Buzes Toy 1/76 玩具利蘭奧林比安坦克蘭 & Hysan Place 走馬看花記(I)

詳文 / 多圖~

28/2 ~ 29/3 於Hysan Place 的光之巨人展覽日前已經完結，短短一個月又過去了... 下文將會回顧一下。(後續)

熱烈歡迎Buzes Toy：EJ4474 前S3BL398 加入Wmb 車廠之玩具部！

對於 Buzes 的利蘭奧林比安十一米，買係因為真車對自己有一份意義 / 情感而絕非模型比例精確！坦白講呢個模已經用左好多年，每次見佢有車出都好似劣評加潮，次次都會問幾時先會 / 先肯起新模？亦每次都話下次唔會再捐錢買呢個玩具模，但當中幾次最後都係科左水......。雖然話遲D有新模姐，但有新模又要再等佢幾時先再出坦克蘭，等到幾時呀? 上次(2009年) buzes 出70 已經想佢有新模啦，到而家咁多年咪又係得個吉？其實利蘭奧林比安呢款咁主要的熱狗車型到今時今日都仲未有一個似樣的模出車已經覺得係離晒大譜！！！吉蘭、坦克蘭都退左咁多年，EJ4474 都退左2年了，今日仲係舊模出，你話我可以講什麼?? 模舊QC又差又加價，要講都只有是粗口！

無論如何，今次選擇出的 EJ4474、FB8955 都幾有代表性，其中EJ4474 (S3BL398)在2013年退役，成為九巴訓練巴士最後一部退役的熱狗，其實當時以EJ4474 的車齡來計是6部熱狗之中最年輕的一部，自己都未影過EJ4474 在世時 / 訓練時期標準相... 退役當然有少少失落，不過如果玩到殘晒壞晒先退，都唔係一件好事***。因此對自己來說呢部車收藏價值不亞於2012年退役的果批熱狗，e.g.GL258！所以真心講句想有模型好耐，唔該佢2年前好同我出啦！

雖然buzes 個模同真車差幾遠大家心中有數，但還是熱烈歡迎 EJ4474(S3BL398) 早期版出模型，話說QC方面2款(4474 8955)都係好差，FB8955 更是買唔落手，最後無買到，有部4474 算數... 反正坦克蘭後期有部70~

吉蘭早期版2008年出左81，坦克蘭早期版今時今日先出，你話係咪好唔公平？老早就應該同我出啦！反正都係舊模的，又唔係等到今時今日有新模，真係晒我時間！

不過佢唔係出EJ4474 最早期的版本，有D唔鹹唔淡。最早期除左黑軸大退步logo 外，4面車身都有大隻車隊編號S3BL398，81果部就係呢個版本！反而今次坦克蘭就無左我4面車隊編號，總是欠了一些！講講下想追番架81 添... 大令獲！

唯有順口問問有無師兄今時今日覺得buzes 架S3BL 吉蘭81 個模唔得想放又唔志在賺錢？？不如平D 放俾小弟(不求全新)~~~

車頭同當年70 的坦克比，有時會覺得舊樣貌順眼些，有時又覺得改左之後順眼些，都是角度有影響吧。但改左之後都有起碼3個地方令我難以接受：1)上層頭窗突晒出黎，根本就唔fit size，雖然窗的外圍形狀有改良但成個膠件斜晒出黎，大佬真車係直過下層個窗、2)下層頭窗變左四方起晒角，頂抹水器錯晒位，更重要是成個膠件直不甩無左真車檔風玻璃少少斜置的感覺(模型同真車上下層窗特點調轉)、3)車咀成個件凹晒入去，真車邊係咁架，個人觀察自從GL258 果個咀之後就已經做到平晒...(之前EC963 都係有問題)。呢D都係一睇就見倒的問題，唔洗搵真車對都知！唯一有視覺上改良的係牌箱個形狀！

車尾黎講，整體比車頭順眼，主要係上下層兩個窗OK！但都有明顯錯處：1)尾指揮燈版本不一、2)牌箱唔對位... 看一看真車的牌箱位、燈罩。

另外，唔少人都睇倒呢個模側面車身中層位置有凹入視角(退步logo 位置尤其影相非常明顯)，原因是個模無做到真車車身的弧形位置！加上車窗膠件又有不同程度傾斜，視覺上扣晒分！

就咁呢張相唔知顯唔顯示倒這個特徵，簡單黎講下層由群腳到側牌箱車身筆直而上，到退步logo 位置少少斜上車頂，所以車頭望番去車尾的角度可見上層車窗在同一個平面之下有少少斜斜地。喂十幾年前出81C 老虎果陣已經睇倒呢個問題，作為一個乘客都見倒有問題，但可惜一路以來都無改，而家仲要強行接受同一個錯左十幾年的模... LM、S3BL、S3V 全部都係咁錯法！

這個車長都算大膽啦，雖然技術不錯，不過把一台十一米巴士駛在狹窄的通道上，路面闊度不能容納對頭車通過！

另一個要鬧的地方係內籠，咁多年都唔肯將D座位油番條銀色線表示熱狗座位上面條扶手，已經唔係carz 開龍果隻靚凳都算啦，喂油番條線係咪真係咁難 / 高成本呀？(buzes 上年出的ML 賣398 但亦同樣無做到呢樣野)仲有樓梯位上層的旁板"老虎頭"都姑且油番白色，就算坦克蘭成個內籠以褐色為主，然而地面、座位及牆壁都有深淺色之分，卻竟然hea 到同我一色包辦，誠意欠奉！成日都話內籠假唔係一定死罪，起碼你都同我分番深淺色突顯番唔同部份出黎，籠又假又一色包辦咁求其，我點科水俾你呀？

下層方面最大問題係車頭檔風玻璃入面竟然突左個橙色部分出黎！同埋成個司機位做得仲高過巨龍，實在令人難以接受！睇一睇真車就知車頭成個組件係在車頭檔風玻璃以下，換句話講出面睇部車無可能會見倒內籠橙色的位置！望完真車再對一對模型就可以了解... 整個車頭是嚴重出錯！

2008年12月6日係九巴路線70 最後一日提供服務，其中 FA9288 S3BL410 被安排行走70線尾班車，見証著這條已有35年歷史，對於連接新界與九龍有重要作用的巴士路線走到終結。講到 FA9288，比較難忘是沙田廠時期80K，相對80K 當時另一部熱狗 FW2243 (碌王駕駛)，當然寧願坐坦克蘭啦~！

EU5923 / S3BL405 - 70

FB5764 / S3BL414 - 70

坦克蘭在2009年初退役，坐70 可以話得係坦克蘭的回憶之一。所以重申當年科248買 70 模型係意義所在，絕對不是模型比例精確！

buzes 呢個模，個人覺得車尾係幾順眼，所以唔覺唔覺影車尾仲多過影車頭！

buzes 利蘭奧林比安當年出81C 小弟已發現有車地台太高的問題，因為真車的群腳底線係同車輪中間銀色部分底部高度相約，雖然唔能夠話所有利蘭的群腳是一樣高，事關有些利蘭好似高1-2吋，不過今日出模型仍有車地台太高就肯定係十幾年前積落又唔改善的問題之一。

公道講句，就以車地台高度一項，除了buzes 做得唔好之外，當年312 出的AL1 都有呢個問題，而且群腳底線完全水平的效果更比buzes 難以接受！模型同真車對一對群腳位置，一目了然。目前所見比312 AL1 做得好的除了群腳底線不是全水平線外，A柱的粗幼亦都較準確！

如果要搵地方讚buzes，我諗車窗方面比312 做得較立體感，原因是一個熱狗車窗有2塊玻璃，總有重疊的地方，buzes 的車窗有這個厚薄立體感，而312 的窗形狀很像真，不過平面，銀框位置印上去有時唔夠色水...

引擎蓋條黑線個人覺得效果又係一半半，因為真車都唔明顯，或者應該話佢加得黑線就應該加埋側板尾燈隔離果兩邊，因為左右都要開關，無理由淨係引擎下面先有黑線咁求其的。

以上對 buzes toy 的評論是個人意見，並不存在護航人士掛在口邊的：肯改車頭已經好好之類廢話！唔出都出左，雖然個模令人失望、QC 令人更失望，但都好高興 EJ4474 S3BL398 呢部真正最後熱狗出模型^^ 作為熱狗 fans，出中自己想要的車其喜悅是相當大的^^。如果不久將來有新模可以出多次就更好，或者出下訓練巴士版本就更更好了！是次模型產品編號用了BLK39814，是以EJ4474 在世時的車隊編號：S3BL398，路線14 命名。你咁俾面，我買一部以示支持啦，不過本來想買多部72，但QC唔得抱歉捐唔倒多318俾你...！

28/2 ~ 29/3 於Hysan Place 的光之巨人展覽日前已經完結，以下將分享小弟參觀這個展覽的走馬看花記。對於香港有Ultraman 展出，作為由細都大都喜歡Ultraman 的小弟實在無理由唔到現場參觀！事關次次都係睇電視，有真人係眼前又有幾可呢... 所以最值得讚係有真超人合照環節!!!

但正還正，like 還like，小弟不是盲目讚好的！有樣想鬧的係職員話磁石貼係某個星期六日全數已經換領完畢，但竟然係個展覽最尾果日突然又發表話仲有，每人可隨機送5張... 最大獲係我唔係日日走去睇佢update 近況的，見倒佢寫個近況果陣已經乜都完晒啦，真係想唔講粗口都唔得！咁我老早去問你D人又話無晒，臨尾又話有，唔知果D點會特登去多次呀！Wmb 對有關部門的不當安排作出強烈譴責！並表示非常不滿！

講起磁石貼，本來有2塊係我的，去到話無晒但無啦啦最尾又話有，仲要多到每人5張，神早有又就應該讓到場人士換領啦，臨尾唔聲唔聲話有咁多，你話係咪唔鬧唔得？！

數數，今年是Ultraman 49 週年，你話如果50週年會有巴士廣告的話，科水買模型都唔係問題的！(希望會有啦，前幾年小飛俠都有上廣告... 模型仲買晒5架，俾足面！我唔敢講如果係超人的話會唔會忍唔住買十架！)

根據我自己在現場告示牌所見，這個展覽有6 個必到熱點，所謂必到熱點當然指是有Ultraman 展出的地方，但網上一些報導卻寫有7個，多出的一個是利舞臺天台的超人迪加巨型吹氣公仔(我兩次去都無見倒有)，故未知是否後期才加入展覽...

Hysan Place 1/F 超人迪加與巴魯坦星人場景(必到熱點之一)，呢個係最多人流的地方，所以要影無人阻的相絕對有難度！場景中超人、巴魯坦的比例聲稱是1:1 等身大。

圖中位阿叔成日走上去影番出黎，引起現場其他影相人士不滿，事關有人入鏡令原本設計成巨人場景的比例失衡。

報導指呢兩個1:1 的公仔賣18萬... 不過我個人認為18萬買2部退役巴士玩好似仲過隱！憑小弟多年來對超人模型的欣賞，呢個情景的確做得幾生動，之不過個迪加總係好似膠膠地，個樣有D 怪！公仔熄左燈你會覺得同玩具無乜大分別XD！

巴魯坦的紋理比較複雜，1:1 公仔同真巴魯坦(下圖)比較就有較明顯的簡化，略嫌未夠仔細~ 不過已經很好！而最精彩當然是不同時段都有真超人出場與大家合照的時候！此安排值得讚！

巴魯坦與超人老母

超人老母全程都很少大動作post，像給人一個溫柔的感覺...

這個銅鑼灣模型場景令人拍案叫絕！連建築物上的其他物件都很仔細！另外個垃圾筒好熟口面，咁似近期出的1:18 情景的???? 如果巴魯坦同迪加踩住的係巴士車廠，或背後是巴士車廠被破壞前的一刻相信亦相當震撼！

Hysan Place 入口，喂差左隻Ultraman Zero 喎！

隔離仲有座有少少似圖書館的東西！

仔細觀察會發覺有唔少超人店在模型入面，雖然真實無存在，卻又可以理解，正如Wmb 搞模型展，都會擺好多Wmb logo 的告示板、80T 搞的巴士模型展入面都總會有間80T 玩具店一樣^^！

還有不同設計的告示~

Ultraman Tiga 超人迪加出場~ 親民的迪加願意與路人合照~

我一直都好奇，光之巨人都係人黎，他的視線... 是如何......

Ultraman Ginga 超人銀河~

呢個大叔咁熱情周圍影，早知我又係唔係都走上去影多D角度啦，唉不過我相信我走上去實俾人趕番落黎！

Hysan Place 門外高約6米的 Ultraman Zero 像~  (必到熱點之一)

據聞這個Zero 的姿勢是首次出現，過往Zero 的片都沒有出這個姿勢！不過我就知佢乜水姐，其他人應該... 所以個介紹牌好多人睇...

地點指示牌...

當然，我的盒蛋見倒個景咁正，都要玩埋一份！展覽的1:1 等身大迪加同我隻盒蛋係一樣姿勢，但隻迪加盒蛋的QC 就比較差少少！

呢個景用黎影巴士模型都相當壯觀！

這個小朋友著了超人衫等候與超人合照！

奇怪，有人話點解超人老母隻耳咁大隻? 但我點睇都似係頭髮黎啦，好明顯係左右兩條辮... 點會係隻耳呀！講都晒氣，不如叫佢上台問真人好過...

盡情破壞吧！睇過訪問拍攝時當有模型被誤毀後，模型是需要重新製作！

現場實在太迫，好不容易才找到空位影超人老母同巴魯坦擺 post... 非常難得！可惜影唔夠幾張他們又離場了...

下一位超人出場前有少少時間，去了同樓層的期間限定POP-UP STORE (必到熱點之一)。有Ultra Act、頭像、7吋軟膠玩偶等等。幾年前開始出Act，每隻索價幾千日圓，港幣都同一架1:76 巴士模型差不多價錢，作為一個低收入人士又邊有錢買得起！隨後日圓上升，所以 BANDAI 玩具都係咁加價，最重要係屋企無位擺Ultra Act (香港地公屋單位有幾大，大家心中有數，我擺巴士模型已經係用盡空間的說)，所以我... 一隻Act都無買過！

最想要的係Ultraman Gaia 底下的效果件，當年超人佳亞電視出場時，超人從天而降，地面有大量泥石彈起，效果件就是那個時刻！(其實個超人咁重，地下D 石都震到飛起，照計隔離D大廈應該受不住震動全部倒塌)

現場的合照環節，記得有個觀眾想同迪加用出死光姿勢對打，被迪加婉拒了！(超人怕死光嗎??)

一個轉身，全場都送來歡呼聲！迪加係超人30週年的作品，下年超人是50週年，這位相隔了20年的超人完全沒有舊的感覺，仍然是相當吸引！小弟不是迪加 fans，如果係迪加fans，現場感受佢的風采，相比起在電視、書本上所見，相信有另一番體會了。

迪加擺post 都幾型~ 可惜搵空隙影超人都唔係容易，影得幾張迪加又要離場了... 

最後是銀河再出場~ 3月日本有決戰十勇士劇場上映，有朋友說銀河需返回日本宣傳... 兩邊走？所以影銀河的機會又是相當難得了。好奇，光之巨人服裝只得一套嗎?? 照計應該會有多幾套... 無理由銀河要兩邊走的...

銀河背面圖案~ 

商場2樓望落去的情況，其實個景係偏細，個場地本來都唔大，要預留行人空間，無辦法，再次證明香港地的地方真係好珍貴... 

係2樓影落黎，可以無人阻影晒超人全身，但要zoom好in，再次挑戰自殺式閉氣防震！

銀河指咩呢???

原來是看見這名身穿超人七號衣服的人士！

銀河的動作實在太快，好多都影唔切... 可惜時間有限，影得幾張銀河又要離場... 

銀河個頭都著燈，相信係參考左Ultraman Saga 吧(上圖)~ 都真係幾型！我都認自己有貪心的時候，如果個模型場景可以再做大範圍少少，可同時容納多幾個超人一齊合照擺post 就好啦... 喂咁難得黎香港喎，梗係總動員最好啦！

到左入夜，地下的Zero 像係街上燈光之下顯得更有型，眼同心口的燈更上鏡！

相當有氣勢！這個造型可以顯得出 Zero 本來比較囂張的個姓，這個6米高Zero 要讚！

呢個時候，我的Zero 盒蛋話要出黎同佢睇下邊個勁D！盒蛋其實有出過左手執大飛刀的姿勢，只係收埋左係盒入面無拎出黎，求其搵個Zero 頂住先~

呢堆相夠唔夠氣勢呢? 只係覺得睇左超人咁多年，咁難得係香港有展覽，唔影下對不住自己姐。其實上面提及隻手持大飛刀的Zero 盒蛋本來想下次再去時帶去影，但之後一直都無拎出黎同個6米Zero 合照，實在唔係日日得閒呢... 唉可惜可惜！另外超人合照環節大會安排在星期六、日，其實之後的星期六日都無時間再去，所以好彩呢次去影倒，同埋好多時有得影就好影夠先走，千奇唔好話佢之後仲有展覽就諗住下次先再影，因為下次就算有你都唔係一定有時間去的！正如巴士大集會入得場無理由話留番幾台車下次先影一樣！

跟住我又唔捨得走上番1/F 影多幾張迪加...

迪加打迪加！

以上就是小弟 Hysan Place 走馬看花記(I)，因為只去了4個熱點，其中一個係超人戰車，位於另一幢商場大約一、二街之隔，不過長期有小朋友坐係度，想話影無人入鏡的相都等唔倒，最後都係無影相！下次分享埋另外2個熱點：磁石場(激鬼氣沒有磁石的)同利舞臺