BHTXWmb: 4月 2021

2021年4月30日星期五

英雄勇像景品 - 蜘蛛俠 BANDAI Banpresto Marvel Spider-Man スパイダーマン (Japanese TV Series)

自從BANDAI banpresto 眼鏡廠早兩個星期出左超人迪加爆裂型及天空型英雄勇像之後，開始留意多左呢個系列，發覺原來眼鏡廠係今年一月出左一隻蜘蛛俠英雄勇像，曾經何時小弟都幾鐘意蜘蛛俠，仲記得唔知邊套片蜘蛛俠係已故紐約世界貿易中心雙子塔中間織過蜘蛛網欄截直昇機的經典場面，但其實我都唔知日本早係七十年代已經有蜘蛛俠... 所以小弟近來都買左一隻勇像當作支持！一百蚊的景品質素如何？下面會分享一下

先分享開箱片：

https://youtu.be/_jwgyJkIdZM

今次蜘蛛俠同以前的HD盒蛋組裝方式一樣，都係分幾件，砌埋就成形，而且分體件剛好係分色位，砌起唔太覺有條坑~

開箱往往是緊張時刻，尤其係封閉式見唔倒入面隻公仔係咩狀況的盲盒，就更加係要講運氣，因為開出黎靚既固然好，但萬一抽中有問題的次貨就真係要硬食... 以下是圖片及文字分享：

知道有呢隻蜘蛛俠之後，已經周圍搵邊度有得賣，英雄勇像"東映蜘蛛人"終於成為自己第一隻蜘蛛俠玩具！曾經見過70蚊就有交易，但我用左90蚊買，其實不多於100蚊我已經覺得可以即買，唔洗諗！因為唔少商店都賣緊150-160... 幾乎所有英雄勇像出左唔洗幾耐都升晒價...

首先，見個盒上面d圖影到隻真蜘蛛俠十足十真人咁靚，好自然期待入面隻公仔係咪都做得好似？但開盒後發覺上色真係好麻麻，所以都明白點解景品係賣90-100蚊...

其實我個人比較注重個模/人形做得似唔似多過上色係咪好好，當然個模靚，上色又精確的話一定最好啦，但因為作為一隻景品，價錢較為大眾，呢兩方面唔會做到完美，要模靚上色好一定賣好貴，結果一隻公仔如果賣得貴，我又唔會買，坦白講如果唔睇上色的話，英雄勇像景品的外型真係做得好似，人物的招牌動作、身形比例同埋玩具大小我都好滿意~

網圖

先搵番少少蜘蛛俠的資料，蜘蛛人(原題：スパイダーマン)是1978年至1979年間，在東京電視台播出的特攝劇集，全41集。此作品使用了Marvel(驚奇漫畫)版蜘蛛人的角色，加上東映TV原創的故事和設定，並坐上巨大機器人上戰鬥。從此「英雄坐上機器人和巨大化後的怪人戰鬥」這動作都被繼承到往後的超級戰隊系列中。

而感覺上自從日本鹹蛋超人在六十年代面世後，巨大化的戰鬥都能給人一種好感，讓人很容易投入戰鬥的場面，鹹蛋超人其實係叫光之巨人，顧名思義"巨人"就是鹹超的特色/元素，確實當我愛上鹹蛋超人後，就會覺得無巨大化功能的幪面超人唔夠吸引！

今次蜘蛛俠的姿勢就是最經典的三點著地登場一刻~

不過隻手其實掂唔倒地面

上色方面，藍紅分色無大問題，但唔知係咪舊照片偏色問題，真蜘蛛俠的顏色似係橙色+深藍，勇像呢隻藍色唔夠深，當然最大問題係黑色線，滲線參差不齊，有d黑線斷左，同埋亦都多左好多黑色係黑線周圍，心諗咩事，上網睇番其他人開箱，都係一模一樣，姐係唔係個別問題，遠睇隻蜘蛛俠做到好似畫出黎，多餘的黑色唔知係咪想加強陰影立體效果，滲線中斷就真係有些難以接受，幸好每條線都有做到坑紋，有立體效果，就算滲線中斷，都有番條線的感覺，但第一眼望上去，係有d跌眼鏡，點會畫到咁差... 所以明點解賣100蚊... 雖然老實講，除左呢隻英雄勇像，又真係諗唔到有邊款玩具個模做得有咁似，但大家望完佢個盒隻野影到咁鬼靚，每條黑線都咁幼細，見倒實物係咪都有d 想爆粗??

對眼都畫得幾似，眼角黑線都跟得幾足，雙目尚算有神！

心口的蜘蛛圖案清晰可見

背面都有紅色蜘蛛圖案，腰間、腿部的衣服摺曲位都幾有真實感~

蜘蛛俠登場姿勢係幾型，但登場即代表前方有敵人，想不到竟然係正義的朋友，超人迪加！

90蚊，抵玩的！"景品"做場景一流！

對於蜘蛛俠的印象不多，現在只能在youtube 找到當年foxy 下載過的一小段蜘蛛俠在世貿大樓結蜘蛛網一幕，但查看留言，我懷疑片入面的年份的確是錯的，因為世貿係2001年已經倒塌，無可能2008年先有呢段片！

https://www.youtube.com/watch?v=gy8JDRLDYic

最後世貿大樓一幕都被刪掉，真可惜！

騙徒呂中舜、陳志杰

https://youtu.be/1zhmozDrkME

2021年4月18日星期日

路過探訪龍運/九巴新車及近期少入(廠外攝)

這次分享一下龍運同九巴的E500MMC、Volvo B8L 新車陣，不過龍運的新車出牌無期，同一堆模型/一堆死車感覺分別不大！

近期雖然經常被放無薪假，但發覺其實時間都唔係幾夠，包括BHTXWmb fb page、Youtube channel同埋呢個blog都未update 得切，另外NFS Hot Pursuit Remastered 的警察賽事一場都未玩過，而且好多模型本來打算開箱、影相，至今還是原封不動... 看來無薪假放得多只會使人頹廢，或是我的人生太失敗了！

發顛銀行個邊因為自己有員工確診，限制番工人數，本人亦被無限期停工，本來唔係搞d咁既野，我都想做到個project 完為止，而家開始番新工，不過就遠左好多，觀塘同環保大道塞車嚴重，九巴98觀塘班次嚴重不準時，所以交通時間同我番中環(281A轉船)差不多...

Wmb 由即日起(04/2021)發出盈利警告！成為本年度首個收入警示，本月開支預計會再創新高，儘管過去幾個月已經放售了超過六千蚊模型，但4月的第二期交稅日子迫近眼前，交完4千幾又再4千幾的額外稅款根本就將賣模型得來的現金一掃而空，目前生活非常困苦！唔好同我講話係因為賺得多先至要交咁多呢d廢話！本人宣佈即日起謝絕一切外出飯聚等等消費活動！亦呼籲各位未還錢的人士盡快還錢！

除了收入下降，交通開支亦上升，復活節期間四間巴士公司大幅度增加車費，其實自從政府推出搭400蚊車以外的可獲25%津貼，就預左交通工具會趁機加價，因為一定程度上大家的交通開支在津貼下其實係低左，交通費負擔重已不是有力的反對理由，所以各交通營辦商的加價幅度一定更加進取，而事實亦都証明無講錯，政府政策不當引致疫情爆發搞到環境咁差仲竟然全數批准加價真心ON9！受害的咪又係市民...

先分享近期少入~

有2部1:43 Hiace、1:43 VW大眾巴士金屬生"金秀"版及近期復活節熱賣的1:43 巴士站牌，是次入手以1:43為主！

話說，今次係第一次有1:43 巴士物品以盲盒方式推出，即是抄襲卡通人物角色出玩具的手法，倒如永橙早前推出過的Line Friends 叢林熊大系列及旅行系列，而最乞人憎的係買一套都唔會齊倒13款，因為一盒只有12款，其中一款為隱藏版，完全將永橙出Line Friends公仔的衰野抄到十足十！開箱分享已上傳到BHTXWmb youtube channel, 詳情下次再分享~

現在71的賣得7788，九巴popup的亦只有散抽，完整一盒難求？

另外有1:400 港龍航空A330 B-HLJ，除了因為港龍已收皮，還是空中巴士第一架A330-300客機！非常值得收藏！

另外，有上年11月已訂貨的英雄勇像，超人迪加！今個星期終於到貨！

轉眼間，當年的超人迪加已經播出25週年，迪加亦都係第一個可以變幾種色的超人~

英雄勇像係以舊時BANDAI 出的4寸半高超人盒蛋造型為藍本，造型一流！不過BANDAI 的缺點可以話qc 差，上色比較求其，當然同出面賣成千蚊的，係有一些距離，如果以一百蚊的水平，勇像真係無唔買的理由！你諗下，十幾年前出盒蛋就幾十蚊一隻，但如果而家同一個模翻出，肯定唔只幾十蚊了... 小弟非常推介大家買英雄勇像！

最後，係Volvo B8L 98線~ 估唔到B8L出左咁多次模型都仲咁搶手，本來CS賣晒都諗住放棄的了，點知鍾站長竟然專登入去Vcity 代購，實在無言感激！如果98係出1/43 就好啦... 堅唔信呢款車咁受歡迎，會唔出1/43！？

https://www.youtube.com/watch?v=CEvAf9XMaxQ

上個月，本來泊係屯門南的一批九巴/龍運新車已經改泊大埔，某日在廠外一攝~

預計呢批龍運都係會擺番一年半載，而且留意到呢堆龍運車只係普通版，即是同九巴一樣的座椅款式，出唔倒牌或者俾會過埋九巴？反正咁多新車，大可以將ATE、ATEE、ATEU、AVBE、AVW、AVBW、AVBWU 等等提早退役，用新車仲好，以前都唔係未試過退提早退舊車，最記得係EH-EK牌批熱狗，雖然數目唔多，但用得個14年就退，就係為左俾當年批金巴出牌...，而家堆殘舊金巴都係時候要上路，俾紅巴出場！

屯門南時的新車

ADL E500MMC 12.8米玻璃梯

Volvo B8L 12.8米玻璃梯

上年個幾架B8L 12米未出牌先出模型的情況會否再次出現在呢堆車身上呢？如果係都好喎，我個人覺得全橙色係靚過早幾年個d 抽油煙機... 何況1/43的E500MMC 12.8米又已經出左一款紅色九巴，出埋1/43龍運都唔錯！本人表示支持！但坦白講，龍運群腳個LWB 字真係好樣衰，如果變番橙色會順眼好多！