呢幾次會分享BANDAI Banpresto 眼鏡廠近期推出的幾款英雄勇像景品
2021年是TDG 25週年紀念, TDG(Tiga、Dyna、Gaia)是平成年代構思的三位以全新世界觀定位的鹹蛋超人，至今仍然擁有相當高的人氣。迪加也是英雄勇像推出的第一位光之巨人角色, 第一水的迪加也嚴重缺貨, 炒價高企, 上月Banpresto 終於再度推出, 同時加出夜色版本(我們知道BANDAI一向鐘意一模多用)。
而家英雄勇像個預訂list 排到05/2022, 終於有Ultraman Gaia V1、V2, 但已收訂的起碼有一半都未出, 55th商場展覧有Ultraman Z 現身, 也有迪加、Z同帝拿的擺設, 睇黎Z同帝拿都好大機會會出勇像, 而Orb 就流少少, 得塊紙板... 但Orb作為超人50th登場角色, 勇像亦即將推出！
原來早前眼鏡廠曾舉行投票活動，結果Zero、Tiga(強力形)及Evil Tiga 都被選出推出英雄勇像！
除了以上提及, 仍然期待英雄勇像可以出齊Ultraman Nexus 超人力斯的銀/紅/藍三色及最強進化Ultraman Noa 超人羅亞, 其次作為超人40th的兩位登場角色: Ultraman Mebius 超人梅比斯及Hikari 希卡利, 都非常値得推出勇像!! 希卡利更加應該出埋封眼形態!!(當年TVB叫藍武士)
再數落去, 出得Zero賽羅、頭號敵人Belial貝利亞無理由唔出...
係近日好多人為了追加左價既1:76 Volvo B8L 12.8 269C、27及龍九B8 12.8套裝而東奔西走之際, 小弟卻將注意力集中在英雄勇像系列上, 因早已訂貨, 輕鬆入手, 唔洗去展會排長龍, 夜色版現貨暫時充足仲減左價添^^ 買英雄勇像真係開心^^ 所以言歸正轉, 分享番今次開箱的英雄勇像超人迪加日色夜色先~
先獻上開箱片:
其他英雄勇像都會有開箱片, 記得訂閲及互粉吧！
其實今次再版係有港版同日版之分，主要係紙盒分別
港版(左)、日版(右)，日版的迪加圖案係大隻少少，左上角有TDG25th 字樣
至於夜色版，暫時都係只見過有TDG25th字樣，似係日版，唔清楚係咪都有港版
除了紙盒，據說隻玩具就一樣既，但至於會唔會日版QC好d 就唔清楚，其實又係好睇運氣，QC好壞真係開左盒先會見倒，但佢盒面3面都有膠紙，撕過會有痕跡，正常賣家都無咁誠心開晒盒check！今次qc 相信好過上次的迪加爆裂形同天空形！
其實買英雄勇像好睇運氣，QC好壞真係開盒之後先知，今次上色靚過上一次，面具的銀色亦上番足，上次的薄到透底，今次算正常番~
個人都好期待會出紅迪，可能初代(昭和時期)的超人主色係紅同銀，其實都係覺得紅色超人迪加係順眼過紫色~ 直到阿亞魯同力斯出現，才發覺藍多少黑、銀多少黑都係好靚，超人的設計真係唔係講笑，唔係亂畫就有咁既效果！
回到超人體驗館的迪加場景
迪加與佳亞
不忘與黃金形合照
其實黃金形上次分享過，全黑背景攝影有發光的感覺！(可能因為片集中黃金形出現就是一束光芒，所以實物明知唔識發光，都覺得係會發光~)
夜色版，比想象中靚，適合在夜間燈光下欣賞。眼同心口能量燈改為上實色，主要係想模擬發光狀態~
握拳頭時手套的紋理做得好足
手套上摺曲都有跟番足，好正！
個模做得似，眼部就算上了實色，都覺得好有神！稻上信行的作品水準一流！
個人覺得夜色版模擬皮套的光澤比原色版的更神似，遠睇直投有迷你X-plus的感覺，雖然上色始終比較多出界情況，但100蚊真係抵玩！
迪加頭形比例真心靚，但背後有個沒有功能的凹位，據說不是設計師刻意構思的...
以前好多人問，點解超人成日都係日本打，唔係香港打？
好簡單姐，日本係超人的發源地，當然係番日本打啦，但拍硬照就唔同，終於可以係香港打！
城市將陷入火海，超人能量不足以繼續戰鬥，病毒隨處擴散，死的死，未死既都隨時死，人類，命運如何？
部機廢左自動對焦都超過一年，睇下幾時忍無可忍先換機... 呢樣壞個樣壞又照樣用倒，照樣有相出，真係吹脹，不過影的時候就辛苦好多，事關視窗有三重影像，要睇清楚對準焦係好花眼力，無數次以為對得準，但睇番張相就知錯焦，係好激氣的一件事... 就係因為對焦十張有八張out，而家有特見都唔知影唔影好，講換機都講左兩年，無奈一直覺得換機洗費好大，無錢換，而家裝修超支嚴重，呢樣要補錢、個樣要加錢，濕碎野加埋隨時等於買架退役巴士，貼左十幾皮出黎，庫房又跌番去幾年前水平，其實自己已經keep住有工作，之前份工仲成日OT換補水，但無奈在職貧窮真係令好多人無辦法上游！感覺就似花左好大氣力唔俾逆水沖你向後退，雖然有時前進，但又經常後退，整體似是停在原位，但你一停步就馬上會被推向後，總之好多野都係有苦無路訴，真係不想努力了...
唔少人都講得好岩，就係政府高官抗疫不力，應該將佢地減人工，不過大家都知，道理上係咁諗，事實上佢地班人點會減人工，佢地唔會覺得自己做得唔好，難為既始終係一班廣大一直以來都做好本份的市民！期望再發放消費卷同時，再向合資格香港居民加碼派發現金，同時加推交通津貼金額，與市民共渡時艱！
夜色版，開頭覺得為出而出，因為都係同一個模，只係唔同色，Bandai 慳成本一模多用都出晒名，不過日間望呢隻夜色版，又覺得幾靚，有少少似黑暗超人！
黑暗的上色，望落有少少似黑迪加，話時話都希望會出埋黑迪勇像！
夜色版雙眼改為白色，但因為係上色表達，所以就會有邊界唔完美的情況... 難怪有人會覺得用番透明眼會靚d
如果迪加得到大海的力量，實力應該可以比阿古魯更強，據說上年阿古魯終於有SV版形態，真係估唔到隔左超過20年，仲有得進化，咁未知迪加仲有無得轉多個更強的形態呢？
另外，作為TDG25th，以超人迪加作藍本的超人特利加都已經有出英雄勇像，但因為比例唔同，組裝位失真亦覺得好失望，所以唔打算影相，只分享開箱片而已：
早幾日眼鏡廠上傳了Orb、紅迪、邪迪的示意圖，紅迪姿勢未知(因為以前盒蛋無出過)，邪迪應該係對戰姿勢(跟番盒蛋的造型)，期待快些推出，仲有黑迪！其實迪加勇像係2020年出，而家先有邪迪會唔會耐左少少，仲要得張示意圖，不過知道會出都總好過估估下... 希望年暑假出倒啦... 作為反派的經典角色，等到頸都長了！
沒有留言:
張貼留言