繼續我的少入分享！
六月過得不容易，但而家望番轉頭，又過左一個月，買車俾自己一點也不過份~！錢不是問題，問題反而是唔夠位擺咁多車，目前4 個廠房已接近滿載，數數只能容納多30部巴士左右，Wmb 又需調整泊車方式以應付新車到廠問題...！
有正常車有問題車，都係追番之前出左但未買的車為主，包括3N1A(問題車)、ATR42C/46X、AVBWS1、飛龍16、40。其中ATR42C 月初去某80T 買果陣得番兩部，上星期聽聞都已經埋價了(未証實)... 之前好似試過特價$198... 不過果陣竟然無買到...
ATR46X/42C 入埋，除左新城的丹尼士三叉戟12米無買之外，九巴的好似已經唔覺唔覺買齊晒，起初出小飛俠果陣已經覺得呢個模輪廓唔似真車，車頭做唔倒神緒而且分體模又唔係咁靚，本來係見小飛俠廣告幾靚不妨入手，而家呢批膠牌ATR 陸續而經有17年半車齡，2015年底亦開始退役，始終都係想買番部模型留念...
不知不覺，Jumpwell AVBWU 很可能已停產，生肖、復古廣告車一向有買，但金色的281A、307、268B 竟然無買，所以決心追番樓下條281A！！！今次唔算非常貴地入一部無証的問題車玩下先... 唉咁的價錢只能買倒問題車...
係廣源搭左巴士咁多年，自從2010年開始就經常坐281A 往返油麻地，那時281A 開始用AVBWU 做掛牌取代AVW，果陣好高興有AVBWU，今日廠入面終於都叫做有 49X 281A 巴士模型！好像放下了一件心事一樣^^" 當年見Jumpwell 281A 內籠D凳做得差無即刻買，點知就俾人掃晒，情況同PJ5187 龍年一樣，而家更因為2010版AVBWU 模型實在太貴，無法入手所以無2010 版實在有點兒失落吧。很大情度上都要怪責那些同一架車買幾架以上果D 人，買晒D貨！無良80T 仲加到598-698... 大佬叫人點買呀！
不知不覺，同熱狗巴士生涯一樣(1921-2012)的中華巴士係香港行左91年(1924-2015)，日前終於係下午於北角開出最後一班中巴，同1998年8月31日一樣，都是於北角開出最後一架中巴！只能怪自己失策，無兩邊走的經驗，影唔倒出廠想提早去番柴灣廠影3架車番廠，但竟然唔係搭的士，最終快唔過佢收車，結果無緣見証到最後一班中巴開出同時亦影唔倒佢地番廠，兩邊都TOTAL LOST！仲唔夠時間番觀塘拎免費飛添... 都唔知去黎做乜，乜相都影唔倒，又晒又熱、車又搭唔倒、飛又拎唔倒，太多人走黎走去又阻住車頭變左好多本來想影的角度現場都影唔倒... 所以2015-6-30 日係當黑的一天！...... 諗番轉頭浪費了一天假期，又無左幾條魚真係想喊......
中巴Dennis Dart 車箱，感覺上非常乾淨新鮮，想不到會有二十年車齡！或者大家都有問號點解中巴突然結束埋最後呢條接駁巴士線? 有些報導指政府要求2015年底前淘汰所有未合符環保標準的商用車，以目前只開一條線的中巴換新車的機會近乎0，所以乾脆結束服務！如果真係因為換車資助計劃導致中巴消失，我諗呢個咁的換車計劃真係累死左好多香港值得保留的商用車... 包括城巴最後一部勝利二型、AEC 古董巴士、眾利蘭奧林比安、新城訓練利蘭奧林比安、九巴眾訓練利蘭奧林比安、大巴士眾前中巴丹尼士巴士及最後4部中華巴士... 唔排除政府日後再推換車，所有歐盟早期的環保巴士都要提早say goodbye... 講到尾民間保留退役巴士確實意義重大！
由5月到而家，應該話4月底開始，好榮幸被選中做某週年紀念project，雖然瘋狂超工帶來滿意的收入，也創下自2010年9月以來最高工時紀錄！但背後亦有辛酸失落、損失也很多，例如中巴結束前的星期六本來應該可以影車，事關最後一日人數太多根本無得影... 然而分身無霞只能係網頁上睇住人地影，自己就顯得更失落。而慶祝光之巨人50週年的展覽舉行日子又正好與上班時間相撞... 分身無霞。年初打算端午節影龍舟但竟然到左端午節當日坐車見倒龍舟競渡仲要九巴83K 碌車、改路，險遲到才醒起節日的來臨。一些羽毛球谷的富有份子常買新球拍約打波，但呢D日子又人在江湖。6月出現了幾天高能見度週末、週日，本來是行山好時機，卻人在江湖，近幾天究極透徹的高能見度似乎又無左了，莫非又明年請早...??
會展連續的保安十七小時，形容好似做保安咁朝7晚24，凌晨無車番就搭的士，百七蚊的士票價，番到屋企一點幾，極速沖涼2點前上床睡覺，5點起身，飛N182 出灣仔，爭取車上多睡半小時... 原來5點幾廣源巴士總站已經有唔少人等搭281A、49X，我5點起身好似突然間變左唔算早咁！據觀察5:45 的281A 是平時見7:50 果架... 姐係極早時間 2個鐘可以一轉！但繁忙時間遇上碌王，3個鐘都番唔倒黎啦。其餘唔研究，總之我準時6:59分進入到達會展指定位置！就這樣過了5天，好像頭髮也掉了不少，就算之後正常番作息時間，又補到多少？
灣仔對開正進行填海工程，維港終有一天變成維河，甚至維渠！建繞道又要建北港島鐵路大白象... 錢就係咁樣倒落海而不是派到市民手上了。河面有一隻天星小輪等7:20 開首班來往灣仔至尖沙咀的渡輪！可惜服務時間那麼遲，否則可搭船過海...
橋上大量炒家放售，價錢普遍是本來的一倍，不過我就無興趣，Wmb 發行的話或者會有興趣！
凌晨時份，等運輸收走物資，第二朝已經有另一個活動，香港真係繁榮！由第一天到落幕收場，像見証了一個大型展覽的生與死。最難忘當然係見倒鹹魚爆晒粗叫報警果D啦，有花生食就算好眼訓都醒神起來^^"
發現駱克道的士站有間潮城魚蛋粉、潮城粥麵！(諗起一位食客的評價：潮城魚蛋粉食唔飽的)
諗番下，好耐都無食麥當勞食得咁開心，派優惠卷，有次自己眼大睇過龍，拎左張過期的，結果蝕左5蚊俾佢！
芝士薯波唔錯，一個餐對我黎講份量太少，又貴，本人一向唔主張靠飲汽水填滿肚子！寧願杯汽水飲一半掉左佢都唔想因為唔夠食飲汽水飲飽，送5粒薯波感覺上抵左又夠食！
係六月初狂瘋超工期間，又有一位OT 戰友辭職，其實每次有同事辭職都相當感觸，可能做D野實在太狂瘋太難忘，這樣令我更加回味5、6月的日子~！人生經歷的苦與樂當然想樂的多苦的少，但兩者坦白講都係錢買不到。
反對港鐵加價！反對港鐵加價！兩鐵合併後，港鐵已是第6次加價，但港鐵在2014 年賺超過150億，可惜仍於2015年6月21日起大幅度加價4.3%，當然這個4.3%是平均加幅，可能是比九巴票價加價更漂亮的加權平均，事關個別車站 / 某些車程的票價加幅最高高達14.28%！完全是不合理的加價行動！根據票價自動加減機制，Wmb 也可即時起按相同百分比上調Wmb 票價！
長短途線調整後票價如下，即日起實施：
建議港鐵憑良心去服務香港市民，年賺過百億仍年年加價，又未能提供0故障的鐵路服務，加上提供埋晒一些小恩小惠的優惠實際上用得著的機會唔高。幾條興建中的鐵路大白象又一遲再遲，報造價又成日呃住先，今日講850億，分分鐘半年後又話要900億，以每公里造價計算廣深港高鐵分分鐘係全宇宙造價最貴的鐵路，而且前排話起機場第三跑道的時候都已表明高鐵的競爭力有限，與其起埋晒呢D大白象工程，真係派錢俾每位香港人更實際有用！
