4月又過去了，這樣又過了一個月，由驚緊3月31日後唔知安排去邊，到留守字軌又不知不覺做多1個月^^ 回顧4月少入~
突然間，復古第2版4月30號彈出黎... 經常說入齊8架真係俾足面！有時想留番D錢追舊車，不過遲入實俾人搶晒，所以放工仆去入一架RJ2681！QC好差，部部都打風、水貼旋轉、塌天花、窗有花等樣樣齊！但以上問題均係官方車普遍存在的問題... 明明上一版可以用273入手，而家要298 QC仲下降左，真係唔抵！同場1:10站牌叫做$59特價，入左一個。
搵番N 年前果個1:10 站牌，D人話錯模，但我未見過真果個，所以無法判斷！N年前果個可惜已經發左黃... 其實一直想買多一個自己改一個全部寫晒取消左的路線上去，以諷刺九巴賺大錢仍不顧乘客利益及需要，取消實用路線，開辦貴價路線變相加價！不過有時間先搞...
是次貼文正題：私人交通模型集會2013(上)~ D相係上年影的，而家先係度post 番，所以無錯係2013
沒有良好的攝影技巧、沒有高仿真度的情景，有的可能是少少咁多的誠意！去年係本人玩左交通模型10年之際，誠意舉辦私人巴士模型大集會2013！
係咪10年真係無刻意去記，應該已經11年添！來救救海洋 LM4 係本人第4部引入的巴模，卻是本廠現存最早的巴模！原因不解釋咁多，那些或已被本人充當"源輕鐵倉"，整爛的整爛，送出的送出... 而家諗番，發覺自己好ON9，明明當年的零用錢少之又少。但因為當年太鐘意空調十一米巨龍，現貨3百幾蚊無優惠都肯入(非官方)，反而現在官方車加左價所謂優惠價298一部我都覺得好似唔值咁貴喎！
FT7111-81C、博世905、佳能6A、海洋LM4、LM9、LV149...... 而家淨係查倒LM4 係2003年9月28號出、LV149 係2004年出，其他果D 不詳。連九巴自己部81C 個post都無埋，所以當LM4 開始先係正式玩巴模^^
是次集會與官方車無關，大家唔洗失望，因為展出的都係自己好鐘意的款式黎，不過地方淺窄背景有些雜亂，請勿見怪。
首先是在九十年代引入的非空調丹尼士巨龍十一米到場。
十一米吉龍、康水龍也到場~
左一至三：吉龍；右一至二：康水龍，馬力分別是220匹及245匹！而家都仲好懷念吉偈的感覺，好彩有去上年開頂吉鷹遊河!!
左邊的2部十二米巨龍亦到場~
講到尾，舊式巴士以實用性為主，載客量高，善用車箱空間，有D似香港地方細但要迫幾百萬人一樣，近年仲要接濟埋偉大祖國的人... 政府D$ 都唔係用黎幫本地窮人，真係白痴。
有D可惜無入埋AD1@6號線，而家想入番都難了... 同埋等緊AD1出後期版呀，唔該3X2 快D出啦...
一排黃色熱狗之中有一架白色，差D以為係訓練巴士DT1280/DT5367/EJ4474添^^
部機景深太深，D相始終差了一些！
跟住係一部多明尼加到場，但拆盒出現一些阻礙，就係鎖住車輪的鐵線太實正，搞到我搞左半個鐘先拎倒部車出黎，期間難免有些暴力行為... 都唔知有無整傷D車，希望無啦... 有時唔想拆部車離開底座係因為有全新未拆的感覺，同埋3X2 D車好脆弱，容易整爛D車...
多明尼加長9.5米，與12米巨龍有明顯分別！
多明尼加進場，與早期的丹尼士巴士合照~
印象中，一直以為DM 係3X2 最早期出的巴期果批，但查番記載，DM 係2008年11月出的，乜咁遲咩? 以為0506年果陣...
3X2 真係應該出多次DM 或當年出的時候兩個版本出多一架，有退步口號logo 同無口號logo 各出多一部，然後應該再出埋DM 非早期模樣(細logo 銀軸)。係咪唔同批次的DM 車頭燈有唔同??
雞翼窗大合照~
八九十年代的公車陣^^
吉龍陣^^ 以前有同學話好欣賞巨龍的路線牌箱部分凸出黎，又的確幾特別的。
覺唔覺得九巴應該復古? 用番無口號的大Logo 好過啦！名不符實的口號，無論上幾多E50D 講告都假...
從世貿大樓拍下來的 top shot~
布牌81C吉龍~ 不足之處的係反映多時的綠窗唔夠綠lo... 呢部81C 係眾3X2 車之中最高價格入手的... 因為出得果百幾架！當年第一部巴模就係FT7111-81C，但送往廢車場多時了，一直想入番部81C 的，而家FT7111 非全新都座底過300，無法追回... 亦是本人玩巴模的一點遺憾！
集會期間發生一些少意外，駕駛多明尼加的人員把倒後鏡碰到了!! 順理成章泊出維修~
DB951@15A
DA7157@105。膠車感覺上上層太斜上頂，真車無咁斜！
DM8097@81C 泊出。覺得部部吉龍上層D窗都唔係平行咁的... 手工參差了?
兩部九巴空調雙層巴士始祖~ AD1及AL1~ 九巴唔識留AD1 真係無比浪費！印象中有市民曾去信九巴希望保留AD1 巨龍冷氣樣版車，不過九巴竟然將市民的意見當耳邊風，對自己有利益的野咪聽，無利益的咪彩你都ON9！呢一刻發覺保留真巴士的朋友是擁有堅強信念...
DX2437@238M。布牌3格出唔倒M 字^^。AL1 個模明顯未掌握呢個車身的神緒，群腳太薄、車頂太厚...
BL、3BL及都城陸續進場~
AD1 的車身好似矮左少少...
利蘭車隊~ 雖不及巨龍咁多，但部部都係正車！
都城車隊~ 更正！282匹4前速的超強爬山皇！有D 後悔早前出EH4891-99 無去入... 鬼咩又玩埋晒D 獨家推出第2度買唔倒的，價格相對海鮮... 而家想入都無... 個人較討厭呢種做生意手法，苦的始終是買家...
巨龍、利蘭、都城陸續排成車陣，這時一輛ES龍才到場，點呢??
突然成為全場焦點！黃師傅續一將車駛開，讓路予ES2621@70~
泊AD1 隔離算，AD1都係E蛇龍黎~
當年3X2 ES龍的車頂大受劣評，敗北收場，但而家ES龍都貴左好多... 而唔少ES龍都變形...。一直想佢用改良左的模重出ES龍早後期及霧燈版本！肯出多次沙田85K都唔錯!!! 睇番記載，呢部ES龍係09年出，事隔5年，好心應該再出啦。
好似所有巨龍個頂都未夠厚... 包括吉龍！其實之前都有人反映過...
龍蘭都陣，自己都係第一次擺咁多車出黎欣賞！因為平時拎車出黎影都有說話聽...
兩邊都放短車，長度相差好遠耶！呢D都係特色黎。
仲壯觀過當年大福街泊退役巴士的場景！應該未夠當年九龍灣廠退大量熱狗果陣，擺啟德空地果批熱狗陣！(下圖為網上照片)
都城嘉慕9.7M
上網睇番舊相，九巴廠頂滿是紅色頂的巴士，都係熱狗黎... 而家無晒了... (網上圖片)
壯觀嗎?
從世貿大樓拍下的Top shot^^ 由2部多明尼加駛出中間，構成一幅笑面的圖案！
用懷舊mode，綠窗果D 變晒啡窗@@
沒有留言:
張貼留言