱 / 下層頭窗版本都出過, 除非佢會做埋上層頭窗全幅式推拉版本同埋田字版本姐... 但覺得bc肯出田字版本的機會非常低! 所以未入過1:24 DMS既我今次絕對有藉口入手!
XF173/DA1349, 原英國倫敦運輸局時編號為DM1193, 車牌KUC193P, 1975年服役。運抵香港後於1983年9月投入服務, 約於1996年退役!
感覺上今次既証書做得好hea，睇番以前出九巴果張証書係好靚... 我覺得我自己design 一張証書仲更加精美！
係個發泡膠盒入面拎架1:24 出黎係少D 力水都唔得，又唔可以大力壓窗口位，真係拎倒架車出黎自己已經成身汗！當我寫呢個post 時侯不停search 番過往1:24 DMS 模型既資料, 無意中又俾我搵番Sun Star 以前出過既1:24 London routemaster 模型既圖, 大大話話原來出過十幾款! 上年出果部大約千五/六蚊, 又想入一部添, 相比bc 1:24 DMS 算抵玩, 但呢個故事教訓唔好亂開新line!!!
令人失望既係司機位個窗由始至終都無改過, 開唔倒之餘銀框係就咁印上去, 唔夠立體感, 呢個部份真係做得幾差... 1:43 果架SH1334都做倒啦... bc 會唔會hea左d... 如果出田字窗係咪姐係變晒梗窗或者值得諗下應該用咩結構做倒開關呢? 如果個窗做到完全平滑咁出冷氣巴好過...for example ADS、AVBWS... 唔少人都有相同疑問就係1:24 巴模係咪只會出短車? 有無可能出11米or 12米三軸車? 而家只有DMS同MC 兩款, 如果有長車選擇, 我諗我會轉玩1:24... 我個人覺得係生產商唔願開發多於技術上做唔倒, 因為長車多一個軸、at least多4個窗、上下左右多至少八張凳, 必定有理由話成本高唔做, 作為買家自然覺得而家定價二千八一部車模, 應該要有12米既size, 一架1:24 田螺車可以做到幾百蚊有交易喎, 如果下次再出1:24 短車又係2005年質素仲加價的話可能唔買了! 有時真係唔係話洗10蚊想有100蚊質素而係D野有心做買家係見倒, 好似carz AD,3AD 咁無心做咪人地對你無晒寄望囉, 買家唔係提款機亦都唔係儍既!!!
發覺XF173/DA1349車身有少少特別, 根據中華巴士紀念館照片所示此車司機位對落群腳底部是微微向上斜, 但模型照做一般DMS 既水平群腳形狀, 未知XF173 是否曾發生意外而維修後與其他DMS 不同?? 正因為以前既車會時常更換組件, 所以相片見倒同模型有出入又唔可以一口咬定模型做錯...
XF173(左)車尾的車牌位是否曾經改過？因為模型做既車牌黃色底色係填滿成個框，但相入面就唔係，另外有唔少倫敦寶個車牌係同模型做既一樣，未知XF173 是否後來更改過車牌部份？
另外因為未近距離接觸過倫敦寶，究竟車尾車牌個框係咪同老虎頭一樣係有塊鏡？模型就咁油上去既...
6 中環來往赤柱。1993年中巴失去了28條線專營權，其中一條是6號，城巴隨即改為全空調巴士！DMS 巴士亦因而要面臨退役，雖然無搭過中巴6號，但搭過城巴6號，而家係中環做野但已經無中巴，感到時代變遷得太快，可惜中巴於2015年連最後一條線都停辦，對於中巴，時常想如果中巴專營權玩多十年就好，港運城條免費線玩多十年就好...
打開雞翼窗，可惜上層唔做埋開關，美中不足...
車尾太平開窗戶打開
不過下層車尾個窗無做到窗框，真車照計應該係有黑色窗框，如果唔係點塞塊玻璃係度？
上層內部，如果整埋個反射鏡就似！
下層內部
50mm 影內籠唔夠wide，但Nikon 18-200 無微距，根本對焦唔倒車箱內部... 反而Sigma 50-500 最近對焦點可以對倒車箱內部的遠處... 呢D 情況都係要用番DC仔先影倒... 都唔明D 鏡頭點解賣咁貴仲要限制多多既... 咩都影唔倒，憑乜賣咁貴呀！
車門及窗戶打開
上車門只有前閘可打開
引擎蓋打開
中巴在選購DMS時是指定選擇使用吉拿Gardner 6LXB引擎及Park Royal車身
真係好想bc 會出其他短身雙層巴士，e.g. M、BL、G、N、DM... 但出唔倒九巴官方我覺得係可惜之處，主力中巴既話又出唔倒D乜... 勝利二型又唔可以係出面開引擎蓋，但如果bc 肯出既話都一定大把人買！蓋可以照做開關，開唔開係買家自己決定...！
橡膠車胎，都係用番05年既料無改過，睇番其他1:24 貨車，人地D 車胎做到真既一樣，所以我都訂左十幾個1:24 車胎打算換左DMS 呢幾個舊胎佢...
呢個設於地下的空位好正，夠坐一個人^^！放行李一流！做貨倉亦可以派上用場！
唉，土地供應有限，1:24 唔可以好似1:76咁易擺長鏡位影，不過點都要用200mm(等效300mm)長鏡影番幾張標準相先~
中巴隻色真係好正，雖然DMS 唔係自己最愛，但成部中巴拎上手感覺係好興奮！
門位，當然要車門打開
梯位
以前D人話要分辨珍寶係睇車層引擎上面個凹位，呢個係珍寶的特色！以前D車就係有與眾不同的吸引之處，而家新車幾乎架架一樣...
藍色車軸有點兒玩具感覺^^
倫敦寶約長9.6米，落車門位於中間，樓梯位於比落車門更後的位置，這樣有效將乘客引導到車箱中間位置，善用後面的企位空間。
但細心留意，上層車頭牌箱組件上面做少左條打橫既扶手！反而1:76 DMS 粗粗地都叫做有做喎...
車門的扶手比例準確，始終1:24 係好過1:43、1:76，細比例的模型扶手感覺好粗！
上層左邊12排座位，熱狗凳的感覺完全做倒出黎!!
座位凳腳比例精確
梯位扶手。睇番中巴DMS的相，上層梯位的扶手上面真係無電鐘，原來係一個圓形掣裝係梯位附近的車頂，上層乘客落車反正要落樓梯，順便按鐘，所以唔會構成不便！
50mm(等效75mm)下的上層車箱
50mm(等效75mm)下的下層車箱，如果整埋個反射鏡就正！另外個電鐘好正！
時間關系，唔每個細位續一影了... 同埋搞牌搞到手痛... 問番有買過往1:24 DMS的師兄，之前果D搞牌好順暢，唔知搞乜呢部咁難搞，影影下腳架又爛鬼埋，激氣！唉有機會先再影另外果幾條線啦... 另外今次買1:24 DMS發覺QC係幾差... 去到店我都睇左4架先落倒手，好多都係上色有問題，但咁大架車好難慢慢睇囉，仲有呢部係無做行車証既，所以上網睇番DMS 的相，本來想自己加番行車証上去，但睇相有部份DMS 見唔倒個位置，不過XF173 行車証係角落頭，遲下先加番。1:24 MC 有做行車証個架，但可能05年出DMS果時無做，而家翻出又無加番(但售價就係咁加)，所以... 完美主義者，玩1:1 啦... 事實上1:1 都未必有行車証... 有機會退役果時俾人拆左...
睇完上面分享, 其實綜合模型體積、仿真度、售價等幾方面, 個人覺得1:43 係最適合收藏的! 1:24 可以話太大又唔係百分百像真, 但亦無乜可能會做到去1:18 scale, 一來1:18太大唔適合一般玩家同埋鐵車實在太重(假設一架真巴士長9.6米,1:24 之下長40cm; 1:18 則長53cm,體積相差好大), 二來今時今日一架1:24 巴士都賣2800 咁貴咁1:18巴士分分鐘三四千, 真係 那 有 錢 你 _ _! 所以其實1:24 已經係可以引入屋企的極限sacle, 勸免各位唔好太沉迷1:24 車模, 追求完美既都係玩1:1 啦... 一架1:1 係勝過所有1:76, 1:43, 1:24, 1:18...
下次又會玩下Wmb "1:24"模型！！！
BC 1:24巴模有既功能，Wmb "1:24"巴模一樣有，而且更多！又真係好好玩！
