BHTXWmb: 12月 2015

最近搭中Music Bus，咁岩廣告又有播陪著你走呢首歌，所以post 下~

11月少入~

Wmb 自從在10月30日發出盈利警告後，至今已超過一個月，回顧盈警期間開支其實都未有減少... 本來應該限量入車，但芊綺雯的出現，我都係將盈利警告暫時無視一會兒先！

有高達巴士模型紙盒套裝(特價千二蚊/芊綺雯)

高達巴士模型推出的款式 / 組合相當多，單是套裝已有分紙盒裝及鐵盒裝(各賣$2XXX)，散賣的亦包括有情景版、散裝及會員限量版... 套裝有散裝未有發售的巴模，而套裝亦正欠缺會員限量版！以上所講版本售價當然係"唔平"。但我自己就唔係高達迷，所以以套裝為例根本無必要買售價更高昂的鐵盒裝。本身連紙盒裝都無諗過買，早前九折$1980 都係覺得太貴，無視，上月尾推出聖誕優惠$1540 就開始有少少興趣！因為得4架車，1540呢個價平均一部385 開始比較合理，曾經上去80T 望過個紙盒，嘩成部電腦主機咁大，屋企真係無位擺！住得公屋地方有幾多大家都心照了... 所以都係1516當中，上星期太子80T 清貨(倒閉清貨?)，紙盒每套芊綺雯，就係俾呢個價錢吸引左，令我呢個唔係高達迷都決定入一套^^" 其實之前有個fd 想放其中三架俾我，我見一場相識我話不如我出夠芊洛雯買晒你成套，當車馬費，點知被對方一口拒絕！芊綺雯的出現來得正好XD~

其實一直話個盒大，究竟我有無誇張？可以睇下4部巴模拎左出黎之後的對比！個盒大大隻係會俾人一種霸氣，但就無位擺，掉左佢又唔捨得...

與42號鞋盒對比

與bc 紙箱對比，其實bc紙箱唔係因為有bc logo 我諗我都唔留！

太子80T 新巴Dennis Trident 798八折於是入左一部，條友話係最後一部... 係個櫃拎俾我，QC 唔多掂又打風... 念在折左唔過240 所以入一部... 然後走的時候發覺門口右邊仲有一架798... QC同扶手都好企理，激死我！其次係buzes toy 的ML1... 坦白講，$385買架只值$318 咁上下水平的鐵車真係唔鬧唔得的！

千呼萬喚AVBWU 281A、307 終於入手！二手車，281A 真係貴到飛起，問題車都捐左我$3XX... 三面有花。

還有bc 特別色冷蘭@102 / 6，可是qc 非常差！比上次3N@89C / 111 還差，主要係交界位唔掂，出界之餘仲化晒，上色ok的內籠又打大風，內籠微風的出面又唔掂，所以好多時都取其平衡，降低合格線入手...(平均3.5選一)

唔聲唔聲，TKO商場主辦? 聖誕超人展覽廣告巴士模型已經推出，主角係ATENU1，率先在TKO 發售，現場還有超人玩偶，但價格相當貴，有時間都想去望下但呢排好忙，分身無暇！ATENU1 俾Model1 出真係令我好失望，點解近年次次有巴士模型出都要鬧一餐的？好似受左氣咁，明明自己鐘意的車出模型應該高興先係，但事實就唔係喎... 係睇早前Buzes EJ4474 出到成架玩具咁，我有無咁高水平的造藝唔希望你冚家產先？我係鐘意真車先對模型有希望，點知你收我咁貴但俾D 咁的貨色我？！Model1 出E50D雖然網上有唔少人讚好，但我就認為E50D 由Carz 出的話較佳，雖然兩者的生產都各自各有一塌糊塗之處，但我係鐘意Carz E50D多過Model1 的E50D，單是A柱粗幼，Model1 已是敗北... 如果唔係超人廣告夠靚？其實架車好有玩具感覺... 仲要而家由Noshow 名義推出賣到鬼死咁貴，好難買得落手！今次又係唔講粗口唔得！

既然未買超人巴士，不如欣賞住舊超人巴模同高達巴模先~

講真一句，巴士模型限量幾多，我從來都不care，買倒限量少的模型係會開心D的，但最終我只關注產品的質素是否值回票價，我話之你紙盒套裝出幾多套、鐵盒套裝出幾多套、情景又幾多套、散裝又幾多部，總之最好出夠十萬八萬部，無人買果時我寧願可以平平地買倒，都唔想用貴一貴去買所謂限量幾多幾多部，極端D講句，市面上每一部領牌行走的1:1 巴士模型都可以話係全球限量一部，唔通你會用二百萬去買部1:1 ???

某日，惑星W地區被開發，提供巴士服務，一輛RX-78-2高達巴士同超人巴士誇了時空來到惑星W地區。個人係對超人認識比較深，由自己細細個睇到而家，幾乎望住唔同超人幅相都可以講得出係咩超人，就好似一些車迷只需目測前方的汽車外型就能判斷出該汽車的型號一樣；高達就近乎0認識，只見車上寫住RX-78-2 就RX-78-2，係咁多！

影虛構人物模型總覺得背景都要千奇百怪一些，但又唔好扯得太遠，確實係難題！就以這張相為例，應該用凹凸爛地取代平滑的桌面，但有無師兄知邊度有大塊爛地面購買？後面的藍色波波係叮噹個頭，本來想製造惑星的奇異，呀原來叮噹的顏色又紅又藍同部車的顏色又幾配合！以小弟目前的造藝實在係低水平得很！

最初睇高達巴士車身廣告，我覺得佢個設計唔掂，太多空白位免強加D字、logo 係度似乎有浪費車身空間的感覺，令非高達迷黎講呢個系列廣告根本沒有吸引力！不過當我從朋友手上接過第一部高達巴士之後，就開始覺得個廣告其實都已經算係咁，反正對我又無影響的，如果要我設計一個高達全車身巴士廣告係完全no idea，甚至我畫的話水準會更加差都未定...

高達、超人巴士多面睇

創英?超豪5007及Carz E50D。兩個模都算係唔錯，超人超豪5007好似2001年出？(超人35th 就係2001年)十幾年前的模雖然改善空間好大，但如果比起今日 buzes 的S3BL 玩具車，十幾年前的呢架超豪都可以話係有少少水準了... 不過車頂太薄同內籠好多錯處... Carz E50D 正面望最明顯的問題應該係上層左右兩邊斜過頭，車頭車頂厚左。

以前去80T一定一定一定要望下的超人巴士！雖然水貼貼得好參差又唔對準位，水貼又超易爛，唉而家D水貼車又何嘗唔係咁差？最記得係80T 個價錢牌上錯誤將新巴5007寫做50007，我都覺得奇怪乜有5萬幾架超豪咩？？舊超人廣告的吸引之處係成架車有8個超人的圖案，是超人35週年做主題，均是當時受歡迎的超人，包括迪加、帝拿、佳亞及與超人佳亞半相對的阿古魯，還有超人的強敵巴魯坦星人及獨眼怪。

5007個尾軸做到個車胎突晒出黎... 仲有有個位我十幾年前留意左好耐，就係5007下層無做到冷氣糟，下層D座位全部略略拉後左少少，本來冷氣糟個位變左尾排座位... 有少少感到奇怪，冷氣巴點可能唔做冷氣糟？又會錯得咁交關都有的...

高達RX-78-2 左右

超人帝拿、佳亞左右

如果有留意E50D 車箱的吊環扶手，應該會發現模型除左做得巨型之外，近天花果條扶手做錯左！即是果7隻吊環由頭到尾都掛係同一條黃柱上面，所以模型吊環出現四高三低現象就係因為前後分開左，加上又無計準高度引致有成1mm的相差，仲話精細版，做到咁樣... 佢D吊環其實唔做好過，實在差強人意... 1:43 E50D就正常，咁死啦，下下同你買1:43 咩? 無可能！

同場對比，我...都係鐘意超人多D... 以前的巴士廣告無大十字同埋無覆蓋車窗，如果一早無呢個限制，分分鐘可以擺多個超人同怪獸上去都得~

車頂還有超人迪加、帝拿同埋佳亞V2。高達果架車頂寫住35th 覺醒，是什麼意思？

忙到甩碌，D上頭諗野有無用腦？咁多野做都cut人，搞到踢晒腳，日前因有字軌司機缺勤收車，引致嚴重脫班！個office 無人做野，真係一個人做二至三個人野... 近日接連有user 不滿效率低，而尋日終於引起主場果邊的高層不滿，由4/12 起，即刻增加字軌...！德政！其實人手咁少老實講就唔應該批請假同埋唔應該再俾D 字軌order 其他線，站長又經常放假，成個office 無晒人，今次事件可以見到上頭做野一塌糊塗，上頭的上頭又係發緊夢，完全唔知實際咩情況、人手安排亦明顯未經大腦思考！

6/12 早上起來山色分明，能見度非常高！可惜天氣凍，加上前一晚羽毛球對戰激烈，手腳已不願多動... 還是開電腦post 相算了！

轉眼7年前12月6日，是70熱狗最後一日服務！

FA9288 / S3BL410 於2008年12月6日晚行走70號尾班車，接載市民見證服務了超過三十五年的七十號線最後時刻！

既然貼左超人同高達出黎，順便又post 埋8號巴士分享下... 我記得以前係80T 買左張3R 超人巴士相，有次拎出黎俾人睇，大家都以為係九巴黎... 然後就發覺又好似無新巴logo~

呢個景有D似架車泊係冰上面... 話說呢部禿鷹係某某公司(唔記得名)2週年紀念模型，後來從朋友手上平價購入，本身對Carz 呢個模不太好感，因為成部車個輪廓都好怪，車尾好明顯唔似樣... 而且部DM28 QC 好差，車尾編號印到化晒，窗又有花！不過8號線好似係中巴一條幾重要的路線~ 有熱有冷擺一齊影相感覺特別型！