BHTXWmb: 眼鏡廠大膠邪惡迪加2001

一些碌線王，實際路程並唔長，但閒閒地坐你個幾鐘... 試過爭取時間訓覺，醒左發覺乜原來仲未入隧道... 有無搞錯！好坦白講，車長碌車成習慣，搭客損失金錢和時間！巴士公司有責任改善車長駕駛態度，計我話就解顧一些行車速度奇慢的司機最實際。行車時間長Noshow 的片段重複又重複，淨係無中生有個MV 早排已經睇左N次，識得唱埋了...

最近焦點少入：

大霧濃罩，望出窗白濛濛，還是留在家中欣賞膠品~ 自覺放假日子真係唔夠...全日都無乜做過些什麼！

掃左小學館超人力斯Vol.2... 及黑暗札基軟膠人偶。數數市面上最多 / 最易買到的超人玩具都非軟膠人偶莫屬，其中較常見的是BANDAI UHS系列(Ultra Hero Series)。除了推出的角色最齊全外，一些較多人悉識的人物每隔幾年都會轉包裝翻出，其實BANDAI 都係想一模多用，同一個模翻出，上色有少許分別，包裝轉一轉等班超人迷又再科水，根本隻公仔就係大同小異，唯一好處係之前買唔倒的話有機會再買。二十年前一隻紙盒裝人偶賣$15，十年八年前已經係近$40，一些數量少的賣過百元也不出奇！

這些軟膠公仔像真度肯定不高，QC參差，02-03年出的超人高斯軟膠人偶質感開始有改進，加上電視熱播自己又有睇，就開始左買呢款玩具...！雖然曾經有一段時間經常到賣玩具的鋪頭觀光，但其實自己又不是相當喜愛這款玩具，因為個人喜歡像真物品，汽車模型如是，科幻人物亦一樣，由於這些人偶造型死板，腹部咁多年以來都係二合一的組件、雙手又係另一組件同個膊頭格格不入，整體身形太不自然。可是出過的角色比扭蛋、盒蛋更齊，呢樣先激死！其實每逢有新超人出，市面都會有不少這些軟膠售賣，唯獨有一個超人咁耐以來市面上都係極少！

佢就係力斯！繼03年高斯受歡迎而開始買軟膠人偶後，香港06年播出的力斯(日本04年)情況就相反，市面上近乎找不到力斯的軟膠人偶... 就算後來BANDAI 以hea到爆的透明盒包裝翻出，力斯都是少數民族！2016年，即是12年後，本人仍然未買齊力斯的幾隻人偶...！

日版力斯Ultraman Nexus Opening(第二版本)

力斯登場的角色相對較其他超人多，其中描述成光之巨人影子的黑暗巨人絕對不容忽視！除了力斯有銀、紅、金、藍幾隻色之外、黑暗巨人也有浮士德、黑暗惡魔、黑暗惡魔二世、黑暗札基、超人羅亞及劇場版的The Next 兩個形態，相關的角色形態總共超過十個！今次入的呢盒黑暗札基人偶市面上極少見，並已創下本人於同款玩具最高入手價格...

黑暗巨人之所以如此吸引，是因為力斯劇集中登場的4個黑暗超人是與光之巨人相對，力斯除了要打怪獸之外還要擺脫黑暗巨人的纏繞，故此幾乎每次作戰都是處於下風... 但適能者仍堅持信念，自此黑暗超人自然成為與力斯相關必入的物品！

盒裝人偶附送的卡係最重要！細個玩爛個公仔都唔捨得掉呢張卡！BANDAI 將盒裝人偶分為EX 限定版、SP特別版... Dark Zagi 黑暗札基是EX版... 所以市面難尋... 唔係都唔洗十年先搵倒...

盒背例牌菜，有劇照一張，黑暗札基Dark Zagi 與超人羅亞Ultraman Noa 對決。

Evil Tiga 邪惡迪加2001。今次玩下呢隻2001年眼鏡廠出品Made in China 的邪惡迪加大膠！大膠超人1999年已經開始出，估唔到自己咁遲先開始玩... 大大隻拎上手真係好正，正如大大架汽車模型拎上手那種氣勢完全能感受得到！以光之巨人的收藏品黎講，有咁上下大size 而外型又做得唔差的figure 確實係少之又少，而家要追番N年前出的大膠又係高難度...$$$... Wmb 要解除盈警唔通真係遙遙無期xd？！

某日入夜時分，平靜多時的W地區再次探測到邪惡勢力出現。由於大膠體積大左，影相佔用的環境亦多左，因此難以實現同一場景有多幾隻大膠出現對立的可能性... 而今次亦都用1:76 樹木做環境，比例上配合增加真實感... 唯大膠的光面質感的確做得唔夠似真超人(光澤做得似的目前只想到Xplus、CCP figure，儘管size 比大膠細，但價錢方面卻索價6XX至1XXX不等)！以前玩光之巨人食玩就係鐘意個姿勢做得似，包括關節位衣服摺曲的效果都有做到！不過睇慣左食玩的姿勢總係覺得大膠個姿勢有少少怪，可能唔想抄食玩所以要有些變化啦...

雖然今時今日，對模型的要求已經提高，不過大膠的誠意卻是清晰可見，尤其手掌的摺曲位絕不失禮，如果我係15年前已經見倒呢個系列的話，應該會偷偷地買一隻番屋企然後N日後被家長發現，百屌成材都不足為奇！

1999年出的阿古魯額頭個位做左半透明眼... 但邪惡迪加額頭就咁油白左就算，比較求其...

現場行山人士目擊邪惡迪加出現，於是致電迪加、帝拿、梅比斯趕往現場！迪加、帝拿、梅比斯係HDM(創絕出品)食玩，所以用N scale / 1:150 樹木做環境，配合番比例增加真實感。其實食玩真係要俾個like，做透明眼之餘質感比大膠更像真，部分食玩例加高斯心口的能量燈用透明膠做而非上色了事，大膠咁大隻都係上色就算。千禧年代HD時期QC 亦比較好，但到HDM 開始QC下降，價錢又貴左... 而家直投都無出...

呢6張相，淨係環境擺設已花了45分鐘，加上現場環境細同埋腳架取角度唔靈活所以無用腳架，iso800、1/20 左右，好多張都手震左... 其實物價太高好多野都就住黎玩搞到唔夠盡慶... 正如模型貴下下都忍手唔買、鏡頭貴無錢買鏡搞到要用廢鏡影出黎的效果差等等...

力斯大膠有埋企台一塊，之前出的大膠就無的，但最唔滿意係個size 縮左水... 小弟睇左超人二十幾年，同一個比例邊隻應該高邊隻應該矮絕對騙不過小弟法眼！賣玩具果個都唔信我講，但俾我搵倒原來有人出過post 力斯時期的大膠係縮左水！！！

http://bbs.ultramanclub.com/forum.php?mod=viewthread&tid=133509

就好似BANDAI HD同HDM 盒蛋一向以來都出同一個size 的食玩，幾年前出劇場版"超決戰！貝利亞銀河帝國"的角色時突然變左HDx... 無啦啦同我縮水，大佬我玩開呢個size 的無啦啦點接受到有幾隻縮水呀！仲話細隻左但售價平左，適合小朋友收藏，仆你個街呀矮左成兩個頭先平得果少少... 所以自此HDM size 都無再出... 去到Ultraman Saga 之後斷纜... 所以銀河、勝利打後全部都無... 激死！

5/3，九巴舉辦今昔巴士展覽，終於有機會登上三部古董巴士！是繼坦克蘭後，再次登上熱狗車箱的珍貴惜機會！可惜場地太細，人數又太多，排隊都佔了大部分時間，不少參觀人士坦言是忍屎忍尿等候... 原本4點完場，最後5點半才完，由於公務繁忙無緣一睹批車離場... 一去一返，出門超過十四個鐘，近尾班船回到尖沙咀！回到展覽現場只見得番堆欄杆，車就當然一早走晒...

夜深多數辦公室都熄燈為安，所以影維河兩岸景色難度高！加上鏡頭又無防震，真糟糕！船航行時亦會搖晃不定，要有清晰照片真係難上加難！iso1600 閉氣極限博到盡！燈火鼎盛的維河平日見得多，冷靜的維河卻使人感到孤寂，海濱的人全部都是一對對，只有自己是一個人，還是早點登上281A 訓覺吧！

良心票價過海，曾經想買晒市面上仲有得賣的天星小輪模型返屋企，但念頭轉瞬即逝，一來不滿Carz / 80T出的1:230天星小輪模型有不少明顯錯處、二來一隻1:230 實物唔夠一隻手大小的船賣三百幾蚊就實在偏貴！錯模唔再講，粗糙及像真度不足其實賣$198-$268 呢個範圍先叫合理，但可惜只有一家生產別無他選，就像樓下條281A一樣，同天星小輪係"無可能唔買"的，好多時係存在感情、意義才購買。09年一部原色1:230天星小輪索價$328，這些都可以不放在眼內，唯獨有一部最想買！就是髹上香港飛龍圖案的夜星號，可惜索價$350... 而且已經售馨多時！每次經過碼頭都想爆開個櫃拎走架夜星號，反正擺個櫃入面都封左1mm 厚塵，又無乜人留意不如做善事俾左我啦！