BHTXWmb: 8月 2015

先分享近月少入~

主要係bc 的模型

當然唔少得係89C，QC方面都不是太好，紅色油常見出界，不過一直以黎沙田區的巴士路線模型都係出得太少，雖然地理位置上形容到沙田是新界連接九龍港島那麼重要的新市鎮，但模型卻屈指可數！

一直好欣賞bc出的小巴及貨車，不過對呢類車興趣不及巴士，所以少入便足夠！

官方車方面，經考慮後只入ATR(601)一部！本來去80T 係想買埋ATS 264M，不過QC 難以接受，601呢部都幾乎是放棄狀態，不過死心不息唔想空手而回再睇多幾部，叫做入番部似樣少少、內籠企理少少的。比起身邊其他模型收藏家，我自己的要求已經好低，無大問題已經係三個動作：收貨、科水、走人！兩款型號相同只是長度有別的車一齊出模型，大家難免會有所比較，但始終售價高昂，要部12米總比10.6米的較為值回票價，而且264M 果部座位底部竟然油左黑色，是嚴重出錯難以接受！坦白講既然收得人精細版的價錢，無理由會連上色都出得錯，真係好差！601果部其實都好免強接受，因為同ATENU 比，ATENU 的精細度確係高過601，最起碼做倒座位凳腳、座位手挽位都有，反而601 呢部就無的、倚背的黑色又油得求其，十部有八部內籠都打風，叫人點買先得假！雖然呢架601 一年前已經整左，或者你可以話作為初代精細版的水平係咁上下，但可能都好似其他買家話齋，係生產商問題... 俾人睇倒的係誠意欠奉...！

不少得VC1 是今年中巴全面退出巴士服務的主角之一。不過QC都係一般，唔易揀...

還有bc 利蘭珍寶，86A及102，咁正好難忍手囉。86A 是沙田區路線又係早幾年自己為左坐熱狗專登去坐86A，而熱狗過海線又係經典，照買！我自己對平頂寶、圓頂寶個模印象都幾好，咁多年前的模今日再出，唔會好似Buzes 的利蘭咁樣每次出都要鬧！今時今日仲出咁低質素的玩具收人模型價錢絕對係浪費緊地球的資源...

2015暑假又完，時間又過了一年，一年前暑假完結前與兩位行山專家決心天未光就登上大帽山看日出，不過完全食左白果，看不見晨曦，只看見白霧一片！

今年暑假特別短，早上獅隧的塞車情況略能反映。少左學生番學好似上年7、8月坐281A 經獅隧好暢通；今年暢通的日子少左，上星期開始又出現擠塞，加上281A 碌王多，想話坐遲一班車都唔得！

2014年8月30日，睡眠時間：深夜凌晨12時30分。

2014年8月31日，起床時間：凌晨3時，一次大帽山We are Model Bus 體驗開始。

雖然係想繼續訓，但為趕及5點半的日出，吃一客出前一丁便要出發，前一晚曾下雨，沿車路上隱約看見大帽山山頂全是雲霧...。

在大帽山觀景台看見的元朗平原，時間已是05:30，開始天光，而且風勢非常強勁，即使有腳架都一樣吹到震！

上山時，最前面果個係我，但氣力唔及同行的兩位師兄，很快已經被拋離...

沿車路上，開始天光，幾位師兄都半行半跑狀態，以免錯過日出的光芒，亦沿路都見其他行家在路邊札營，起初還以為有機會看見日出。不過離開停車場不久已進入雲霧，全身都被濕氣弄得冰冷。

結果去到禁區前，仍然在雲霧之內，但大風不斷吹來，感覺雲霧有時被吹得稀薄了，開始感受到有陽光照射，相信已接近雲霧的頂端，但始終都無見到陽光升起的場面！最後接受食白果的現實，失望而回，全身衣服、頭髮都濕透加上山頂氣溫低，終於明白為何八月份凌晨上大帽山要著長衫長褲，因為趕路時滿頭大汗，但停下來立刻感到寒冷。

幾乎凍到震！呢張相唔記得係邊個影，解像度好低，想搵番原相留為紀念！

上山時我手抽紙袋，入面有兩架巴士模型，但沿路進入潮濕的雲霧之中，紙袋已經溶爛了。行大帽山一定諗起九巴條51 線，所以要拎都城嘉慕(MCW)模型出黎應一應景，事關都城嘉慕(MCW)是首款能夠行走大帽山的雙層巴士，到目前為止是唯一一款！除了大帽山，九巴也安排都城嘉慕行走東九龍一些地勢較高地方的路線，因此都城嘉慕有爬山皇之稱。不過全數都城嘉慕已在2007年退役，現在只能從舊片、模型身上重溫他們的風采。

九巴51號線於1998年10月改為空調巴士服務，熱狗雙層巴士亦絕跡大帽山。為應付荃錦公路漫長陡斜的環境，過去只有康明斯引擎的MCW Metrobus 9.7米才能應付自如！九巴最後8輛MCW(M81-M88)一同裝上Cummis LT10 Aftercooler引擎，最大馬力可達282匹，另外扭力亦高達858lbft/1300rpm，配以Voith D864G 4前速波箱及手動減速器，這一切都是特別為此線而設，但後來呢批巴士懷疑因損耗調回市區行走，最後亦提早退役。

兩部MCW 9.7米正在上山^^

追得好貼喎，如果九巴服務有咁密班次就唔怕送車尾了~

模型攝影專家從不同角度拍攝情景...

以康明斯引擎的動力，可爬行斜度達22.5度的斜路，因此行走1:10 斜坡即使是滿座情況下仍能輕鬆應付！而安裝在MCW 9.7米的282匹強大馬力，根據車長描述上斜甚比私家車更快。

兩部雙層巴士一同在大帽山這個場面相信日常再難以看見，香港的馬路應是左上右落，呢兩架車似乎是越過了對面行車線！

經過Wmb 車長的指導之後，兩部車終於駛回正確的行車線！

睇番當片M仔上大帽山的片段，巴士可以跟住前面車的車尾無被放甩，最可惜係批車提早退役，無機會一嘗強大馬力上大帽山的感覺！如果今時今日51 仍然有熱狗的話，我諗收二十蚊一程我都會搭，近年51 好似改埋做循環線，不過可惜的係近年F牌-G牌的 Dennis Dart 都退埋，無咩吸引我專登去遊呢條線了。

沿路返回大帽山觀景台

雖然已日出，氣溫回升，但高空仍被雲霧濃罩。右方是雞公嶺，海拔585米。

青馬大橋

觀音山，海拔546米

西鐵架空橋樑及錦田河、凹頭。聰明的你一定知道為何要拍這個方向！可惜相機焦距有限，未能顯示河邊的風景！

峻巒發展項目第一期。前方是長春新村，這張照片能看見一部前11K掛牌！我諗興建中的地盤一年內不少於十個！實在不願看見本來的大自然變晒做可惡的屏風樓！為富不仁的大財團死不足昔，而家搭281A 經獅隧一望向大圍就見倒"名城"呢排屏風樓...

大帽山郊野公園停車場

錦田河

深圳灣大橋。遠處是大南山，海拔336米。

從大帽山上看元朗平原，所有屋都變得很細，就好似模型一樣。每一架廢車都有自己的位置！

我不會要求留意圖中右下方，反而要知道左邊是高鐵大白象的地盤！

大帽山郊野公園觀景台。有時我們行山觀看遠處環物，有些常識我們是要預先了解，一個正常人身高1.7米，在水平面上計算，可大約看見4.7公里遠的地平線。這裡高海拔700米，如是超高能見度日子，這個高度可望見身處位置前方95公里遠的地平線，亦即簡單講法是方圓95公里內的景物！可從地圖上看一看如果在觀景台伸延95公里遠，可達順德、番禺、東莞。不過也受很多因素影響，因為說的是地平線，如前方有高山、大廈阻檔，則不可能看到背後的景物，向順德、番禺方向，前方便有深圳大南山阻擋！

后海灣及遠處的大南山

建築中 YOHO Town，又是個右屎森林，睇番十幾年前的元朗交通工具照片，不易發覺背景多是個空曠，少有高樓大廈的...

錦上路

細心觀看山下風景，也會看見一些色彩較特別的物體，但由於相機焦距不足，只能做到這樣了...

元朗平原

后海灣及深圳灣公園，暫時未能確定圖中屹立的是什麼大廈！根據外觀判斷似是長富中心...

是日雲層較低，連深圳賽格廣場也被遮檔

都城嘉慕非空調巴士曾經登上海拔490米高的荃錦公路(相當於一幢環球貿易廣場總高)，最高點是全港最高的巴士路線。不過對於登上大帽山禁區以下的海拔915米，只能由模型實現出來！

興建紐約世貿中心遇到的問題，行山也必然會出現，就是高地風勢超強，在山頂空曠的位置拍攝模型，攝影師本身都被大風吹到站立不穩，何況係模型？令我印象最深的係這時猛烈強風從背後吹來，本人正打算將模型拿下，就係呢個時候其中一部模型被吹走，幸好左手及時按實模型，否則成部車應該會吹落400米下的荃錦公路山腳，碎粉山中！