穿越罰企的尖沙咀九巴車展遊記，唔少人表示係個場入面忍屎忍尿、排隊排得耐，上車先睇得果幾分鐘又被趕下車... 心諗係咁架啦，鬼叫而家香港周圍都咁多人咩？一放假外出去邊都好似旺角咁的，而家雖然話遊客少左，但我係完全唔覺街上少左人，起碼再少多三成人先可以叫做有自己空間，人流減少紛爭也減少，世界才會美好起來！
對上一次九巴係車廠搞BCOY 係2013年，最記得係D車泊得衰，唔少人完場前希望捕捉D車調位一刻被工作人員用鎖鏈武力清場對待！以過往2-3年先一次BCOY的做法估計，今年係無BCOY的...
3月4日傍晚，坐天星小輪遠遠見倒架3N 到左尖沙咀都知出事... 無帶相機，唯有用手機影幾張...
神奇係唔少人已經拎定相機係度捕，好似一早知咁...
另一邊有最舊與最新！世界上總係有一些人企係度但死左，唔識讓開少少的...
睇住兩架車本來泊得有一定距離，但越泊越埋，就知3N就算未圍欄都無標準相了！係架AL1 有梯位，但無相機無得影... 睇住人地影... 搞到心情有少少低落，唯有坐281A 上層車尾碌番屋企...
原來，有人由前一日傍晚呢4架車到場時一直等到第二朝十點入場，雖然油尖旺係不夜天，但會唔會痴漢左少少？
九點上281A，碌出尖沙咀已經是十時十五分，281A 碌車情況嚴重，希望巴士公司正視車長行車速度過慢的問題以保障乘客利益！
入場龍尾已近精品攤位... 人數比我自己想象中多一倍，心諗照計無乜人會睇巴士架喎，D人邊度走出黎架！？！？
入場前四周圍攝。由於使用18-55mm 短鏡，幾乎係要行到架車面前先影倒想要的部分，但有時遠距離望的野同近望視角有別，所以真係要買番支18-1XX...
好高興終於可以上車睇，但人太多，排隊上車都半個鐘有多，事實上要上晒咁多部車，單單排隊已佔去2/3 時間... 其實黎的目的只係罰企了吧！(下面照片排列不分先後，因為淨係3N已經上左3次，3次加埋先影倒！)
三門巨龍(1982-2003) / 丹尼士巨龍十二米 / Dennis Dragon 12M(車隊編號：3N)，是二月九巴專頁投票最想見的古董巴士第一位，自從回復載客時期模樣後也是第一次在車廠以外地方展出，因此本人亦選擇先排隊上3N！
-80年代丹尼士車廠與九巴研發的12米三軸三門版本雙層巴士，中巴亦有引入同款巴士但維持雙門設計。
-兩扇落客閘可令乘客更快下車，節省上落時間，兩門之間位置不設座位，使載客量高達160人。
3N全面睇：
很久沒見綠窗熱狗了... 記得訓練坦克車尾都係綠窗~!
人山人海，想話細心欣賞下都好難，拍照總有人入鏡甚至難免阻檔取景，邊及得自己一架車咁爽？
原來3N的落車門是摺合式開關，車門亦有空隙配合地台梯級！
e... 去水孔入面仲係白色喎！
7454466，八十年代乘客投訴熱線？
吉拿時期的巨龍車頭有2個向前的座位，現在的E400 亦有類似設計，坐呢個位不單只靠近車頭，還可看見司機駕駛！非常懷念呢隻設計！
啡色的車箱充滿舊時坐熱狗的感覺！又熱又慢的感覺番晒黎！
架3N 翻新左但又新唔晒，可能係九巴覺得架車唔係載客賺錢，無必要整得咁靚，換左地台膠就算！
我又做下3N 乘客先！唔知對上一次坐3N 係82M 定49X呢？以前有勝利二型的時候，寧願等勝利二型都唔會上巨龍！
巨龍的潛望鏡同利蘭、都城唔同，巨龍係連住車頂，其實覺得利蘭、都城的潛望鏡好D！模型的話，生產商出巨龍可以大條道理做少塊潛望鏡！
久違無路訊通的上層車頭！
點解大家都係開龍凳，你果D 咁新淨，我果D咁殘舊的？
AL1 甩晒油喎！莫非白色車真係唔多覺？點解訓練車甩油望落去咁殘的？？
舊時配置的熱狗凳係被稱為最闊的2+1座，原因係座位並無劃分單一座位界線，如巴士並非滿座，這些3+2座便是2+1座了^^" 不過如果夏天要坐得咁迫其實真係幾辛苦，2+2 的配置係最好... 但並唔係講緊而家D 新出的高載版，因為新車座位與前排座位距離縮短左，乘客同樣難受，如遇隔離有肥人的話都幾難轉倒身...
巨龍獨有的唔知乜乜牌！
3N尾軸到車尾的距離比其他型號的長，所以尾軸後多了一排座位，但原來個座位係向後的，正常座位多數向前先係喎，係咪修復的時候裝錯左？
3N 車尾的斜位好特別，正面望是筆直，斜望才覺得斜入去！
可惜在車上逗留的時間不多，很快便被工作人員驅趕下車，由於人流太多，九巴真是懲罰市民了！
九巴模型攤位，其實個攤位都係多餘，全部模型原價發售又無優惠，款式又少，係要買都行去隔離80T 買啦... 不過做得展覽又無理由無模型售賣的，九巴點會錯過賺錢時機？既然展出的係AL1、3N，攤位亦不難發現buzes AL1、bc 3N 的縱影！唔知有無人因為真車係隔離而買左buzes AL1 玩具呢？？
當日還有九巴改裝而成的陽光開逢巴士免費九龍遊，但要上齊3N、AL1、4961，根本無可能有時間坐開逢車的！
冷氣利蘭(1988-2010) / 利蘭奧林比安十一米 / Leyland Olympain 11M(車隊編號：AL)，是二月九巴專頁投票最想見的古董巴士第二位，加上本人曾在2005年坐過AL1行44，當時亦都影過幾張車箱同車外的相、片，但因為壞電腦搞到無左... 11年後終於才有機會上車，仲唔報仇影番夠本？因此接下來本人亦選擇排隊上AL1！
-車身為白色，但車箱仍採用啡色皮及乳膠座倚，內部設施及座位佈局與非空調巴士一樣。
AL1 全面睇：
集吉蘭、訓練坦克於一身的AL1... 有一種熟悉感覺！
漏油？
上車前仲要叫人like 九巴專頁facebook... 心諗唔洗啦掛，咁都要呃like ? 講真九巴成日加價又收車碌車，新開的線又咁貴，like唔落手喎...
假大水牛倒映！
唔知仲記唔記得係咪剷呢忽白色油成塊油渣蓋留低左個空格，好正！
雖然無得坐上司機位，但本人無所謂，因為簡單黎講AL1同S3BL 司機位根本無分別，純粹覺得一上AL1，熟悉的感覺完全出晒黎！但唔知點解，D人好似趕住去死咁的，上車又吹人快D走上車箱，落車又趕人快D落車！好心就分幾日搞多幾次啦，等D 人唔洗迫埋係個咁細的場入面忍屎忍尿近8個鐘...
熱狗窗~
呢塊板就好耐無見，因為好多車死的時候都拆左...
乜 DX2437 有報站機的咩？？好似2006年退役的巴士先有... 熱狗黎講EH2736、EH8559 打後先有...
波掣、手掣、門掣
價錢牌！N 年前係用紙牌顯示，後來用呢隻顯示器，但近年已經轉在八達通機顯示，好多車呢隻顯示器已經無用了！記得上年批3AV 退果時好多架車呢隻顯示器都整爆左的，九巴真浪費！其實佢唔要不如送隻俾我啦...
舊時的巴士下層車頭有側位，坐車頭可以觀看司機駕駛，但自從低地台巴士引入，這位置已經不設座位。細個有一次望見司機駕駛，明明巴士轉左，但見倒司機係轉個盤轉右的，百思不得其解！原來我係望到整個轉彎過程的後半部份，姐係回盤的一刻，所以誤以為轉錯方向...
車箱告示~
任何場合，何時何地，利蘭的輪蓋永遠最型！
可惜AL1 模型由buzes 製造，仿真度低又錯模錯足咁多年，2014年改車頭仲衰過唔改，越出越差，價錢又不斷加，所以就算出埋AL1 早期版，都決定唔買AL1 玩具！buzes、312 出AL1 都出得唔靚真係可惜... 如果AL1 再出，有312 的AD1 水準，先值得科水！至於buzes 黎緊的新模，都不抱太大期望！
3N的密集骨位~
上完AL1，準備排隊上4961，但龍尾計起多達數百人，要上到車，要排成粒鐘... 九巴呢招真殘忍，有乜係殘忍得過罰企無廁所仲要捱肚餓？千奇唔好諗住離場去廁所，食麥當勞再入番黎，出左去保證排到收當都入唔番黎！
打蛇餅，4961 自從自己第一次去BCOY 時已經想上車觀光，果時仲有BL 係廠頂... 今次終於有機會^^！
上圖是其中一次BCOY 所影，可惜以前D傻瓜機真係好廢，觀景器望出去同影出黎兩回事！永遠唔知主體會唔會偏移上下左右，結果一筒36張菲林出左黎得4-5張成功，其餘全部係倒錢落海，所以80T 賣一張$4.5 當年是打劫價但仍然有人科水！
丹拿A型(烏咀狗)(1949-1983) / Daimler A(Black-mouthed Dog)
-於1949 年引入設有56個木製座位。
-首批共4部丹拿A型雙層巴士包括4961於1949年4月17日投入服務1號線，行走尖沙咀與九龍城之間。首批125部配傳統車咀俗稱為烏咀狗至1983年8月正式退役。
4961全面睇：
甩油喎！
E50D 更新版的車身... 即管睇下模型第日出成點...
睇落都好難駕駛咁喎！
時代變遷 無奈局勢更亂 這裡尚未安全...
尖沙咀鐘樓+4961 真係一絕！
由於人流太多，根本無可能影倒鐘樓同完整的4691...
跟住都上左ATENU... ATENU 馬力表現令小弟好滿意，終於再有老虎的感覺，不過同當年坐86A 老虎比較，都係老虎比較正少少^^
新車座位雖然舒服，但座位前後距離比舊車的更窄，有頂腳情況... 如果你坐窗口位，隔離有大肥佬坐係度而你要落車，一定要移開佢先走倒... 本人相信會有唔少口角、武力事件是因為碰撞對方引起...
車頭的粗大窗框唔係幾鐘意...
將直梯改為曲梯，將上層座位前後距離增加多一吋係咪更實際？
大會將原定4點完結的時間延長至5:30，對未入場的朋友黎講當然是好事，但本人需要6點到達中環黎講，就不是一件好事了，因為無緣一睹3部古董巴士發動引擎離場一刻！
呢個時候，仲見倒主席D fd 係度爆緊粗^^！
期待一刻無人入鏡，影一張AL1、3N 合照，只求一秒鐘，但結果呢1秒都係無出現到！
工作人員仍然是用同一招，就係用欄杆向市民進迫，希望文明的社會唔好有呢D 武力清場的場面啦... 身為工作人員維持秩序係重要但都唔可以武力對待未離場的市民。事後上網睇番巴士離場時原來仲多人過1A、5A 全冷... 所以早走早著好了XD!
一出一返，成十三個鐘，所以假期好重要！
以上相片全部用18-55mm，手動快門，由於室外時晴時陰，車箱與車外光度相差也很大，唔少相出現太光/ 太暗情況，唔用A mode 用M mode 絕對是一大困難...
Wmb 近月開支比預期大，為左追番落後左的進度，放車行動經已在月中展開，以後也應量入為出！車太多，錢太少絕對唔得，因此放車平衡生態是必經之路！
