路過柴灣廠

最近係Noshow 電視見倒挾持的MV，開頭無留意，一望電視就見倒個男人的大頭，心諗咩事？香左？？

呢排夜晚番屋企都係坐巴士，仲要係坐最慢果條線乘機遊車河，雖然明明已經肚餓，但反而好投入坐長途車的旅程！

第二次番工搭的士，搭左我109蚊！最初收到信息係2點，後來收到通知係1點，但我印象已經記住2點，結果lunch 果陣無意中睇倒原來寫住1點... 即刻食埋兩啖飯仆去搭的士，仲要的士站排長龍，睇住個咪標每200米跳$1.6... 好似被搶錢咁... 個的士佬又開得慢... 激死！過隧道最唔抵，要俾隧道費仲要計里數！

九、龍運、新城都越黎越多E50D，不經不覺服務了十七年多的丹尼士三叉戟十二米冷氣巴陸續退役，其實次次坐新巴都鐘意坐呢款車，三波高轉讓人感覺狂野！

還有一輛退役富豪奧林匹克十一米人力車。

好少去港島東，發覺原來無過海巴士去杏花村的，不過都正想行去柴灣望下批大巴士同中巴，再坐106、82X。

不知不覺，Big Bus全部丹尼士禿鷹同最後一部多明尼加都退晒了，多謝政府的換車資助計劃！令所有有歷史價值的巴士都在2015年底前在市面上消失！這幾部禿鷹無得再係香港行走，但會運去外國繼續服務，都係一件好事黎，從廠外可見巴士已安裝了右邊車門！可惜未能近距離一睹裝上右門的禿鷹風采！

小多... 已經無得再坐，上次遊河老實講未影夠同埋未坐夠，遊河主辦單位安排失當，總要讓人留下遺憾！雖然路過得個望字，但都要珍惜可以遠望住呢批車沉睡的時光...

右手邊果架禿鷹無左Big Bus 字樣，重新翻左油？

從來都未影過同埋未見過全相的HK104... 

HK104 及已退役丹尼士飛鏢CX

VC1... 受政府強制淘汰歐盟四型以前商用車的換車資助計劃下，呢幾部CX同VC1 相信都是難逃拆毀的呃運... 為環保、為改空氣污染而制訂出這些失當、無用的廢政策，不治標也不治本，其實人類對地球都做成不少破壞，又唔見政府話要殺咁幾百萬人改善生態？？？

中巴巴士廠，2015年7月，中巴所有巴士路線結束營運，對小弟呢個新界人黎講，少接觸中巴，想坐多D的時候又話要取消路線、引致最後幾部中巴提早退役，實在非常可惜！雖然未至於是人去樓空，但殘舊的車廠外貌卻給人一種滄桑感覺...

2015年6月30日中巴最後一天服務：

中環海濱整左個巨型平治汽車logo，唔知搞乜？？天朗氣清坐船穿越維河心曠神怡，其實如果唔係趕時間或者太早太夜，本人首選都是坐天星小輪下層，這樣就已經感受了一個世界上五十個人生必到的景點。

每年十一月？天星小輪都會為男性健康做宣傳，在船身賣廣告，但只有一個鬍鬚圖形沒有文字。

已髹上香港國際都會全船身廣告的夜星號 Night Star，1963年投入服務，至今服務香港已超過半世紀！

遠望大興土木數十年的安達臣道，一幢幢住宅已越起越高，就黎連大上托都蓋過了... 單是上圖，已有過百座建築物在照片內，香港俾人的感覺就係太擠迫！大廈又高又擠迫、地鐵又貴又迫，連新的巴士上層都加多一排座位，令凳與凳的距離窄左，如果有試過坐所謂高載的AVBWU、ATENU上層窗口位，要落車的話一定會撞倒隔離果條友！

我真係好討厭地鐵沿線起咁多密質質的樓，上圖是柯士旬站位置，從中環海濱望過去幾乎已看不見獅子山！這些阻檔景觀的樓炸晒佢我都唔會覺得可惜！

尖沙咀碼頭

夜星號遠離碼頭，背後是興建中香港洲際酒店，這個位置前身應是新世界中心，數年前清拆重建。香港洲際酒店聽聞是一幢63層高的摩天大廈，它的高度雖然不會打破IFC2、ICC，但以目前的高度判斷，落成後對阻檔維河景觀也有很大影響！

不到十分鐘，夜星號已到達尖沙咀碼頭... 其實尖中距離幾乎縮短左一半，理論上天星小輪係咪應該下調票價？？

日星號Solar Star，1958年投入服務。

這個角度看，兩首船似乎迎頭相撞！

剛從尖沙咀碼頭開往灣仔的午星號 Meridian Star，1958年投入服務。午星號船長33米，與其他天星小輪最大分別是下層建了一個廁所，因此下層座位數量相對較少。

每次到達碼頭，都會望著船員用繩索固定船隻，每次都剛剛好跳板對正碼頭登陸入口。

遠望東九龍，背景是成千上萬建築物。你覺得壯觀？第一見望都係幾壯觀的，但我寧願還原番做幾十年前個景！無高樓大廈，九龍群山山脊線一覽無遺！

回程中的夜星號

藍田

觀塘

興建中香港洲際酒店... 後悔上次上大上托上唔到山頂，而家已經被香港洲際酒店阻礙了維河景觀... 

天星維港遊掛牌：輝星號 Shining Star，1964年投入服務。2003年改為天星維港遊專用船，遊客可從開蓬的上層欣賞四周風景。

晨星號 Day Star，1964年投入服務！

2014年的日星號。想想，維河不能缺少這些欖核仔，否則維河便成一條死河。

不到十分鐘船程，已到達尖沙咀碼頭，如果認真欣賞風景，一程船的時間真係唔夠，應該從地圖上將香港島向南拉一拉，使維河回復為維港！

再見了，前中巴丹尼士禿鷹空調十一米及前雅高巴士多明尼加開蓬巴士！

KA4691，1985年出廠，已於2015年9月退役... 

剛成為大巴士一份子時的丹尼士禿鷹，NR9783 中巴/新巴時期車牌是EW726 (DA28)，完全無影過！1998年中巴失去專營權由新巴購入，2008年再被大巴士購入，十一米巨龍/禿鷹載客量比兩軸巴士高，而操控性能較十二米巴士更理想，行車表現可謂四平八穩，過往多被安排行走需爬斜的路線。 很可惜今年政府推出換車資助計劃，陸續強制淘汰歐盟四型以前的商用車，由於十一米巨龍/禿鷹是九十年代初的出品，當時未實施使用歐盟環保引擎排放的巴士，因此所有十一米禿鷹都無法在香港繼續行走... 真係非常可惜！聽聞大巴士呢幾部十一米禿鷹將會運往美國行走新開的路線，好希望呢批咁好的車可以係另一個地方繼續行走，唔係香港唔緊要，因為留係香港只有一個下場：五馬分屍！