多圖！
FRIENDS OF KMB 20th Anniversary ‧ HS3639(1998-2016)
於2015年底披上九巴之友二十週年紀念(20th Anniversary)廣告的HS3639 / ATR456 已於3月23日退役(享年不足18歲！)
最近搭巴士Noshow 經常播ShowMe MV，係車上的揚聲器聽極都唔似林峰把聲，而且有一句亦不夾口型... 第一眼覺得林峰唱呢D歌好似格硬黎，不太合適...
復活節前重點入手：
卡樂B 香港開店限定版，一來兩年前見倒呢個廣告的時候已經覺得好靚，二來高興DW的AVBWU模光芒再現(雖然已經由Carz接手)！可惜一部竟然索價$569！同朋友冒雨排隊久候才到手，同時創下了本人26年來最高入手價格的1:76 模型... 而近來購入的巴模，全部都是非官方車！其中向BC 的捐款已經不計其數，包括龍運富豪奧林比安、黑金鋼等，但呢2款車個模唔差所以好樂意捐款...
除左巴模，亦不少得最近愛上的超人大膠！
小學館超人高斯！
Ultraman Seven~
背面的拉鏈都有做出黎，不過個頭痴得好求其！
感動！十年了！本月終於有齊Ultraman Nexus 超人力斯銀、紅、藍三色！！！在力斯之前係03年電視播高斯，但中間三年都無超人睇，到06年才有力斯，所以當時感覺終於有超人睇而決定集集睇！自從06年TVB播力斯開始，已經係四出搜集相關物品，當然貴的都曾經見過但無買咁解。
超人力斯Ultraman Nexus~
Ultraman Nexus Junis Red！
Dark Mephisto 黑暗惡魔 / 黑暗梅菲斯特！
Ultraman Nexus Junis Blue！藍力斯的收藏品一向少見，一隻二手藍力斯大膠索價$280... 無奈咁多隻力斯大膠的姿勢都奇奇怪怪... 高度仲要比之前出的縮水！
HD 盒蛋藍力斯！當年用$15蚊bid左個UHS阿古魯軟膠人偶，點知無貨，遲遲未能交易，店主見我咁鐘意超人，於是以5蚊的票價賣左隻都係藍色的力斯盒蛋俾我^^！姐係呢隻藍力斯總共係$20！超靚價！雖然無盒，但我自己都好鐘意！你話如果係UHS 藍力斯軟膠人偶的話就正了！不過做生意又點會咁蝕呢...
HS3639 已於3月23日退役，我諗九巴之友出過的幾個車身廣告都係HS3639最色彩繽紛，有少少似小學時畫的生日卡XD，雖然模型亦於早前推出，但可惜九巴對九巴之友重視程度很低，沒有邀請會員舉辦派對慶祝！
3月12日，HS3639行49X，坐地鐵轉82X 趕影入站！
廣告顏色配搭一流！淺藍同粉紅色簡單無得彈，當然HN9680的屎色太核突都會顯得HS3639的更美觀！(老早就說木顏色筆的配搭是完美的！)
車頂也有20th 的標誌！
咁o岩呢個位後面又有架車泊係度，搞到金字塔得好西利，但又無可能唔影喎...
HS3639 行車証~ 1998/4/20-2016/3/23，轉眼間丹尼士三叉戟陸續滿18年，丹尼士巨龍亦陸續退役... 好似自從熱狗退左之後D車退得好快，但熱狗只係玩得17年，冷氣巴已經行足18年，否則而家應該退到J牌，HS3639 個九巴之友廣告都只係上左幾個月...！
PX4668 / AVBWU127
KT6487 / 3ASV447，曾經是沙廠最樣衰的超豪... 當年掛85K 就算見倒都無乜影！
3月20日，HS3639行86！廣康區兩條L廠線都玩晒^^"
300mm (450mm)夠？！下下開高解像然後crop相，張張十幾mb 擺係電腦度真係好方法？！
呢張真係險車阻，前面有貨車直行，架貨車又慢吞吞，心入面只懂說：妖踩油啦！
兩部前龍運巴士丹尼士三叉戟十二米，一樣都係"新車未裝Roadshow"，HS3639應該3月23日後會裝番^^"
！呢個老野車唔黎到唔行出馬路，車一到就行出黎... 俾呢個老野激死！日間最後一張入站梯無左...
不少得一班影完又唔走開的聞車黨！右邊果個唔係影但又唔行開係度望咩呀... 很快，來得不合時的82K 阻正個位... 搞到本身短鏡的門位變成更短鏡...
ATEU呢D 咁的車我企一陣就影倒2次，反而以前康豪都無乜影... 真係想影的車影幾轉都未有滿意照片，真係奇怪！
JC3075 / ADS219。2017年8月... 到時會唔會有再見丹尼士巨龍十米廣告、告別非低地台巴士廣告？出埋模型？呢張企到最盡zoom過去，真係成個廣康區係得呢隻位係長鏡，可惜以前熱狗時期無乜影！好想吉蘭復活！甚至而家都越黎越少白板了...
PX546 / ATEU30。樂瞳ok，但呢個廣告設計唔掂... 遮住樂瞳...
陰天落雨，6點半黃泥頭已經係近全黑，HS3639 入站梯都係影唔倒！加上當日全天候咁大風，就算自己閉氣防震功力深，亦不敵強風，所以iso3200 博到盡！但係呢架86 到站前發生了一件小朋友玩牌的事件，兩名小朋友在上層車頭展示一塊82X 牌及一幅80T巴士玩具店的海報，本來都不值一提，但兩名小朋友下車後仍一臉自豪，仲係架車前面行來行去阻人影相，唉點解而家D 巴膠可以膠成咁？？
呢個位本來可以角度幾好，但衰在前面有兩塊站阻住搞到大晒頭！
呢兩名巴膠係我前面行黎行去阻Q住晒，其中一名比較斯文的手持82X膠牌，另外一名黃色衫的則嬉皮笑臉，更加去埋架車前面指黎指去，行為相當幼稚！令人質疑他們手上的膠牌從何以來！
行到邊就阻到邊，正仆街！幾年前無啦啦係站尾加燈柱，搞到梯位車尾同門位車尾都阻住左...
開出前著了車頭燈，車箱當堂光番晒！
卡樂B玩具登場
卡樂B 香港分店開店限定版"玩具"登場，索價HKD$569... 值唔值呢？客觀咁講句，唔多值！因為唔係九巴出，所以無九巴logo、無車牌無車隊編號、內籠亦無貼紙，同一時間大金賣368，同樣非官方出，由於無巴士公司logo，個人認為售價唔應該同正常巴士模型睇齊，應該平番幾十蚊先合理(念在有廣告成本比白色版高！)所以同樣係非官方的卡樂B 雖然廣告真心覺得係唔錯，但賣569 又無discount，真係完全當係俾錢改廣告的... 另外隨著HS3639 退役，九巴之友20週年咁就完左，九巴有慶祝過咩？上個廣告短短幾個月，係咁二出埋模型賺多你一筆，會員買都要318... QC又參差打晒風，咁就叫慶祝左呀？咁唯有自己同自己搞番個模型集會算了...
當時披上宅卡B廣告的同款巴士是PY7829，所以唔少都當呢架係PY7829，對番真車相，發覺車咀少左Calbee Jagabee 的字樣... 難怪睇上去好似怪怪地... 一些改廣告的店鋪又有機會賺到一班追求完美車迷的一筆了！今次特意用色彩繽紛的佈景影呢兩架五顏六色的PY7829、HS3639...
冒雨排隊熱烈歡迎AVBWU模型加入Wmb！呢個模雖然唔精細，同埋上層車頂好似做得扁左少少！D凳同AVW時期都無改良過，好彩車軸都改良左，不知為何總是比Carz 橙蛋順眼，所以自從上年九巴生肖改用橙蛋後，一直期待Dw呢個模可以再出！
Calbee 真車資料：
型號：Volvo B9TL Super-Intelligent Wright 12M
車牌：PY7829、車隊編號：AVBWU196
體積：長12米、闊2.52米、高4.38米
引擎：Volvo D9B-310 (EuroV)
波箱：ZF 6AP1403B8 (五前速？)
馬力：310匹？
服役年份：2011年
載客量：上層53+下層27+企位46=共126人(2+2座 / 桶型座倚)
1:76模型資料：
生產商：Drumwell？
限量：500部 (部分預留作內部發售)
推出日期：2016年3月21日
上層車尾連車牌都唔整，雖然下層有車牌，但都有少少失望！
影AVBWU，點少得281A呢？無記錯的話281A 官方單程行車時間N年前係70分鐘，而家加到79分鐘！廣源出九龍閒閒地坐你個幾鐘，很多時遇到碌車王真係米洗旨意一個鐘內落倒車！以為可以訓覺啦，但好多時返學時間有唔少家長陪同小朋友上車，個小朋友係度大叫大喊，想訓陣都不是容易！碌王多，巴士公司要正視問題例如將D碌王調去其他線！
281A 真車資料：
型號：Volvo B9TL Super-Intelligent Wright 12M
車牌：PJ5022、車隊編號：AVBWU14
體積：長12米、闊2.52米、高4.38米
引擎：Volvo D9B-310 (EuroV)
波箱：ZF 6AP1403B8 (五前速？)
馬力：310匹？
服役年份：2010年
載客量：上層53+下層27+企位46=共126人(2+2座 / 桶型座倚)
1:76模型資料：
生產商：Drumwell
限量：1000部
推出日期：2012年1月
DW原色AVBWU 車身同其他組件的金色色水上有少少差異，唔同角度反光就好明顯... 雖然真車車身都係周圍補油同埋用啡色廣告代替補油，但模型應該做番準確少少的... 就好似超人大膠一樣甩銀油自己用銀筆補油反起光上黎見倒兩截色... 所以模型做得差，苦的都係收藏家！
2011年尾睇今日九巴得知將會出富豪前衛281A，相當高興終於有樓下線推出，加上沙田區巴士線一向少出模型！不過當時巴士模型加至328 (九友價也加到273！)，而且同時又有其他模型入手最後錯過左，不久因炒風劇烈，80T價格升到6XX，因此281A 模型一直難以入手！直至早前才以二手價入手... 基本上呢架281A同Calbee AVBWU 是本人最貴的AVBWU... 自己對呢個模真係已經俾足面！即使當時龍年生肖AVBWU 也被搶購一空，始終價格仍比281A 低！因為原色車比較多人搶，一來AVBWU車型比較多人喜歡、二來適合改車，街上隨處可見，可以話總有一架AVBWU 係附近... 當然自己亦因為經常搭，唔買唔得！
車頂廣告都好靚，不過車頭手工做得麻麻，粉紅色同紫色交界位出界，自己手上又沒有相同的色筆可以美化，搞到有些美中不足！睇番真車係水平線分割！
將巴士站搬到郊外，感覺相當清新！
最近入的一批1:76 樹木，每次拎樹木出黎影相，總係會有一堆葉甩出黎，真係驚影多幾次會變成秋天，全部葉甩晒... (樹葉甩都唔緊要，頭髮千奇唔好咁樣甩...!)
Calbee 廣告顏色配搭係好靚，不過車頭部分的圖案貼得麻麻，粉紅色同紫色交界位唔對位，由於範圍細，唯自己用手頭上的顏料筆油番佢... 講QC... Dw、BC、Carz、buzes、312、M1、BF、AutoToy、My Tony... 等等有邊間的出品真係一拎上手就走得？以小弟咁多架模型之中暫時只係認為312 比較好，其中一個原因係因為內籠太簡單無扶手無獨立座倚，省卻打風問題...。但Dw的話就非常冒險，所以今次Calbee 以一手交錢一手交貨，不設驗貨的處理手法下買車，QC好壞真係靠運氣，唯一好處係假設每人有5分鐘睇貨，我排隊尾我諗凌晨先走得... 但負面諗俾左五百幾蚊而QC唔掂的話，心入面一定過唔倒自己，當然有人會選擇放出去仲賺倒少少，但個人都係想自己儲...
正如上文提到，HS3639 係出過的九巴之友車身廣告中最靚，當然不少得兩個靚廣合照啦~
真車資料：
型號：丹尼士三叉戟十二米(Alexander ALX500車身)
車牌：HS3639、車隊編號：ATR456
體積：長12米 / 闊2.5米 / 高4.4米
引擎：康明斯Cummins M11-305E21
波箱：ZF 5HP590 (五前速？)
馬力：305匹？
服役年份：1998年
載客量：上層59+下層28+41=共128人(2+2座)
1:76模型資料：
生產商：卡士工場
限量：1200部
推出日期：2016年1月
Carz 呢個ATR模由當年出白色版時已經鬧，輪廓做得唔似車頂又厚... 係ATR1再起新模先叫似樣少少... 但新模收精細價又唔抵... 坦白講本身368呢個價係應該要有精細質素...而唔係出精細就再加價囉。
補番紫色好似順眼左^^"
影HS3639，又點少得佢的已故兄弟HN9680 (1998-2016)呢？大家都係前龍運... 而家都退埋，真車無影過合照，唯有模型共聚時光。
真車資料：
型號：丹尼士三叉戟十二米(Alexander ALX500車身)
車牌：HN9680、車隊編號：ATR428
體積：長12米 / 闊2.5米 / 高4.4米
引擎：康明斯Cummins M11-305E21
波箱：ZF 5HP590 (五前速？)
馬力：305匹？
服役年份：1998年
載客量：上層59+下層28+41=共128人(2+2座)
1:76模型資料：
生產商：卡士工場
限量：1000部
推出日期：2013年4月
唔講知唔知小弟架HN9680 其實係問題車？車咀右上方甩油，唯有用近似色的筆補油，但鬼叫架車屎色，世間上何來有屎色油？所以唯有用綠色補補，當不同角度光線反光時顏色差異其實相當明顯... 可能補啡色會似少少！
其實覺得HN9680 九巴真係靠害，整個啡唔似啡綠唔似綠的屎色做底色，模型隻色更加奇怪...
時空交錯，三部不同時期的廣告車竟然在獅子山下相遇上！總算是歡笑多於唏噓！(HS3639、HN9680的廣告曾經同時存在)
兩部九友ATR的另類合照~
唔知大家有無留意，3639 隻單人側位倚背油左黑色，但油得太高，正常頭枕對落仲有少少空間先到塊黑色板！生產商好明顯未掌座位樣貌，點會錯D 咁白痴的野...
細心睇原來HN9680同HS3639 上車門對上的上層第一條窗框位置唔同... 但3639 好似做錯左...
車頂廣告各有不同！Calbee 無得輸！
為左影模型，花左成個鐘佈置場景，一些看似理所當然應該出現的物件例如樹木、遠處山嶺其實不同角度取景都需要刻意再移位，雖然相機係DC 影得不理想，但每個景都是... 有些少誠意吧！
Wmb於3月23日午夜發出嚴重盈利警告，並把財政警示提升為紅色，是自2005年Wmb 成立以來最嚴重的盈利警告！本月總開支亦已達五位數字，嚴重超越預期上限，打破了自2013年6月以來最高單月紀錄！專家警告Wmb 財政狀況嚴峻，甚至比去年9月份並沒有顯著增長，絕對需要靠意志力減少支出！！！
呢篇野前後編輯了三日，復活節咁就最後一天... 假期真係太少太少...！！！前幾日，有個郵差送份郵費不足的件上門，D人竟然無收到！而家寄張紙黎要我平日辦工時間去沙田俾錢拎番，真係激死我，我識分身嗎？！人地送件上黎又唔係要你俾幾萬蚊佢，咁都唔識得收，英文名又唔識睇、電話又唔識得打黎問下，俾D人激死啦！
