田螺車都算係市面上外型較特別的車種, 有無人好似我咁傻細個見倒田螺車攪拌罐旋轉會眼定定望住個罐自轉足一圈先甘心? 好多時攪拌罐上有字/圖案, 罐體轉了半圈原先面向自己的圖案會消失, 轉足一圈後圖案再次出現! 消失、出現、消失、出現不知不覺看著罐體已經轉了十幾圈, 試問世間上竟然有這様奇妙的車種?? 直至早幾年去過四順打工, 新清水灣道通往安達臣石礦場的道路上常見田螺車上上落落, 就開始係沿路搵拍攝佢地的位置, 其實唔係專登影佢地, 大多數係掃巴士時順便掃埋田螺車, 可惜近年強行淘汰舊車, 曾為建設香港出不少力的田螺車好多不知不覺消失了... 影到的多數係較新的田螺車... 舊車被消失亦為引入田螺車模型多了一種黑暗吸引力!(本文冗長, 可按上一頁離開)
分享少少早幾年拍攝的田螺車:
大灰罐
個人比較鐘意日野Hino田螺車, 因為個頭望落有懷舊感, 而且個人認為影田螺車最好用135mm 以上焦距(越長越好), 因為田螺車外型係拖頭(前半部)矮、罐體(後半部)高, 如果短鏡影出來就只會變成拖頭大罐體小, 因為近景大遠景小原理; 長鏡影出來拖頭矮罐體高就正常了。
市面上可以選擇既中港款式田螺車Cement Mixer / Concrete Mixer 模型唔多, 以1:76 為例只有bc 2011年出既紅白綠三款, 但感覺有少少玩具feel, 如果要更像真的就唯有玩體積大少少買大陸公司出既1:24 田螺車, 但價格相差可以好大, 由四百至七百甚至過千元不等, 同時1:24 已經係最大, so far 無聽過有1:18田螺車！有玩開車模既朋友討論番上次1:24 中巴DMS，講到嘩一部1:24 巴士模型今時今日要2800？！比起05年剛推出果時賣1398 足足貴左一個double... 價錢太貴就算鐘意巴士都卻步唔買！其實2800呢個價確實又係加得幾過份, 雖然我唔係用呢個價買，亦唔希望下次再出又再加價啦，出得少還出得少，賣得太貴又係事實！坦白講炒店炒家既行為間接令D模型賣貴左。眼見My Tony 出既1:43 單層車都夠膽索價1350，仲要窗門無得開、而最近佢地發佈的1:43 勝利二型敗北亦令人覺得1:24 DMS 就算05年既模都好過My Tony 今時今日的出品，加上過往1:24 炒風激烈所以貴左都極速清貨，講到尾忠實買家先係受害者! 適逢近期太多1:76 推出，個個已經捐錢捐到窮，七月中突然間話幾日後會出1:24 中巴，個個無錢買先無想象中搶得咁勁！對於一個出去食飯唔捨得捐多三蚊轉凍飲既我黎講，二千幾一部1:24 巴士就一定唔抵架啦，講到抵玩一定不及得今次要post 既呢部金王子上海華建1:24 田螺車，咁大架車先入左四百幾，而家一部1:76 官方車都460啦~！咁上下價錢入隻1:24 田螺可玩性相對高好多, 所以強烈歡迎1:24 田螺車加入Wmb Transport Department!!!! 成為Wmb 第一隻超級田螺也是Wmb第二部1:24 超級車模! (下面會詳細分享)
金王子田螺車(網上圖片)
雖然平時有留意田螺車的size, 但so far 都未能透過目測去估計攪拌罐的容量, 因為唔同車型的罐體長度不一, 以一部三軸田螺車黎講, 其配搭的攪拌罐經已有幾種容量, 有些前部較短、中部尾部較長; 有些中部較短、前部尾部較長, 不似得十一米與十二米巴士有固定的加長位置, 華建呢部明顯是中部較短, 田螺車最吸引的也就是又大又圓的攪拌罐, 不過據觀察, 1:24 模型的攪拌罐形狀上變化唔多, 幾乎都係一模多用... 甚至有錯模情況! 幾乎所有大陸公司出1:24 的某種攪拌罐(中部較長)中間都做多左一個曲折位, 如果唔接受錯模的話事實上可以選擇的1:24 田螺車模型根本唔多... 華建呢部可以話係最正常最岩平玩的1:24 的車模人士。
鐘意田螺車都因為攪拌罐形狀可愛/吸引, 但攪拌罐錯模呢個問題實在令我感到困惑, 因為bc 出嗰三部1:76 都好似係錯模既, 1:24 又錯模真係有點過份... 去到1:24呢個scale 理論上係每條水管都要做出黎, 如此認真的比例點樣可以叫買家接受攪拌罐錯模呢?? 仲要一模多用, 結果一架錯模之後部部都錯模!! 當初最想入既其實係福田歐曼LOXA雷薩重機田螺車, 因為佢比華建呢部的細位更多而且車身顏色較豐富, 但發現攪拌罐中間竟然做多左一個曲折位, 於是立刻上網search 番相關的田螺車有無一款攪拌罐係同模型所做的一樣，基本上係無既, 可以確定係做錯模, 最後都係選擇入華建既田螺車! 可以從圖片中比對一下...
正側面看LOXA田螺螺體較長但形狀與日常所見的田螺大同小異都是大致分前中後三部份, 中間部份是直徑最大, 罐面平滑(網上圖片)
而1:24 的LOXA田螺螺體分開前中後的兩條骨位過粗, 而且明顯中間做多左一個曲折位, 引致應該平滑的罐面無端端起角... (網上圖片)
上圖呢架係同一個模具, 因攪拌罐上有圖案, 遠望中間其實唔太覺多左隻角, 不過始終係做錯左, 1:24 scale 其實唔應該錯模的!!! 真係call lau ya!!! 如果唔係攪拌罐錯模, LOXA呢部係好正... (網上圖片)
上海華建田螺車(網上圖片)
華建呢部田螺螺體中部較短, 雖然罐上圖案是否不同車有不同位置就難以證實但至少符合中間部份(直徑最大位置)是平滑的特徵!
至於另一款1:24 徐工重卡攪拌車本來見價錢唔貴所以想入番部但螺體同様係骨位過粗但只有前半部有粗骨位中間又無做到, 感覺奇呢!
所以基於眾多1:24 攪拌罐有錯模情況, 故此值得入手的田螺車其實唔多, 如果唔係攪拌罐錯模, 我諗我會買多部LOXA 同華建呢部做一pair...
香港所見的四軸田螺車螺體絕大部份是中部較長, 亦係咁多款田螺之中形狀最靚的! 但以整個田螺長度來比較反而比大陸的三軸田螺為短, 所以唔係幾明點解要用到四軸, 照計三軸都夠玩!!
先回顧近日少入~
有80T 特價既EL1075~
平入1:24 Lamborghini玩具~ 係我眼中算係模型，但有玩開1:18既師兄就覺得係玩具，心諗如果carz、corgi、dw、My tony、bc 出既話可能仲差喎，幾十蚊一部算係好抵玩~! 平時一部1:43 出面賣幾舊水，1:24 一定更貴.... 事實証明D 車模其實可以好平 / 成本好低！
聯合航空1:200 727~
第一次買GJ 出既1:200 飛機, 個盒好靚!! 盒上印有聯合航空727 圖案及金色反光文字! 不過個盒去到我手上就已經花左同巢左... 靚盒被人搶晒...
重點入手係今次主角 1:24 重汽金王子華建混凝土攪拌車~
1:24田螺車size 同1:24 DMS 雙層巴士差唔多, 外盒一樣咁大... 份量十足
因為有一定重量同埋某些位幼細不宜用力拉扯, 要小心拎部車出黎已經搞到成身汗! 另外攪拌罐轉動順暢, 不過無乜必要都唔會狂轉個田螺以免造成損秏!
1:24 上海華建攪拌車
200mm(等效300mm)下的華建攪拌車:
但車頭甩左個水牌唔見左，個盒入面又無，唔係咁黑仔下馬？！平野咁多問題？！上次買飛機又無左2個前輪，但貴野黎，架機一直要封機，真係黑仔！
現實情況可能係咁，車頭logo 被車迷偷左，Wmb 已經就此事件備案，由於近年車膠日益增多，他們歲數都是未成年居多，但表現的行為實在係難以接受，例如無故當街罵戰但又唔敢出手打、偷取汽車水牌或車牌物件、亂過馬路阻檔後方人士拍照、做一個稱職聞車撚等等...
135mm(等效200mm)下的華建攪拌車:
車門打開
拖頭掀起
既然成為Wmb 第二部1:24 超級車模, 總要同Wmb 第一部1:24 DMS同場合照~ 不過我對大陸車模無乜認識, 見到鐘意價錢平就買, 唔太清楚華建呢部係幾時出, 但同一個模有出過台灣水泥田螺車, 睇番網上的出post 時間台泥田螺車係2010年左右。另外睇番人地既華建攪拌罐上無做到罐骨, 但手頭上呢部就有做兩條曲折位上面的罐骨所以我估係後來改良過，不過細心睇個攪拌罐似係由一體模改造分體模，曲折位罐骨似係接合位, 雖然比無罐骨順眼但曲折位上面呢兩條骨實在太粗... 同巴士車身上面既骨一樣大！
無骨位的攪拌罐(網上圖片)
因為車頭華建個logo 無左，唯有改為Wmb logo，成為Wmb 車輛！
1:24 倫敦寶及田螺車同場合照
話說今日影呢2部1:24 真係好趕時間，因為成個下午已經諗緊點樣影，但因為1:24 太大，拎出黎玩實話我又買車、咁大架阻住晒D地方之類既廢話，總之講黎講去三幅屁，早幾日拎架車番屋企都黑黑地面，所以通常影車模我都要等D屋企人落曬街先放心擺出黎影，所以你明白一日24小時但D模型點解影極都影唔曬啦，係因為真正影相的時間係太少... 點知老母遲遲唔落街，我得一個鐘左右時間影，結果影得廿張相，好多細位想影但都未有時間慢慢影，激死我，我得星期日留係屋企都係要破壞我D時間既！你話幾慘，玩1:24 影相都要做賊咁，但架車四舊幾，真係唔買唔得！
搵倒DA1349 / XF173 車尾相，車牌的確係全黃底！至於尾燈應該都係有個時期係改過！因相中的XF173當時下層頭窗未改裝(唔係模型個時期)。
珍寶車尾引擎室上面凹入與田螺車的雞尾各俱特色，同樣讓我喜愛！
之前一直覺得bc今次出倫敦寶下層檔風玻璃拉直版本個窗有D怪，可能因為改左組件個框有少少唔自然，除左話D窗有少少起角唔夠圓角之外最大問題終於發現係無油到黑框！即刻上網搵番中巴倫敦寶既相，模型的確係無做到黑框... 所以bc 今次好hea 喎... 但自己絕對無信心油番個黑框出黎，因為一定會油出界... 唔搞好過... 希望bc 下次再出1:24 應該認真做番足呢D 位同埋唔好加價啦......
田螺車車門打開，讓車迷參觀
我差點都唔記得華建田螺車係大陸車用左邊駕駛室，所以佢右邊車頭塊鏡之前仲諗會遮住司機視線，但原來司機位係左邊...
基本上成個拖頭都做得好似
水泥輸送裝置可郁動，其實我都唔知攪拌罐邊個位係出水泥既，上面個倒三角型係灌水泥入去個攪拌罐度，D水泥跌左落去個攪拌罐度點樣向上倒出番黎？有機會既話要望下D田螺車點樣倒水泥先得，其實坦白講田螺車係幾污糟，因為倒完水泥要沖洗車輛以免淨餘水泥堆積硬化，因此過往曾發生工人在清洗水泥期間把頭部伸進罐口而被攪斷頭的恐怖意外，其中一單更加好似係個頭跌左入罐內混於水泥中... 真係恐怖... 希望唔好再發生呢D意外啦...！
精細駕駛室
司機位望向右邊倒後鏡，藍色的係中巴的倒映
dash 位做得幾好，見倒咁仔細搞到我想即刻上車踩油了...但可惜係模型... 但駕駛田螺車要有一定技術，單是攪拌罐部份滿載水泥後可重達十幾噸，明顯比本身空載時的十幾噸重得多，高速過彎可能引致翻側意外。
車底的機件亦做得幾認真，車軸轉動的時候連入面既桿都會識郁，前軸轉向都做得幾迫真！四百涼蚊一部1:24 田螺車真係好正，而家一部1:76 九巴都已經過四百，但絕對係無1:24 的功能同仿真度，始終1:24 係完勝，如果唔貴既話，絕對值得玩，今次呢部田螺車雖然缺少左華建個logo，但真正有模型的感覺，1:24 巴模就有內籠可以睇埋，巴士、田螺車可以話係1:24 模型界幾值得玩的車型！搞到我1516 想去某網絡店搵多架1:24 Routemaster 番黎添... 大獲啦，邊有位擺... 睇黎1:24 錢唔係最大問題(唔係最大問題但都係數一數二問題，因為出面D 車模都係好貴)，存放空間才是要正視的問題...
搵一日要拎部車模出去戶外拍照先得！！！
亦不忘影倫敦寶的四面標準相，中巴珍寶巴士服役時都無影過，標準相唯有係模型世界實現...
話說入左一打1:24 重型汽車車胎想話換左架1:24 DMS 既車胎去, 點知原來唔岩size, 我覺得係bc 成個輪做細左同埋成個軸凹左入去, 而家DMS 既車胎望落去係細左而且胎面無紋兼且車輪與車身拱門有過寬空隙, 望落好玩具! 但睇黎係死証... 有轉向功能但搞到外觀假左, 上網睇番以前1:24 英國DMS 個胎好似正常既喎, 搞咩出中巴會衰左? 唔通EFE 用既車胎好d ？!
1:24 倫敦寶對比華建田螺車, 華建田螺車的前軸明顯做得較好, 模型轉向幅度比倫敦寶大而且車胎外觀較迫真~
跟住落黎係私人既Wmb "1:24" Leyland Olympian 11.3M S3BL 超級巴士模型~
這台Wmb "1:24"模型可稱得上是世界上最像真的坦克蘭超級模型之一, 最重要係唔會錯模! 擁有比bc 1:24 DMS 更多的功能, 至少包括五大功能: 路線牌可人手轉動、全車可活動車窗、上落車門及太平門可開關、引擎蓋 / 側板可開關、前軸可轉向。同時擁有更多比bc 1:24 巴模缺少的功能例如: 車頭燈可開關、門掣、方向盤可扭動、可播放引擎聲等等...
模型泵把的厚度比例準確，例如X位置是一個向左90度的直角梯形。
模型車身的曲折位與真車有99%迫真度，X位置以下的斜位亦跟足真車的比例，唔洗用間尺！
Wmb 的坦克蘭模型車頭與真車有99%像真度！應有的輪廓全部有做足！指揮用透明膠件做！
模型車身比例跟足真車，上層車頭的窗戶角度準確，梯形窗底部的車身弧度與梯形窗頂部的車身弧度不一，頂部明顯是依車窗的平面而建；底部的弧線並非依車窗的平面而建！
1:76 老虎的上層頭窗被批評中間尖出，這部Wmb "1:24" 就掌握得好好，無錯整個窗中間確實有向前尖的情況，但最突出的部份不會超越下面的車身最前端！
牌箱位置亦掌握得好好！牌箱外鏡的平面與車身的弧形部份比例準確！
Wmb 呢部"1:24"因為係11.3米車，比bc的1:24 DMS 更重手，重達5公斤... 一隻手要抽起模型是有困難！
由於窗戶部分較脆弱，移動時最好是扶車身部份！
可活動車窗，模型亦跟真車一樣其中一邊是梗窗！
下車車門可向中間方向開關！
模型前軸車輪可轉向
比bc 1:24 中巴DMS 更好玩的係，坦克上層車頭的窗戶也可開關！
輕輕在窗框用指甲一挑，就可以打開雞翼窗~
Wmb 呢部"1:24"的抹水器可人手推動，但可能因為膠水落得太多，只能小幅度推動... 比bc 1:24 DMS 稍優勝，因為bc 果部水抹好似係郁唔倒的！
司機位的田字窗窗戶亦可以開關，完勝 bc 果部就咁印個窗框上去，完全平面既...！
不過模型的車門開關功能係有，但車門好多時唔能夠完全關閉，有時關門後車門仍然係半開關狀態，需要用細小的工具把車門從內向外拉番平！
一年時間真係快過, 模型始終是死物, 可以擺幾十年? 幾百年? 可能比人仲長命, 分分鐘係一架車換好多個主人而唔係一個人換好多架車... 時候不早，需要關閉模型既窗戶放番部"1:24"入盒，至於Wmb 呢部"1:24"巴模可以人手轉邊幾條線就唔得閒睇住，因為轉路線牌果個掣好梗，搞到手指都痛, 同bc 部1:24 差唔多情況... 真係好好玩，大架既汽車模型就係同1:76 唔同，有更多趣味，仿真度完勝！不過模型越大，清潔的功夫要花得多了... 都係回到原始，影3R 相就算，睇相就算啦，九十年代前未有巴模果時咪又係影相望梅止渴！人生是應該識少D損友和擁有想擁有既野, 同埋要珍惜擁有既野。
少少題外話, 有一日我拎住滿滿一大疊銀紙, 數一個金額, 但數起上黎有少少亂, 前後數左兩次, 總共數左近一分鐘, 人地話證明你平時好少數錢, 你老未係大公司做野數錢咁Q慢既, 跟住該人士拎上手一數D錢索索聲, 突然間有種感覺就係, 喂係喎平日做咁多野以為自己好有貢獻架喎, 原來數錢會咁失禮... 以前長輩教打啤牌學極洗牌都係慢人一等, 無學好D 手藝拎而家住錢竟然俾疊銀紙玩番轉頭而唔係我玩銀紙喎, 慚愧慚愧! 不過生活中又好難任何野都俾倒最完美既一面人地睇, 好多時人地就係睇倒你d 柒野或樣衰野, 呢樣野我都覺得好無奈, 要學下如何去美化柒野。
1998年8月31日午夜, 中巴専營權屆滿, 19年後, 幾日內有先後10部中巴模型推出, 荷包快要乾塘!!! 分別係Toy1的LM x 2、Toy1 LA x 6及Buzes LM x 2, 目前為止以新模計算 Buzes 的LM 已有LM2、LM7、LM9及LM1、LM5(即將)面世、Toy1 的LM 已有red LM5及LM2、LM10 (即將)面世, 10架LM 已有6部(過半數)模型面世, 睇黎好快出齊10部... 咁出法真係回氣唔切又有新野出, Wmb Transport Department 的collection 又越來越多, 回氣需時... Toy1、buzes、PT、bc 可否暫時高抬貴手? 至於carz 真係無乜期望, 呢排出D 野都可以唔買^^" 284 我有興趣既不過都係中巴LM、LA的priority高D! (近日Toy1 的LM、LA 售價約為398，會密切留意模型售價變動，隨時按票價自動加減機制下調Wmb票價！)
已不知第幾個年頭見證每逢開學都會嚴重交通擠塞, 諗起以前搭83X 巨龍時期班司機都係嘈一開學就塞一開學就塞, 主要原因私家狗太多, 由過去的七月尾至八月中基本上八點九點過獅隧係可以踩住油行, 遲一班車仲早過平時番到公司所以會養成遲出門口習慣, 但一到八月尾未到九月, D教職員開始番工, 明顯出現車龍尤其番早時間最明顯, 九月一日當日更加係路口都塞, 巴士停站被右面行車線車龍阻擋, 駕私家狗的大多態度差, 互不相讓, 巴士無法駛離車站引致大塞車, 下一班車亦到達仍然被私家狗塞死! 證明唔少學生家庭、教師都揸車出入, 他們罪大惡極、浪費地球資源又引致塞車, 對趕時間的良好市民有不少負面影响! 討厭私家狗!!
由美國幕後策劃的九一一事件，今年係16週年，Wmb 自2013年以來首次錄得盈利!!! 將會向成員派發花紅, 但成員名單只有一人, 姐係自己派俾自己xd! 專家表示Wmb 在2015年至2017年間約有超過年半時間曾發出盈利警告, 因開支增加, 期間曾把盈警提升至最高級別, 之前連續朝七晚十二的日子就係Wmb 擴充車隊的代價! 自從取消盈警後, 開支亦未有明顯下降, 所以自覺1:24 的開支回復能力明顯比盈警前弱, 不過專家表示Wmb 的黑暗寒冬時期已過, 有望回復盈警前水平但需要一段時間! 強烈信念仍舊埋心裹, 未來添置更多大比例成員會是本人在位期間"其中一項"會實現的事!
沒有留言:
張貼留言