BHTXWmb: 眼鏡廠大膠諾亞奧特曼2004

九龍灣機鋪咁快就收檔... 捨不得我的頭文字D 3街機！小弟永遠都係咁愛頭文字D 3街機！鐘意玩一款機，係會永遠玩落去，就好似MM2、OMSI 一樣，而家用左MAN SD77/80 11.5米已經超過5年，已經係每次玩OMSI 指定車款xd ~

5月又到尾，收倒呢個信封，又代表荷包將被打劫... 平日辛苦賺番黎的血汗錢就被迫捐晒去俾政府，坦白講倒落鹹水海 / 買晒模型佢仲好，你睇張伯訪港，出動幾千警察，又封路又有警車霸住行車線搞到周圍都塞車，金錢就是被政府這樣無貢獻地白白浪費了...

總結五月少入~

今個月以放車為主，不過當然有唔少車都係蝕本放售... 雖然單靠放車確不能維持日常開支，但成個月只係提左幾舊水，所以本月開源非常理想！Wmb 即日起將盈利警告由紅色級別降至黃色級別！但專家警告其實最近出左好多車都未買，甚至黎緊都有唔少車出，所以開源政策需要繼續維持！

主要入左Ultraman Nexus、Noa！Noa 係搵人係日本搵番黎，成為目前已入手最高價格的大膠... 不過唔滿意的係高度越黎越縮水... 其次係超人之父軟膠及飛龍天星小輪。超人之父係上週同親戚行旺角時無意中發現，特價$19！九十年代價格！不過唔貪心只入一隻！

非常高興80T 終於再出飛龍天星小輪！既然已有GA1614、GA6324、PH6346，天星小輪都是不能錯過的！但上一次出就三百五，今次翻出就唔知點解變左368的... 除了包裝比上一次求其外，無左維河景張卡紙，QC都比較差，仲要只得5% off！而且出第三次都係繼續錯模！內外錯模都完全無改良過就再出... 有少少唔滿意80T / carz 做野咁求其，係就係想佢出好耐但都唔該俾D誠意黎睇睇... 重申，購買天星小輪模型係自己真心支持良心票價(同時反對港鐵、九巴加價)而絕非模型比例精確！如果天星小輪可以出番大比例少少就好，類似巴士1:43 咁的size，不過我睇好難了，Carz 出模型成日都錯模的，想擁有一部天星小輪難道一定要先接受模具的錯處？

平成最神秘、最強而且最型的諾亞奧特曼 / Ultraman Noa / 超人羅亞(超人力斯片集中出場)。今次就玩下2004年出的羅亞大膠... 由於力斯系列市面上極難尋，要由日本運過來，因此也是小弟所購入的大膠之中最高價格...

羅亞係力斯的進化形態，係超人力斯第37集出場，當時黑暗破壞神Dark Zagi 黑暗札基正在城市上破壞，後來得到超人光輝的弧門一輝亦出現與黑暗札基對抗。重溫youtube 片段：

Noa 全身銀色，與力斯的銀力巨人外貌相同，心口紅色燈也代表無限光輝，壓倒性打敗黑暗札基。可惜Noa 只係出左場幾分鐘，就將黑暗札基打敗，所以一直希望Noa 會再係其他超人片集中出場，咁有誠意做套衫出黎就出得果幾分鐘就收工？！加上Noa 的玩具少之又少，食玩無出、頭像又無出，係得Ultra Act 及大膠一隻！至於Noa 大膠的姿勢都做得比較hea... 而家都仲搵緊黑暗札基大膠！因為兩隻超人都係一樣樣，而家二缺一！

Noa！Noa！...........Noa！Noa！無意中係youtube 搵倒片係其他人用Ultra Act 影相加特效，咁岩又做番Noa 與Zagi 的對決場面，好正，Ultra Act 的動作可以模仿番電視片集中的姿勢！仲有Noa 的主題歌！

諾亞奧特曼 Ultraman Noa 超人羅亞 / 奈克瑟斯奧特曼 Ultraman Nexus 超人力斯大膠多面睇：

原來Noa 手上的紋係咁的，之前仲以為隻手套係光滑的銀色！

腳亦有紋理！

其實Noa 個頭做得比較粗糙，但整體都係做得幾似，起碼面形輪廓唔係玩具feel 先XD~ 盒蛋、頭像又唔出，搞到我搵隻Noa 番黎搵得幾辛苦！你諗下，Noa 係2004年作品，已經12年前！但出鏡次數少，其實當佢新超人都得...

Ultraman Nexus 劇中被稱為銀色巨人，雖然沒有時間限制，但人性化後會因為適能者的狀態而令力斯戰鬥時力量也有所局限，其實唔計力斯人性化後的表現的話，個人認為力斯係50年以來最強勁的光之巨人！其實超人都係人間體變身，適量的人性化係好的！Nexus 係第一個全身銀色的超人，只係手同埋心口係紅色！根據不同適能者而定，Nexus 亦可以變成紅色、藍色，12年後先知道傳說中力斯有橙色的版本設計... 當然劇集中沒有出現所以連我呢個力斯fans 都唔知！

Ultraman Noa Ultraman Nexus。力斯隻手應該係十字死光黎，但我自己覺得個姿勢做得唔似所以索性擺低佢，如果對峙的話應該係握實拳頭，拳頭版本我都仲搵緊唔知邊度買倒... 買一個超人要10年都未齊(2006年TVB播才認識力斯)，真係... 人生沒太多十年！有時寧願貴D都想快D買齊！

Nexus 眼睛的三間紋好正！其實Noa 同Dark Zagi 都有三間紋係眼中間，但Noa 大膠上色了事無力斯做得咁靚，Dark Zagi 就仲未買倒！！！

咁多年眼鏡廠出的超人大膠越黎越細隻，開頭以為Noa 同力斯一樣高，點知泊埋一齊都係要再矮1cm... 其實本身力斯同舊時的大膠比較都已經做矮左成個頭，Noa 加埋對翼都唔夠初代果幾隻太郎、尼奧咁高...！加上Noa 對眼竟然上色了事，力斯都叫做係做左半透明，有番鹹蛋眼的特徵... 唉鬼叫力斯系列出的玩具咁鬼少，要擁有一隻超人力斯、超人羅亞就一定要接受生產出來的不足之處。自從6年前行玩具店見過大膠開始，一直認為係幾唔錯的超人收藏品，但縮水省成本就難免令人不滿意！力斯打後出的大膠本人亦決定唔買，一來力斯打後再出的大膠再矮多一個頭，得2X cm高，二來自己都無咁多錢同空間陳列了... 一條線做得衰，原來真係會令人卻步的！

Noa 腳底的2004年字樣(左)，同Nexus(右) 好明顯，Noa 係縮左水...

變成紅色力斯的L字形手譜出死光，片段中與Dark Zagi 對戰時亦有使用！

再變成藍色力斯，心口的能量轉換成弓箭從右手發出，無見過藍力斯出十字死光，弓箭的威力相等於是死光！片段中與Dark Zagi 對戰時亦有使用，但被Dark Zagi 瞬間消除！

用Nikon 18-55 F5.3-5.6 non VR 影真係好辛苦！影相當然唔係全靠器材的上乘，但上次用某某支定焦F1.8... 同一個場合用F1.8 可以用1/320 拍攝，而自己手頭上的鏡頭在F3.5 之下快門只有1/100，你話？器材唔重要呢D說話係呃人的，大家唔好再講虛偽說話啦！

感謝日本圓谷製作眾多光之超人，超人力斯系列係一套非常好的作品，需然已經唔係新超人，但仍然希望力斯片集中的角色可以安排係其他新作品中出場！咁有誠意做套衫出黎出得果幾集唔夠喉囉！

Wmb 係財困情況下都出席飯局，坦白講真係俾足面大家！最近放膠全部都唔到價，有D bid又唔聯絡交收，賺埋咁夠蝕俾呢D 無良買家... 而家唔儲多幾個五位數字一年內唔洗指意買車... 專家形容情況已是迫在眉睫！去旅行呢D就更加暫不討論，Wmb 宣佈六月、七月份所有BHT 消費活動本人將不會出席！

相機食先真係會飽？唔會！只係餐飯有埋相好似充實一點而已。呢餐食得好開心，7個人圍番五十幾蚊，不過當然淨點以上餐單邊會夠食，要靠咖啡使我善忘一番！不過自己以為任飲好著數，飲完再飲，結果兩小時後自食其果，臨上車番歸時肚痛... 要臨時搵公廁，無冷氣痾到滿頭大汗，又臭又焗慘過焗桑拿！以後都是米貪便宜搞到自己付出代價...