早前分享了九巴之友系列巴士模型, 唉, 醒起張新九友証都未拎, 其實上一次換証都已經想話寄黎好過, 你要我辦工時間去領取, 大佬呀我收工你都已經收左工, 點拎呢? 真心ON9! 咁大間公司做野真係...
這次分享九巴仔巴士模型。其實以下3N 九巴仔呢堆模型相係三年幾之前影的, 當時仲用緊Fuji S6500fd, 不過影完之後一直忘記在這blog 上分享, 適逢近日為了存放1:43 巴模而把一批1:76 巴模入箱為安, 才醒起曾經影過紛紅色3N, 現在終於有機會share...
"九巴仔"是九巴於1999年為推廣途經彌敦道的六條九巴路線而設計出來的卡通人物。
1999年5月, 為回應地鐵於同年三月推出以爭奪過海隧巴乘客為目標之"搭十送一"優惠, 九巴便推出"彌敦道熱點任穿梭"宣傳, 以吉祥物"九巴仔"為主角, 推廣六條行走彌敦道的九巴巴士線包括1、2、6、6A、9及B1, 而且強調各線收費"全部唔過五蚊雞", 遠比地鐵票價便宜, 而且班次頻密, 選乘九巴絕對是物超所值。
當時數輛九巴塗上了粉紅色底的九巴仔全車身廣告, 以及在彌敦道沿途相關的巴士站貼上九巴仔廣告或海報, 甚至斥資製作電視廣告加強宣傳, 因如此大型之宣傳手法一時無兩而成為經典, 而現時幾乎已沒有這類型的宣傳了。
九巴亦推出了九巴仔相關產品例如明信片、巴士模型、毛公仔及印有九巴仔圖案的文具用品, 而九巴於2001年後開始停止宣傳九巴仔。
又分享少少不同時期喜歡用s6500fd, HS25 "影巴模"的原因
S6500fd, 小弟第一部天涯機, 因微距有限, 影1:76 巴士zoom最盡只能取標準相(見下圖)。好處是AA電, 機身較輕, 鏡頭鋭利, 景深本身不算淺但相片看出來順眼。Monitor 取景耗電量大及個人用s6500fd 影巴模甚少會用到等效200mm 以上焦距, 因為200mm 以上微距效果越來越差, 加上長焦有明顯的成像模糊, 所以只能用中短鏡部份...(以前不追求zoom 盡是覺得好靚的!)
HS25, 以等效24-720mm (沿自HS10)的天涯征服人心, 微距能力較強, close up 1:76 巴士效果很好及用AA電! 可惜成像欠佳(感光元件太細), 景深太深, 影模型需要花更多時間處理背景接位, Monitor 取景耗電量大及出現電量不足圖示時會馬上熄機! 所以後來個人選擇用番s6500fd...
DK1992 / 3N143
車型: 丹尼士巨龍十二米
模型限量800部, 2013年6月推出
車型: 丹尼士巨龍十二米
模型限量800部, 2014年4月推出
DK5310 更換1A 牌前往東九起載, 9及1A 均途經彌敦道以配合廣告宣傳
原來兩架3N 的圖案是有分別的, 主要是九巴仔公仔位置不同, 口號一樣是彌敦道熱點任穿梭, 算是各有特色~
除了常見的車型, 塗上相關廣告的還有東洋之風 FP4790 / AM158, 不過這個版本沒有九巴仔圖案, 只有簡單的Nathan Shopper 彌敦購物線字句! 而事實上三菱曾經張貼過有九巴仔圖案的廣告, 不過可惜模型並無推出...
車型: 日本三菱9.2米
模型限量1250部, 於2010年1月推出
還記得當時模型是與FN8469 / AM155 一齊推出, 印象是小弟第一/二部單層巴士模型, 兩部九友價496... 現在官方車折埋一部都加到4XX 了...
再一次合照後, 這對AM 孖寶要入箱為安了...
細心看, FP4790 車頭的九巴logo 少了個"歩"字, 變成了"九巴服務 日日進 ", 難道生産商都認為九巴服務 日日退歩??
於2010年投入服務的新車, 座椅皮上開始印有白色巴士仔圖案, 同年巴士仔也重新出現在巴士站及RoadShow路訊通電視上, 更當然不少得的是全車身廣告, 色彩繽紛的車身廣告讓人耳目一新, 剛好那時巴士模型界除了毎年都會推出的賀年生肖廣告模型外, 並無其他新款型號的廣告模型, 也代表全廣模型有一定市場, 更有師兄表示"唉無得唔買"... 所以在這種背景下, 2010年九巴與80T 合作推出新一代巴士仔巴士模型, 既有宣傳之用又可以賺埋(呃)巴士迷的模型錢, 一舉・兩得!
新的九巴仔廣告貼在PJ5118 身上, 行走1A 線, 不過好衰唔衰, 個廣告大大隻字印有"服務乘客 從心出發"的標語, 正因為那些年沙田區九巴脱班率高企, 而途經廣康區的大部份九巴路線例如281A, 82M, 82X, 83K, 83X, 86 等脱班問題嚴重, 廣康區飽受九巴服務水平下降之若, 所以PJ5118 呢個廣告我個人是不接受的, 其模型也堅持不購買, 以行動表示不滿!
直至幾個月前, 有一名BHT 成員轉玩My Tony 1:110 玩具車, 出讓此車模型, 才終於入手...
先分享屎忽仔真車照片
服務乘客從心出發？我呸！完全看不見邊忽有誠意服務，鐘意巴士都係咁話，樓下條條線都脫班、減車，喂，叫人點撐你呀？！
PJ5118 / ATEU19
2010年底, 首架再度披上巴士仔的丹尼士鐵甲推出模型, 限量1800部
基於當期時九巴脱班問題嚴重, 又頻密加價, 巴士仔的形象大打折扣, 很大程度上, 巴士仔代表了脱班、收車、加價、服務差, 集所有不滿於一身, 巴士仔又被巴士迷稱為屎忽仔! PJ5118 的廣告最後也在2014年落畫
這個場景還好看~ 又很襯托PJ5118 的顏色
SE6593 / ATENU70
ADL E500MMC 為2013年後香港的主力車款, 九巴曾以巴士仔宣傳歐盟五型環保巴士, 不過只是banner 形式... 模型在2014年1月推出, 限量1800部!
另外, 2011至2014年間, 共有6架巴士先後披上不同主題巴士仔全車身廣告, 全部均有推出過模型, 不過這裏所講的6架巴士除了SH1334 外, 其他本人全部無買!!!!
SH1334 / ATENU130
2014年10月, SH1334 披上以藍色背景及菊花襯托的巴士仔全車身廣告, 此廣告在2017年11月落畫, 成為巴士仔系列最後一架落畫的巴士! 模型在2015年10月推出, 並同時推出98C及601 版本, 各限量900部!
SH1334 還推出了1:43 scale, 路線是101, um... 看來SH1334 有一定地位, 不過自家廣告有宣傳之用, 推出模型也是合符國情的!
大家覺得1334 靚d 還是5118 靚d 呢? 如果5118當年有做1:43 的話, 我可能晨早落43坑了... 好坦白講, 80T 應該一早開1:43 呢條line, 而唔係等到2015年先有第一架... 所以好多人都話80T 出野慢九拍... 又真係無話錯...
唔知大家對屎忽仔又有咩印象呢? 2008年以來, 九巴多次申請加價, 以歴年加價的頻密幅度, 看來目前的票價將維持不久...
九巴及龍運於2018年底申請加價(加權平均加幅達8.5%), 不過近年渉及九巴的重大意外多及脱班率增加以致服務未如理想, 希望加幅遠低於巴士公司提出的百分比, 當然也希望否決加價!
沒有留言:
張貼留言