再見了 最闊的2+1座 | ADS龍仔

今次講下3+2 座位的巴士，因為今個星期所有使用3+2 座位的九巴都已經退役，可以話係3+2 時代正式結束了... 真係估唔到九巴會為3+2 座位巴士最後一天載客而搞歡送...

九巴的3+2 座位設計到冷氣巴士才開始有獨立的座位，因為熱狗車箱的都是長凳形式並沒有清楚畫分座位闊度。然而因為三座位通常只座二人，而二座位有時只坐一人，所以又被人稱為最闊的2+1座^^

一直以來，香港地少人多，繁忙的人類經濟活動使香港成為全世界雙層巴士密度最高的城市！為了應付每日龐大的載客量，舊式巴士車箱的設計及演變足見是用盡車箱空間去增加座位以滿足載客需求。然而路面及失當的政策並唔容許更闊的巴士行駛，因此車箱安排3+2 的座式是多麼的偉大！十幾年前，多數使用樓下條83K 出入，坐倒3+2 座係相當高興，因為果陣坐倒的3+2 座多數係康豪，較2+2座位的 TD 102KF 冷氣富豪力水來得強勁很多！但再早期少少自己有個錯覺以為3+2 巴士車身是闊一點才容納到三座位的存在，雖然知道三座位的座位較2+2 座位的窄少少，但也認為是座位窄了一點之餘車身又闊了些少。當了解到其實車身並無因為安裝三座位而闊了一個座位的尺寸時，偶然搭中3+2 座位的時候，又會聽倒年紀比自己細好多的小朋友又說：這部車有一邊三個位、一邊還是二個位，部車一定是闊了^^ 平時搭開的2+2座位車身一定是較窄。

最後一批3+2座的九巴車隊編號為ADS，不過平時影得唔多，同埋之前以為日日搭29M 果陣有影過內籠，點知呢2日不停搵番個folder，原來一張都無... 反而富豪車就有少少咁啦... 真係唔到退役都唔察覺珍貴...！

無疑闊度不足50cm的座位卻不是人人受落... 對我黎講當然無問題，熱狗時期都一樣係咁坐~ 減肥的朋友如果坐倒掂D 座位，就証明減肥有效了。

冷氣富豪的3+2 座位：(聰明的你，一定會知道呢架係ET1852，但與康豪一樣，所以無所謂啦)

 以一台12米大康豪計，用3+2 座位比較2+2 座位，上層一般可多載11人；不過下層因為座位較多，企位較少，全車的載客量與水塘豪相約。

冷氣利蘭的3+2座位：

全車採用灰色座倚，以冰冷的形象示人，與熱狗的暖色系有強烈對比，可以想象當時幾咁強調冷氣呢個特徵。

冷氣巨龍的3+2座位：

下層車箱以左右各2個座位的安排，而家新車亦沿用這個安排，以九巴黎講無頭枕的座位較窄，所以車頭同車尾兩排座各裝了6 張凳( 頭枕座較闊，為5張凳)。

唔同車款的座位即使大家都是3+2 設計，也有左右不同之分，有些樓梯以前左2右3，樓梯以後左3右2、有些則從頭到尾都是左2右3！而細心留意左右兩邊座位與前排座位的距離也有少少不同！呢個分別小弟都係前2年有人指出巴士模型的左右兩邊座位距離唔平均然後睇番真車先留意到係有分別...

3+2 座位有佢的歷史意義係度，由熱狗時期已經一直沿用，就算有時搭車聽倒有人話好迫，始終自己都會覺得3+2 的好處係大過2+2。如果架車唔係座滿，根本3座位只會當2座位咁用，2座位只會當單人座位咁用，所以3+2 座又被稱為最豪華最闊的2+1 座位^^  當人多果陣，乘客如果自覺座番迫D，其實3+2 座位絕對派得上用場...

夏至

今日係2014 年夏至，換句話講2014 年過左1/2... 不經不覺夏至是本年度日照最長的日子，往後太陽日出日落點將會漸漸向南移，日照縮短，黑夜漫長。真係冷暖那可休 回頭多少個秋...

夏至，炎熱，吃一條雪凍加糖的粽。趁住夏至，手痕影下模型。模型其實同照片一樣保留住歷史同埋人與物的情感，但照片是平面，模型就是立體版。

近日常聽到佔領中環，今次就回到九十年代，登上前往中環的182 及680~  80年代沙田區人口急增，1989年8月12日第182 路線開辦，由九巴及中巴聯營，目的好明顯是為了對抗城巴來往中環的88R線，因此巴士公司之間的競爭相當激烈！

182 開線初期，全線均以熱狗行走，收費$6 元。並曾派出相中短小而靈活的利蘭奧林比安9.5 米雙層巴士(BL)行走，然而大慨不了解當時182 一程收 6 元的定義，舉舉例當時沙田區的82K 線收費為$1.5，不過有解說指當年82K 的$1.5 收費比許可收費低了。

1991年6月19日，182 九巴班次加入空調巴士，中巴則維持當時的派車，但手頭上找不到記載有關當時九巴冷氣182 的收費是多少... 曾有文章提及當時豪華巴士的票價高過熱狗三倍！但空調巴士是否可收取豪華巴士的票價就唔多了解，總之就是空調巴士/ 豪華巴士票價太高。最大轉變是1995年暑假過後，中巴失去了182 的專營權！並由城巴接辦當時中巴班次。值得留意是當時182九巴班次經已是全空調，而182 是最後一條仍有派出熱狗而途經獅子山隧道的過海線！所以由1995年9月1日起，182 也全線轉為空調...

2008 年，五巴聯合加價，182 收費增至$16。

上完182，又上一上另一條前往中環的680，雖說未有鐵路的當時有人提到香港必須興建地鐵，否則香港交通將會癱瘓，然而地鐵的服務一直有待改善，總不能單靠鐵路解決交通問題，因此680 是運輸署為了減輕地鐵過份擠迫而要求九巴、中巴開辦！

1992年7月6日，680 線投入服務，只提供早上班次，當時時間表上的班次是由空調巴士開出，所以當時680是全冷路線，收費為$13。據記載680 當時是全空調巴士路線，但在1993年5月24日改為全日服務時才加入熱狗行走，以冷熱混合班次運作，是過海路線唯一一條由全冷改為熱冷線！個人估計其實當年680收$13，也是相當昂貴的票價！

1993年，中巴購入車隊內最後十部無冷氣巴士，並編號為LM1-10，型號是利蘭奧林比安11米。其中相中的LM7 曾安排行走680，由於呢10部本來可組裝成空調巴士的利蘭最後並沒有裝上空調，因此行車表現相當理想，馬力十足，因而有"老虎頭"之稱。

可惜中巴於1998年9月1日失去最後88條路線的專營權，並由新巴接辦，當時大部分中巴巴士只更改巴士公司logo 繼續行走，直到2000 年初，九巴及新巴一同將680 全線改為空調巴士，成為途經大老山隧道最後一條仍使用熱狗的路線！

在2005年3月25日，680 縮短至金鐘。2008年五巴聯合加價，680收費由當時$18.2 增至$19！

現實中，老虎蘭、熱狗都已經退役，過海熱狗更加多年前已被冷馬取代，合照就唯有靠模型實現！

中環港澳碼頭680、中環港澳碼頭182。中巴路線以英文字擺上面，中文字擺下面；九巴則相反，各有特色！LM7 呢部野以前放學去80T 成日都會望下佢，另一架一定要望的就係新巴5007 超人35週年，但當時一部模型賣緊係$288-298，有D 就好似$268 咁上下，對於一個無收入的學生哥仔黎講，背後係需要好多日捱麵包、私己錢先買倒，所以我果陣就算想買LM7、5007，最後都無買到... 而家要搵番中巴任何一架LM 都係好似中頭獎咁難了...

BUSES 個模... 無錯1X年前睇係幾唔錯，但仍然希望會有其他模型公司e.g. 312 出過批像真度更高的...

利蘭奧林比安9.5米同11.3米的分別！九巴同中巴對於車身顏色的配搭做得對相好，因為米黃本身其實配咩色都靚，以小巴為例，米黃配紅、綠都係咁正，當然九巴的米黃配紅同中巴的米黃配藍都係絕配啦，我個人就比較鐘意中巴色多一點^^。車身顏色要eye catching 倒人，絕對是學問！

有時，無啦啦走黎問番上星期甚至2星期前的野，真係叫我點答呀，有remark 的都寫晒係張紙度俾埋你，咁搞法真係思覺都會失調... 

小休(無聊分享)

昨日去左幫一個非官方組織當義工，替他們的車隊作車身/外牆翻新，雖然氣溫超過30度，但可貴的是樂在其中！試想想打工仔平日朝9晚6 工作，樂趣也是有限度！看見油漆一塊塊被剷走，有完整也有碎片，百感交集。組織其中一名成員也坦言不捨得將油漆除去... 但重新油上新色彩，舊色彩必須殘酷地棄掉。歷史就是這樣殘酷！

我亦順便去倉度拎番D 盒蛋番屋企，雖然話屋企無位，但始終都係擺屋企最易見倒^^ 能夠發揮模型的功用。由於租用的倉庫沒有空調，夏天時間只是上落一次，不到3分鐘已經流汗，倉內的模型外盒觸碰上手也是熱熱的，有點擔心呢批盒蛋是全新未開盒，盒入的糖果會否早已溶化甚至弄污紙盒... 所以存放在家中較為安全。

就係遲果幾分鐘，咁就錯失一次難得的巴模大減價... 仲要有自己想要果幾部車俾人買左... 傷心！今日將車廠的泊車調調位，盡量將重的車放底層，以維持車廠結構！

將所有超人盒蛋搬晒上上面。

底層清一色放車為主。

星期三去過太原街，是當年做問卷的地方之一... 上面有2 set 盒蛋都係果度入手！但現再去已經找不到光之巨人盒蛋，難道BANDAI 這款玩具已經成為左歷史？

九巴下月加價3.9%至5.7%！港鐵亦有相近的加幅！又諗起不如九巴俾番幾條熱狗線黎，唔洗下下都一上車就6個幾7個幾咁貴啦！苦的始終也是廣大市民，雖說每程車的增加金額只是幾毫至個幾，但其實本身的車費大多已經偏貴，同埋他們的服務從來都無令人覺得值得俾多呢幾毫子... 九巴自2011年5月以來第三次加價，連同今次加幅，九巴38個月內車費累計加了起碼12.4%。這還未計2011至2012年路線全面轉空調提升的收費！值得留意的係轉乘優惠有無相應的上調？批俾你加3.9% 你就加到5.7%，咁價惠有無上調5.7% 先？真係米話我成日話搭車貴，呢D 車費實在有數得計！不計熱狗轉冷氣貴左的3成車費，38個月內就升了12.4%，反而新巴城巴就維持2008年的收費，其實九巴應該反省下，除左聲稱成本上升要加價，有沒有認真改善服務令乘客覺得值回票價先？ 批加價果班人個個都有錢佬黎，分分鐘出入都有人渣車接送，係唔會了解到呢2 間公司的服務有幾好有幾唔好，所以每有加價申請，幾個月之後就一定批、批、批！

又計一計86 的車費呢短短40 個月內升了多少：2011年5月前，86 熱狗收緊$5.6，不久後86 提早轉全冷全程收海鮮價$7.8，黎緊7月86 就會加到升級海鮮價$8.9！總加幅是59%!!!! 加價速度是史無前例！！！59%是驚人加幅，長者使用的是2元乘車當然不會不滿啦，但市民的工資卻可能只加了5.9% 而已！黎緊港鐵比九巴率先加價，但港鐵加價後，部分車程九巴仍然比港鐵貴！以下的文章非常實用！

今年港鐵加價3.6%，相信許多人會因此考慮改搭巴士出入。然而，九巴不少車程的收費仍然是比港鐵的高，即使港鐵加了價也是。

九巴路線盲目按照「收費等級表」而訂，而分段收費及路線轉乘更「無皇管」，對未有坐足全程及須要轉車的乘客不利。以下例子為正常成人車程，以單一使用九巴及單一使用港鐵作比較：

天水圍往美孚：

港鐵：$13.7 * 1.036 = $14.2

九巴：69X = $14.5

上水往尖東：

港鐵：$12.1 * 1.036 = $12.5

九巴：270A = $14.2

藍田往西灣河：

港鐵：$8.7 * 1.036 = $9.0

九巴：606 = $9.8

太子往坑口：

港鐵：$9.0 * 1.036 = $9.3

九巴：98C = $10.1

黃大仙往錦上路：

港鐵：$16.9 * 1.036 = $17.5

九巴：269C + 251A = $17.7

九龍灣往藍田：

港鐵：$4.0 * 1.036 = $4.1

九巴：14 / 15 = $5.5

青衣往深水埗：

港鐵：$6.0 * 1.036 = $6.2

九巴：41A = $7.5

錦上路往元朗：

港鐵：$4.2 * 1.036 = $4.4

九巴：54/64K = $5.5

石硤尾往第一城：

港鐵：$7 * 1.036 = $7.3

九巴：86=$8.5

九龍塘往第一城：

港鐵：$6.6 * 1.036 = $6.9

九巴：281A=$7.5

彩虹往觀塘：

港鐵：$6.6 * 1.036 = $4.1

九巴：26M=$4.7(83X/80X=$6.1)

港鐵本身的收費結構比三大巴士來得優良，因此加價後，仍然較少出現極端車費。而九巴便宜只限全程收費，在公路前最後一個站上車，公路後第一個站下車，便通常會出現不化算的車資。

我又計一計九巴巴士模型係呢幾年來加左幾多價？唔記得07定08年一部九巴巴士模型售$288(優惠價$238)，到09年咁上下已經唔聲唔聲變左$298(優惠價$248)，到2011年加到新模$328，已有的模$298(優惠價$273/$248)，不久後新舊模一律$328(優惠價$273)。到2013年尾再加到$348(優惠價$298)。雖然仍比其他模型公司的出品便宜，但如計由2011年至今年初的已有模，實已加了16%，以優惠價的升幅最大，為20%！！！

又計一計黎緊九巴加價，需要買少幾多巴模才取得現有的平衡?? (純無聊)

假設現在每天來回車資花$13.6，加價後每天需花$14.2 (加幅為4.4%)，每天多花$0.6。以一部九巴巴模$298為例，大約490日便會多花一部巴模的價格，那麼490天內需要少買一部模型才可節省這個車費增幅，其實九巴一年已經出好多模型，490日內買少一部根本唔係問題，因為對我黎講都唔會部部買！如果單以每日只用$14.2 黎講分490日去節省$298 車費唔難，分分鐘唔洗490日九巴已經再申加價了！但呢個計法好on9，因為無可能每日只用$14.2 車費，除非490日內每日只可搭2程車，每程只限$7.1，無得交收、無得去其他地方啦... 所以上面呢段係廢話黎，睇完請洗眼！

終於入正題：小休。上星期番左大陸一轉幾日，當係休息一下，吃地道小食是不少得的。

燙粉，加蛋5蚊。

茅根粥，1蚊。

呢日踩單車去市場，氣溫有35度，著拖鞋雙腳露出在陽光下曬只是10秒鐘，雙腳已經是火燙到疼痛！因此被迫停在陰影位置！