微影1/43 Hiace GOGO VAN 槍彈辯駁V3 大家的自相殘殺新學期 "真痛車"

這次分享微影(My Tony)幾年前推出的1:43 Toyota Hiace GOGO Van 及PS4 槍彈辯駁V3 主題痛車, 新槍彈辯駁V3 大家的自相殘殺新學期, 馬上展開大廝殺!

呢架係一架真痛車, 下面會加以分享...

先要講講其實我本人是沒有玩過此遊戲, 不過早前追回1:43 GOGO Van 模型時無意中發現了這輛主題痛車, 又覺得幾靚, 追hiace 模型少不免要追埋呢d 特別版...

"痛車"(Itasha)發源於動漫大國日本, 車主指把自己喜歡的ACG作品人物圖案裝飾在車身内外, 也可説是他們透過張貼自己喜歡的人物表達其對心愛角色的支持, 是ACG文化的一環。痛車最常見的車種是汽車、客貨車及摩托車, 因為車身有較大面積可裝飾ACG圖案, 而在大型車上的通常是相關廠商進行的宣傳廣告。與Cosplay活動類似的是, 痛車較常出現於日本東京都的秋葉原、大阪的日本橋等ACG商品販賣集中地, 以及ACG、同人誌展覽會, 另外也在一些車展以及痛車同好的聚會也會出現。

其實對於一般人來説, 改裝痛車可能是很瘋狂, 可能會被批評這是XX上腦, 但當你明白在日本, 不少動漫迷對動漫角色的著迷程度隨時多於真人, 家中收藏不計其數的動漫物品時, 改痛車其實只是小事一宗。

2017年7月, Sony Interactive Entertainment Hong Kong Limited (SIEH)於「香港動漫電玩節2017記者招待會」上宣佈PS4™遊戲《新槍彈辯駁V3 大家的自相殘殺新學期》將推出繁體中文版, 並與本地即時貨運平台「GOGOVAN」合作, 推出限量版「PS4™《槍彈辯駁》X GOGOVAN主題痛車模型」, 四架真實版主題痛車亦將於動漫節現身! 真車的圖案是有另一版本, 模型只做了其中一個版本!

可惜近幾年的動漫節我都無去, 完全唔知有呢d野...

這架模型並沒有公開發售, 當年的7月28日至8月1日, 每日首70名預訂PS4™《新槍彈辯駁V3 大家的自相殘殺新學期》繁體中文版遊戲的顧客, 可獲贈主題痛車模型一部。隨後的一段日子, Sony Store網上商店也開始預訂活動, 首50名成功預訂之顧客亦獲送主題痛車模型一部。

因為限量且沒有公開發售, 便成為一些炒家的武器, 最高價見過400一部, 坦白講, 微影做呢類宣傳產品全水貼, 其實就不太值食炒價去追的, 但以我為例, 近期才追回呢批1:43 Hiace, 好多款式都陸續賣晒, 難免要用較高價先追倒... 以呢架槍彈辯駁為例, 放售的人都不多了, 這架我是3XX 入手, 暫時是手頭上眾多Hiace 之中最貴的了... 唔希望再有其他Hiace 模型創新高!

但後來竟然找到槍彈辯駁$280一架... 還説如果我買, 可以250 俾我... 幾乎令我抱頭痛哭, 買貴左百幾蚊呀痴線... 真係一架痛車, "真痛車", 荷包疼痛... 終於明白痛車的意思了, 就係肉痛咁解!

如果有鹹蛋超人主題車模就好, 1:43 Hiace 模型啟發倒我如果日後改主題車, 用Hiace 就算了, 實不相暪之前有諗過改架1:43 巴士模型作為主題車, 包括當BHTXWmb 的youtube channel >1000位訂閱者的時候, 會改番架紀念版, 仲想平入一架1:43 金蛋搵DBM 噴綠悠悠色, 不過單是噴油費用報價已達1600, 如果計埋買模型的車價及更正車箱設施、路線等費用, 都接近三千銀, 實在令人卻步！相反用1:43 Hiace 雖然無巴士咁吸引, 但Hiace 都有廣闊的車身空間可以貼圖案, 一架Hiace 平的百幾二百蚊就有, 遠比改巴士模型更節省金錢, 最重要係其實小弟都坐過好多次Hiace 四圍去, 所以Hiace 對小弟黎講絕不陌生！又事關今年受到鄭月娥開關輸入武漢病毒殺害香港人一疫, 整體經濟下滑, 高層已宣佈今年無人工加了, OT 工作亦有所減少, 收入大幅下降, 變相減薪, 5月又要交第二期稅, 真係多多錢都唔夠洗！改模型實在省得就省, 其實我都向DBM 查詢過不同改車方式的收費, 但無奈從未成事, 經濟不景確實影響很深遠的！另一方面, Wmb 車隊維修開支亦有所增加, 係未收到一萬蚊之前, 不亂花錢了...

另一架是藍色版Gogo Van, 現在似乎多數gogo van 只是在車外貼塊貼紙

這架成為小弟第二架1/43 hiace, 也是第二架彩色塗裝的hiace~

其實本來唔係買gogovan 的, 本來係想買半封窗白色版(1XX平入), 但架車又俾人買左, 賣方願意讓出這台gogovan, 小弟當然接受, 因為今時今日1:43 gogovan 比白色版更少見！

Hiace 體積比較細, 可以拉盡500mm(等效750mm)影, 高炒角度相當順眼! 反而巴士太長, 高炒角度會顯得好怪!

另外最近先發現原來微影出過另一架gogo van, 同樣係藍色底, 但圖案不同, 有卡通爆炸雲圖案, 盒上好似寫1st 週年紀念, 又係市面上好少見, 唔知邊度有得買番呢??

J collection 個hiace 模真係可以一模多用, 微影用呢個模出"香港車"幾乎無改模都出左十幾款... 呢個模確實好洗好用, 隨時仲慳皮過80T 做E500MMC......! Hiace政府車輛仲由之前220一架唔聲唔聲加到280... 講真個模又唔係自己起的, 憑乜賣到咁貴先... 賣番199-250 就合理...

剛也在BHTXWmb 頻道上分享了槍彈辯駁模型片段, 不要忘記按like 及訂閲啊~

之後會分享更多1/43 車模, 有興趣的快些訂閲吧~

1:43 郵趣廊香港郵政車小聚會 考斯特 海獅 Toyota Coaster / Hiace / Nissan

第一次入1:43 車模時本來無意儲郵政車, 兩年後卻終於齊套了...

很多年前80T 出過一套三架1:76 的平治郵政車, 不過以前做模型的水準欠佳, 80T 做的更不能説是模型, 只能視為精緻玩具, 很多細位都玩具化, 連車頭燈都是貼紙了事, 終於在一次特價, 以118蚊買了(原價198, 即使有九折吸引力都不大...)

先分享呢套模型的開盒片段, 一直想講微影個紙盒好難拆, 一拉盒尾個蓋已經撕爛了兩個盒, 所以我自己係十分dislike 佢呢個desgin! (日前分享車模時, 都有2位人兄有相同講法！)

記得訂閲：BHTXWmb ~

郵政車紙盒

這一套三架1/43 是東方玩具(微影)在2015年推出的, 最吸引的是大中小都是199, 相當抵玩! 終於有一次去了中環郵政總局買了第一部1:43 Hiace 郵政車, 由於當時自己未開始玩1:43, 加上當時只對Hiace 感興趣, 所以並無買郵政小巴及小郵車! 從那時起, 原來已展開了兩年的1:43 郵政車收集生涯...

這是微影自己當年的描述：

這項目的誕生真的歴盡千山萬水, 一切來自我們做了一架郵局Hiace, 向香港郵政方面協商授權, 但因第一次合作及我們是新品牌所以不成功, 但也感謝香港郵政給予信任機會, 我們一定盡力做好, 圖案是移印, 不是水貼。

流動郵車是十分高難度的項目！這是香港郵政專屬項目, 我不便透露太多關於價錢上的點滴, 但因為之後是不會有其他店有得賣, 我自己也十分驚訝不是六百元三部而是$538…

所以我也訂了廿四套。 可能大家以為我谷銷量宣傳, 但我可以真心講句唔係因為我知生產數量少, 跟本不存在賣不去的問題。

去年開始陸續追番幾款一直喜愛及新喜愛的1:43 車模, 開始了1:43 戰線。直到最近, 微影於天悦廣場舉辦了聲稱是五年一度大特賣, 於是便前往希望追番部份出左幾年的1:43 Hiace, 但原來都係一場清蟹貨/問題貨、次貨的大龍鳳, 唯一看得上眼的就係呢部賣150 蚊的郵政小巴, 因為當時去到攤位, 得番d 問題相當嚴重的垃圾貨, 100蚊一架都買唔落的, 而其他攤擋的AE86、Lamborghini 又無減價, 唔買番架即係白行(筲箕灣來回車費好貴架!), 所以就入左呢架郵政小巴! 郵政小巴的入手過程真是轉折啊...

香港郵政服務網絡遍及全港, 所以必須依賴龐大的車隊以切合郵政服務的各種運作需要。三款精美的郵政車模型包括小郵車、郵政貨車及流動郵政局, 都是根據真正的車輛按1:43的比例製造。當你到街上, 大可一嘗找尋這三款郵政車輛的樂趣。

睇番資料, 第一批郵政小巴門位的locker 係做高左(上圖), 但真車係高唔過車窗, 所以第二批郵政小巴就改番正確高度, 可能因為當時是首次與郵政局合作推出郵政模型車, 所以現在回顧是極罕有地改番個錯模, 市面上因而有兩個郵政小巴版本, 早買的是錯版; 遲買的是正確版! 諗番下, 而家要香港的玩具商改模, 真係好難了, 明知錯模都照出...

這款小巴稱為流動郵政局, 現時全港有三輛流動郵政車, 但我好像只見過呢架小巴一兩次, 這款流動郵政車曾被批評成效太低, 做法落後, 停留時間短, 市民多數"唔知有呢架車"。以我為例, 唔係知道有出過模型都真係唔知有...

而近期政府開關引入武漢肺炎病毒毒殺香港市民, 有人形容直情是企圖引起病毒大爆發, 流動郵政小巴也無限期暫停服務!

門位後鏡無做兩塊由主鏡伸出小鏡, 車内都無做後視鏡(即司機望角度向下車門該塊), 加上車窗又無任何貼紙(行車証之類), 所以架車拎想手會覺得内籠好簡單, 空lell lell 乜都無, 如果1:76 係咁還可接受, 1:43 似乎過於簡陋, 微影做模型水凖的確差少少, 係做到架車出黎但缺乏精細度及神髓...不過始終5年前産品, 期望日後微影做模型水凖可以提升, 唔好成日掛住加價...!

車頂的組件做得比較hea... 拉唔倒都預左(微影d 1:43 車99.99%都無活動功能), 但應該至少做倒塊布微微拉出的效果, 唔係上網睇番真車相, 都唔知係乜東東... 不過199 就安慰大家唔好要求太多了... 如果係微影的黑警小巴, 550一架入面都係空lell lell...

其實微影做車都睇得出以最低成本行先, 捨棄不少車身細緻部份, 例如窗又開唔倒、前輪又轉唔倒、門又開唔倒及内籠就更加hea... 1:43 咁大架但d 凳都無凳腳, 就連個模都係抄人的... 你話一架車成本洗唔洗100蚊人仔呢?

真車車尾旁板可90度掀起當桌面作書寫用途, 車窗側打開當作櫃位, 但模型車窗無做開關(正如上面所講微影d 1:43 車99.99%都無活動功能), 不過膠片表面有厚薄之分, 免強營造了兩片活動車窗有一内一外的排列~ 相反微影出的1:43 勝利二型都無做到呢個效果!!!! 都唔知他們做車係進歩還是退歩! (但有樣野一定係進歩, 就係售價...)

"如無記錯"郵政貨車Hiace 係小弟手頭上第一架1:43 車模, 模具外型不錯, 但車牌太厚, 同埋兩隻門的窗頂無做水擋(唔肯定原裝係咪無定還是真係做漏)

My Tony 呢個hiace 模其實係用J collection 個模黎出, 並非微影出品, 所以你會發覺J collection hiace 車牌本身做厚左, 微影出的hiace 都係一模一樣...

車尾上落貨門無開關功能, 呢點有少少失望, 因為bc 1:76 hiace 雖然關節太組, 但都起碼有得開關, 如果1:43 size 大咁多做倒車尾上落貨門開關就更好... 但可能又再貴d... 其實1:43 呢個scale 有些尶尬, 因為要做門窗開關又需要模具有一定的精細度及工序增加, 如果開關得來坑位太組又會顯得好玩具, 而完全無任何開關的話可玩性又變得好低, 發揮唔倒1:43 的優勢... 作為車模買家, 當然想擁有最完美的車隊!

加送多一架Hiace 合照

第二架郵政Hiace 係最近入Nissan 小郵車時入, 128 一架仲平過全白色版, 但拆盒後才發覺車尾欠缺後鏡, My Tony d qc 就係咁仆街! 因為缺件而令架車食之無趣味 棄之可撚惜, 始終都係自己錢買, 所以從一架廢玩上拆了一塊倒後鏡痴番上去, 分得出上面邊架係問題車嗎??

至於Nissan 小郵車, 是最近旋轉拍賣入手, 平到唔買對唔住自己... 所以就入左, 就係咁, 三部郵政車終於齊集了... 可以話係有心等車車不出 無心插柳齊了套!

Toyota Coaster 及Hiace 合照~

三款郵政車合照~

其實我更期望會出1:43 平治Sprinter 郵政車, 但偏偏唔出...