話説已有很多年無食過雪糕杯, 最近還換了七八十年代復刻版蓮花杯, 又再愛上這種平民美食甜品!!
印有手寫字體的牛奶公司字樣~
不過我記得我細個食個時，已經係淺藍色杯，所以恕小弟對復刻版無太深厚感情...但都儲番幾個以作留念~
牛奶公司復刻版蓮花杯，據說蓮花杯這稱呼是源於富豪雪糕車上的菜單，其中表示雪糕杯的一項寫住Large Cups，中文為各式蓮花杯。
借圖分享(網上圖片)(唉，而家個售價應該有一倍了！)
大概在五、六十年代，當時的雪糕是用外國品牌的奶粉製成，而奶粉製造商的商標貌似蓮花，製成雪糕後商人還把這個商標印在雪榚杯上，因商標成為容易辯認的圖案，所以雪榚杯又被稱為蓮花杯。
有一日，睇倒呢句描述：雀巢®雪糕為連續16年全港銷售額及銷量No.1...(1999年1月-2014年12月)
奇怪的係數月前有一段頗長時間, 樓下附近兩間七仔、VANGO及兩大超市一度不見這種牛奶公司雪糕杯, 雪櫃就只有各款細細杯但索價要成二三十蚊的貴價雪糕, 明明個雪櫃係大大個雀巢Logo但入面偏偏只有甜筒, 一杯牛奶公司雪糕都沒有, 可能越來越多人寧願食Dreyers 或某大師品牌雪糕都不會想起這些平民貨(其實Dreyers 咪又係雀巢...), 以為再難品嘗這種平價雪糕... 幸好現在有貨了, 連樓下附近七仔對面間麵包鋪都有細杯裝售賣, 不過復刻版蓮花杯只能在大杯裝找到!
自從N年前得知雪糕係一種非健康食品, 已經盡量忍口，但為何突然又愛上食雪糕？除左話有些時候食埋雪糕才感到完滿，最根源係有一次到日牛涮涮鍋專門店打邊爐, 白痴的以為現場提供了呍呢拿雪糕任吃, 載了滿滿一杯點知係乳酪雪糕, 真係好難食, 從來無試過咁抗拒食雪糕, 於是唔憤氣走到七仔買番杯呍呢拿雪糕以作心靈補償... 之後毎次放題、邊爐都不容錯過杯裝雪糕環節!
這個胡椒湯底是日牛涮涮鍋專門店的獨立鍋, 適合愛辣的人士與不吃辣的人士同台進食! 其實一人一鍋很大"程"度上是專為唔食得辣既個班廢柴而設, 也保障了愛辣人士無需將就那些人而掃興!
温馨提示: 打邊爐記得先食菜, 因為一落牛肉, 成鍋湯會充滿油份...
當時做$100(加一) /90分鐘任食(九點開始, 時限完會被趕走, 因為收十點半, 人地都要清場收工), 另外有$128(加一) / $200(加一) 選擇, 為窮人而設的$100-128(加一)的係穀飼牛最差的級數, 而且質素參差, 只比吉野家、街市買番黎既質素好少少, 有次食到想爆粗, 完全入唔倒口... 要靚既唯有食最貴個級, 但驚伏最後都無試! 之後$100 個優惠完左, 就無再幫趁, 因為正價再貴幾十, 直投覺得番屋企食福字伊麵仲更加滿足...
乳酪雪糕
食過, 發覺真係唔鐘意食, 可能一般人會認為乳酪對腸胃有益而天真地去食乳酪雪糕, 但其實無論乳酪益生菌再多, 去到胃部大部份都已被胃酸消滅, 根本無特別益處, 不如食番杯呍呢拿雪糕仲更加滿足~
七仔長期做$13/2杯, 比起其他貴雪糕, 已算最平, 仲記得二十年前超市賣$10/3 杯-$10/4杯或買2-4送1... 包裝復刻了, 售價可以復刻嗎?? 有無人知七八十年代一個蓮花杯賣幾錢??
舊時回憶番來了, 呍呢拿香味無變過!! 這種呍呢拿奶味加上小學雞時期的回憶, 誇張d 講, 無可取代! 以前要食一杯牛奶公司呍呢拿雪糕是多麼難得啊... 確實是人間美食~
自此離棄日牛, 便改食相同時段的牛摩特選級(窮人係食呢種級數), $129 +1/位, 相同級數比日牛平而且仲正... 才發現食日牛真係浪費人生...
牛摩就無胡椒湯, 但豬骨湯可以話試過番尋味, 自行後加辣椒碎、香蒜粒倒入湯中, 成為非常美味的香辣豬骨湯! 如加入粉絲、拉麵, 即成豬骨湯麵~ 都係個句, 食肉前最好先食菜, 因為一落牛肉, 成鍋湯會充滿油份, 到時d 菜就會索晒d 油... 湯再味美也不好吃了...
現場有任食壽司, 但上月有食客發現有小強在壽司上任我行(是食客當場告知, 本人並無親眼看見), 自此便不貪食店中壽司... 各位在開揚位置取食物時也應留意是否有小強橫行!!
不得不提豆腐, 非常嫩滑~
現場提供的都是乳酪雪糕, 常見完場前侍應逐枱問有無人要... 可惜自己唔鐘意食, 寧願去seven買蓮花杯...
呢間野最無安全感既係唔知幾點收, 其實塊牌就寫60分鐘任食, 不過咁上下就截單(last order)但可以食到收鋪為止, 大約10:45, 坦白講60分鐘係無可能食得切, 有次試過無啦啦早收, 十點d 人已經走清光, 侍應忙於清枱淨番我個台, 雖無人開聲驅趕, 但感覺惹來了一些不好眼光! 唔記得係咪同一次, 找錢個時因高度問題我伸手取回現鈔, 同時與對面條友傾緊計而無留意原來仲有一張錢未拎, 個侍應就急急走左去, 走埋入房, 變左局俾貼士... 正狗賊!! 原來食客鬥不贏食店是真的!!
朱古力味, 我就覺得朱古力味無呍呢拿咁好食~
之後有次team dinner 去左觀塘御前大江戸日式料理, 放題, 呢間幾年前食過, 今次第二次, 兩次都係高層請食^^, 今次有少少唔同, 係team 有奬金, 所以好難得有餐飯食! 正因為一年都無乜幾次上頭請食, 大家都留了十足戰鬥力去刷呢餐, 毎位3XX... 平時點捨得...
野食未到, 我見倒紅豆雪糕已經要食左先, 我諗一杯只有90ml, 唔會咁快飽既...
話説紅豆雪糕出面好似無見過, 紅豆雪條就有大把, 心諗雀巢雪糕杯炸喎, 無理無架bor ?
例牌刺身、壽司先上
串燒
雞翼呢d 炸野唔食唔安樂, 但心知多吃會快飽...
這晩正播放世界杯, 全場氣氛高漲, 還不停重播球員扮跌畫面, 笑尻死, 而家有視像判決, 扮跌唔係咁易架啦葉師傅...
煮粥...
KO 三小杯紅豆雪糕, 表示再食無難度, 可惜已被搶吃一空...
最後還有甜品送上~
可能一開始就食雪糕、刺身(凍野), 然後中途又食燒野(熟野), 又食下雪糕, 離座後感到肚痛, 幸好而家觀塘番廣康有83X 全日車, 唔洗再為省錢而搭80X 大隧行番去咁慘...
另一次有食到雀巢雪糕的係BHT 聚會, 去了禾輋龍悦任食火鍋, 平日$128一位~ 所有食、飲品都是任叫, 但架上食品大多所餘無幾, 肥牛係街市質素, 當我已適應了牛摩的牛, 食番街市質素的牛會覺得係劣食, 幸好還有其他食材補充, 仲食左半個出前一丁先離座~
這些地方不會有一人一鍋, 所以自行加辣~
菊花茶, 以甜制辣又是王道~ 打邊爐小弟甚少飲有汽飲品, 因為會増加飽肚感, 引致未能吃得盡慶, 俾得呢個票價唔食你一定份量絶不擺休, 甚至lunch 會食少d, 夜晩同你拼過! 所以就算要飲汽水都會盡量以七三或八二黃金比例調配(汽水佔少部份)!
任食雀巢雪糕(細杯裝), 這回還不跟你拼?! 這個票價食雀巢雪糕已很滿足了, 味道有呍呢拿、芝麻、朱古力、芒果, 最重要係有紅豆味!! 極少有!!
先來幾杯紅豆雪糕! 本人表示瞬間KO! 自認愚蠢, 先食甜野會易飽, 但見倒紅豆雪糕真係忍唔倒...
試埋芒果味(第一次食), 感覺麻麻, 紅豆完勝~
Um... 其實以上份量都不算多了, 因為小杯裝為90ml, 與普通蓮花杯150ml 相比只是一半多少少, 食4杯姐係食左2杯, 真係唔算多了!
再與放題公司決一死戰...!!!!
最近一次PCA 聚會去了旺角食放題, 對上一次PCA 聚會已是六年前... 今次大家坐低食劣食之餘都好珍惜共聚的片刻時光~! 合照就不在這裏post 了, 只post 食物照算了~
看見這個雪糕櫃真開心
毎位索價$26X, 不過現場只提供雀巢雪糕... 雀巢雪糕始終係平貨... 聽食過既人講之前係有某大師品牌雪糕... 而且呢間臨尾都無再俾甜品, 感覺幾差下...
限時兩個鐘, 時間到立刻被男侍應大聲驅趕, 感覺上態度完全比不上收一百幾十的日牛、牛摩...
急不及待要先吃雪糕, 紅豆雪糕除了奶味香, 内裏也有紅豆, 只要慢食, 杯内側雪糕開始軟化, 軟化了的雪糕與紅豆一同品嘗, 把雪糕質感提升到最高層次!
雖然我想食雪糕放題, 但一杯雀巢90ml 雪糕出面麵包鋪賣$4, 俾你來貨價$3, 一人收$26X, 毎人要食88杯先回本, 成台人都食唔倒88杯啦, 而事實上就算lunch 留肚唔食(其實我會), 都無可能食番回本。原來刺身上得快係奸商手段, 先上枱的刺身多數係平價刺身(劣食), 因為肚餓所以覺得好食, 加上飲品任飲, 已填飽了一定程度... 但大家還未洞悉到戰鬥力已開始下降...
炸野係好食呀, 但d 炸粉好厚, 多食易飽肚... 經歴炸粉的洗禮, 原來戰鬥力又進一歩下降了...
這些串燒真係做得好鹹, 令人瘋狂飲野, 飲汽水的就更糟糕, 因為飲兩罐汽水你都已經停得手... d 汽都頂住個胃, 仲食得幾多? 所以不知不覺大家的戰力已所剩無幾...
再者食到接近尾陞, 漏單情況越見嚴重, 隔離枱直投講話兩個鐘内漏左三/四次單, 我個台就好少少只漏兩次, 但都坦言如果已經差不多飽, 漏單有時都算9數, 食多杯雪糕算... 講真雪糕一杯最多咪3蚊, 食得幾多呀? 有些做過待應的有人會話漏單係待應們做到踢晒腳任何一間也會發生, 更會怪責不滿漏單的人無知, 因為他們一定係無做過飲食業! 這些人踏足商業社會日子一定不多, 漏單根本係賺錢策略, 你叫平的一定俾足你, 叫貴的就會漏一兩張單(實有人放棄追單), 而且大家都唔會因為漏一兩張單而以後不再光臨, 其實某程度上侍應都幾慘, 因為人手傳單, 就算傳紙成功都會漏單, 一旦漏單又可能要面對食客的不滿情緒, 因為漏單根本係賺錢策略, 他們無權控制...! 而作為消費者, 侍應忙到黑面引致態度惡劣都會感到不爽, 以這間為例, 侍應們連講句唔該/唔好意思都充滿責罵語氣, 你話呢個社會咁利益當前又點會和諧先得假... 食客、打工仔都是輸家, 只有老闆才是贏家...
再來一杯朱古力雪糕, 杯邊雪糕開始溶時是最好味的! 網上d 人話朱古力隻味好有兒時回憶, 但我就唔覺, 因為我細個係食呍呢拿~
回想一餐放題就像與放題食肆決一死戰一樣, 因為除左與朋友暢聚之外俾咁貴都想致力食番回本, 但好似我呢種入場第一時間以為唔執輸走去拎雪糕食的愛雪糕人士一定係輸家! 因為食甜野就會易飽肚, 還有什麼戰力?? 其實根本由踏入食肆開始已注定毫無勝算, 事關所有上菜次序、食物調味輕重都不由自主, 全由放題公司控制, 食客由始至終都被牽制著, 上一餐留肚進場都不敵奸商卑鄙手段, 放題食肆就像一個黑暗空間, 食客是無可能戰勝奸商的...
日前小弟向雀巢査詢, 証實杯裝紅豆味雪糕只向餐飲行業提供, 所以難怪小弟四出尋找各大小超市、便利店、士多店及麵包店均未見有售, 換句話紅豆味雪糕絶對是限量版... 唉，想食杯雪糕都咁難，仲要已經係平貨，所有利益都是向著餐飲行業，食客？可能永遠是輸的一方... 失望！
某日食完沙嗲王，又要加番杯蓮花杯先夠喉~
以前會把雪糕視為飯後甜品, 但好耐先會食一次... 由於呢d 雪糕本身比較實, 所以只要不經意輕輕解凍一會, 杯内側雪糕開始軟但未溶時是最好入口的時刻!! 其實只要手拿雪糕杯, 體温滲透杯中, 雪糕便開始軟化, 拿下一部份溶化與未溶的雪糕於同一口進食, 呢個食法簡直係將一杯平民雪糕提升到另一種享受的最高境界! 幾十蚊一杯雪糕賣的是牌子, 幾蚊一杯雪糕賣的是樸實及回憶! 幾十蚊一杯的也同樣只是雪糕, 時限内不吃一樣化為奶水沒有永恆光輝, 而家市面上d 雪糕閒閒地已經十蚊以上, 細細杯二三十蚊都有... 有幾蚊一杯(size 更大)還求什麼?
即食麵、薯片、薯條、炸雞、脆香雞翼、雪糕、糖水... 樣樣都咁好食, 點解偏偏係垃圾食品, 會食死人, 你話如果呢堆係健康食品, 我一日三餐日日食都得呀...
沒有留言:
張貼留言