歡迎M1 / 3M1終於都有鐵車推出！擔當九巴十二米三軸先驅的都城嘉慕威曼，小弟自問都係康都臨近全退之前先開始鐘意，甚至全數退役後才覺得從前坐倒佢地的次數太少，主要原因係沙田廠早係吉都未退晒的時候已經調走所有都城嘉慕出市區...！自從2008年312出 M1 模型至今，等左咁多年終於有M1 鐵車！但可惜係非官方出，始終都係無官方十二米都城.... 今次會對比一下2008年312的1:76 M1同2016年Buzes的M1 / 3M1...
M1鐵車同312的M1膠車不經不覺已經相差了8年，同樣8年前的12月6日，係九巴70號最後一天提供服務，到左今日已經8年了！
70 面臨取消之所以引來大批乘客爭相乘坐的原因除了因為路線長適合遊河之外，也主要因為70當時用車以熱狗為主，但由於班次疏落，全線只有十部巴士，平日如無意外有九部係熱狗，假日才派出較多冷馬行走！自從1995年後九巴購入的新巴士已全部為冷氣巴士，故此當時70屬於少數非空調巴士派車多於冷氣巴的路線，此點實屬難得，不過從另一角度看如果70一直客量高企的話可能早已加冷，冷馬多過熱狗都未定。對於個人而言回憶70號同時也回憶起坦克蘭！1989年11月，使用康明斯LT10引擎的利蘭奧林比安十一米(坦克蘭)投入服務，2006年其中幾部 EH 牌坦克由沙廠調往荔廠上掛70，可惜於同年十月底退役，EH牌有15部坦克蘭行車証都同是01/11/2006到期，從EH牌康偈蘭退役那天開始，往後大量熱狗一部部排山倒海地退下來包括都城、E蛇、坦克... 不知不覺EH牌康蘭至今也退役十年了，實在十分懷念呢批靚車。
2008年10月(70取消前)，當時荔廠也再有數部FA-FB坦克蘭上掛70，但這幾部坦克蘭當時也接近退役限期，因此臨近70取消前的幾次遊車河都主要坐坦克蘭，除了趁機會坐70之外也趁機暢遊坦克~
大埔公路沙田段，經過這裡的巴士班次一向十分疏落，某次因為塞車而出現三部熱狗的珍貴場面！
除了70取消外，前佐敦道碼頭 / 佐敦匯翔道巴士總站亦因興建效益不及第三條跑道的千億大白象(廣深港高鐵)而於70號路線取消一年後(12/2009)永久消失！佐匯消失至今也有7年了，以下為攝於佐敦匯翔道的70號：
EV5641
FB5764。曾經有特見報告誤把FB5674寫成FB5764
GA6027
以前覺得背後的國金二期外觀很不討好，估唔到而家每天都進出這座大廈... 世事實在奇怪呢！
GA1429
GK3088
FK455(因70荔廠無冷馬掛牌，所以係冷代熱...)
FA9288
永恆70！睇番當年影的70 巴士相，唔少熱車都係沙田廠踢俾荔廠，自己線就係咁提早全冷包括樓下條82M、82S...，到2011年暑假更加有幕後策劃中暑事件！據記載一名熱狗司機前往沙田火車站中途於沙燕橋位置因身體不適把巴士停下，引起公眾對熱狗是否需要淘汰產生迫切性想法。但後來網上有報導指該中暑事件是幕後安排，司機可能只是服從命令！據引述事發當時是該名司機收工前最後一程，事發地點距離總站亦只是尚餘幾百米，事發時間亦不是當日最炎熱的時間... 其實中暑並不單只發生在熱狗上，空調巴士也曾經發生中暑事件，但矛頭直指熱狗，所以最後沙田區所有路線提早於2011年全冷！8年以來眼中，70每日仍然有熱狗行緊，只係時間誤差碰不見而已！
題外話，進入最後幾集的Ultraman Orb 真係唔睇唔得，前排忙有時唔記得睇，過左1星期條link又失效，好彩最近終於再發佈!!
係未使用貝利亞力量前，我覺得Orb 就算用埋Zero 力量都係一般，怪獸只要稍為強少少就已經唔夠秋！但暴走的貝利亞出現，先至覺得Orb係一個超人囉... 超人出場係打怪獸而唔係俾怪獸打！最衰Orb 無力斯出場，唔係應該幾精彩... 就算黎緊的劇場版預告都只見銀河、勝利、X但就無力斯份... 唉好失望！
言歸正傳，今次會分享前後兩間廠出的超級都城嘉幕威曼十二米模型小聚會！↓
十二米長的三軸巴士今天在港九新界的大街小道上隨處可見，但是數十年前，這些龐然大物才悄悄在東方的彈丸之地發揚光大。
十二米長三軸巴士的出現，源於當時港英政府運輸司在八十年代初對香港公共巴士服務發出的指引開始。節錄自書籍<<都城嘉幕都城巴士>>記載：「為了配合香港未來新市鎮的發展及集體運輸的需求，本港公共巴士亦要作出轉變；現時9.5米雙層巴士將被調配行走港島區或一些路窄多彎的山路及市區內橫街小巷。而載客需求較大的主要路線將要一批新巴士行走，新巴士有更大載客量，全長有12米，為避免車軸負荷過重，新巴士有三條車軸、多扇車門，以減少乘客上落車的時間。」
以上指引出現後均令英國的巴士製造商感到非常震驚，因為這是計九巴雙層AEC Regent V(大水牛)、Daimler(長牛)及中巴的Guy單層(長龍)巴士後，再次要生產超出英國法例長度的巴士。
當港府修例後，中巴及九巴在1980年底向各間英國巴士製造商要求生產這種巨型雙層巴士，由於這次修例代表未來將陸續有更多巨型巴士的需求，故此生產商便把他們現有的巴士底盤作出改良以節省由頭再設計的時間，務求搶先一步研製出新型號的巴士供香港兩大客戶(中巴、九巴)使用，一場科技與時間的競賽旋即展開！
9.7米Metrobus ↑
結果Metro Cammell Weymann(MCW)只用了5個月就完成了兩部樣板巴士給中巴及九巴使用！MCW的三軸巴士型號稱為Super Metrobus，顧名思義這款新巴士取材自兩軸的Metrobus。MCW把自家出品的9.7米Metrobus兩軸巴士底盤加長至12米，在原本兩個車軸中間加上一條沒有動力功能的車軸(假擔)，引擎仍舊是後置以尾軸驅動。此設計不但毋須考慮新車的轉向問題、更可避免新車延長引擎至尾軸距離而產生問題，而為解決冷卻液能循環不息地在長度增加了的底盤上流動，廠方更在冷卻液喉管內加裝水泵，以加強液體流動效果。
超級都城嘉幕威曼十二米載客量可達170人，當車輛滿載乘客時全車重量將達24公噸，因此Super Metrobus採用6隻全氣墊式懸掛系統，在到達總負重量的情況下氣墊彈簧仍能承受，而且還可在適當時候發揮自動平衡的效果，避難車身明顯傾斜。
MCW之所以能在短時間內(比製作新巴模時間更少)提供新巴士給香港的用家，是因為MCW車廠本來已有生產兩軸Metrobus，故此技術成熟，加上MCW曾經為中巴生產過長軸距的兩軸Metrobus，長度更達11.45米！在擁有這種經驗下根本不需要再投放資源和時間去發展新巴士底盤。況且MCW車廠有自家車身組件供應，不像其他英國巴士製造商般要由其他廠家提供車身，在種種有利條件下，MCW確實快人一步、勝人一籌地生產出堅固、耐用的大型巴士給香港的巴士公司！
型號：都城嘉慕十二米
車牌 / 車隊編號：CN870 / M1
體積：長12米 / 闊2.45米 / 高4.35米
引擎：勞斯萊斯
波箱：Voith D851
馬力：235匹
服役年份：1981-2001。05/1981-11/1995(九龍巴士) / 11/1995-05/2001(訓練巴士)
載客量：上層77+下層47+企位36=160
1:76模型資料：
生產商：312
限量：各230
推出日期：2008年8月
九巴第一部三軸12米Metrobus(M1)於1981年初連同中巴ML1一同來港。九巴M1車箱佈局以座位較多企位較少為主，座位數為上層77、下層47、企位36(共160人)；中巴ML1則相反，座位數為上層77、下層33、企位60(共170人)。M1車箱內傍板以手髹漆油上蘋果綠色，上層車頭擋風玻璃是本港標準推拉式設計，和中巴ML1的雞翼窗有分別。機械方面M1選用了著名的Roll Royce勞斯萊斯Eagle 230L，馬力可達230匹，雖然今時今日新型號的12米冷氣雙層巴士馬力可達330匹，但八十年代初M1是當時馬力最大的巴士，配合Voith D851三前速全自動波箱，行車表現相當理想，經過一連串驗車程序後，M1在1981年5月19日投入服務，車牌為CN870，比中巴ML1足足遲了兩星期！
312 M1 ↑
和中巴一樣九巴亦將這部三軸巴士安排行走112線，因為112客量多，長身車可以派上用場，而此線途經旺角及銅鑼灣兩個興旺地區，派新車行走間接也有宣傳效果(到左今日九巴仍最擅長派新車宣傳自己服務質素好，但事實係點卻心中有數)！
312 M1 與 buzes M1 ↑
1:76模型資料：
生產商：Buses Model Co. ( 簡稱buses / 本文稱 buzes )
限量：各499
推出日期：2016年10月
buzes M1 ↑
312 一向都係非官方，要自己上巴士公司logo，但buzes 今次都係出非官方，連水貼都無俾，係有點兒過份！如果官方出，318有交易，佢出非官方收多人幾十蚊仲要無水貼、80T無九折，難怪咁多人批評！
312 M1 與 buzes M1 ~ buzes M1 隻紅色較暗，望落去312 隻色比似真車，可惜312 M1車窗膠片因為擺得耐已經變黃左... 真車應該係綠窗，但就算無發黃，312熱狗果D綠窗本身都做得唔夠綠的...
除112，九巴亦把12米Metrobus試行於一些新界路線，如66M、70M(後來重組路線號碼被改為80M)，為日後三軸巴士開往新界作好準備。其後九巴接收多2部三軸12米Metrobus，分別在1981年下旬投入服務，自然也成為112的掛牌車！但九巴之後沒有再購入同款巴士，因此12米三軸Metrobus 在九巴車隊中只有3部！印象中，九巴在購入三軸Metrobus 之前是未曾向MCW 買過類似型號的巴士，而據說當時一部全新三軸12米Metrobus 要85萬港元！
有個講法話由於九巴隨後開始購入9.7米兩軸Metrobus，故此把原本的M1 改為3M1(三軸Metrobus意思)，而9.7米兩軸Metrobus 編號就稱為M。由於資料不足，M1確實更改編號的日期不詳... 而另一個問題係，從M1行走70M 的照片所見，當時的M1已改為3M1，而且內籠已經改為啡色，但由於資料不足無法確定3M1是否在翻新內籠後才行走70M...
睇番3M2、3M3 行112的相，呢2部車已經用3M做編號但內籠仍然係蘋果綠，如果3M1 係同3M2-3 一齊改編號話，咁M1 係112時期已經轉左3M1，而後來行70M 就肯定以3M1的編號行，無可能有M1@70M呢個版本！咁姐推斷312 70M 版本的編號錯左
312 M1 ↑
312 70M 係Wmb車廠中車身變形程度較嚴重的模型，除車身外，112同70M的車窗都有谷起的情況，呢點作為模型收藏者真係覺得好無奈！呢堆貨尾買番黎已經係咁，估計賣出之前擺倉已經擺到車身谷左出黎... 就因為膠車有變形危險，才會希望鐵車生生性性姐，點知buzes 都係令我失望的！
buzes 3M1 ↑
buzes 3M1 vs 312 M1 ↑
綜合以上資料312同buzes 都有錯處：第一，M1行112時期內籠係蘋果綠色，312 就做左啡籠！第二，M1改3M1的時候內籠仲係綠色，所以轉啡籠行70M 時期無理由仲係M1，312 70M版本就寫左M1...第三，以現有資料顯示3M1行70M時期內籠已經係啡色，buzes 就照做左綠色而且車軸變左紅色... 係咪玩野呀！
buzes 3M1 vs 312 M1 ↑
另一個特點係buzes 70M 版本係紅色車軸，但搵過咁多資料都無見過3M1@70M 時期係紅色車軸，反而黑軸先係正常的，所以從現有資料所示，buzes 70M 版本應該係錯的... 最衰佢個紙盒又一張真車的圖都唔印，根本証明唔倒 buzes 70M版本係咪有根據！雖然模型出得就係應該真的... 但似乎 buzes 出錯的機會都好大！
buzes M1、3M1 及 312 M1 ↑
312 M1 ↑
buzes M1、3M1 ↑
小弟一直覺得巴模售價同質素唔成正比，當年Dw 同Bc 的11米都城同富豪確係另人眼前一亮，但近年巴模不斷加價，手工卻未見改善，312 幾乎每出一次就加一次價，內籠仍然十年如一日無改善過咁濟！buzes 12米都城上年出ML 果時已經賣398，而且80T連九折都俾唔倒！同期九巴官方車398係精細版，buzes 呢部唔係精細版極其量賣咪番368... 同312比，buzes 內籠係贏，因為312內籠可以講係出得最差的一間，同最差的比根本無意思！buzes 內籠一個幾大的問題係通道太窄，睇下下層側位的扶手幾乎起到通道中間，如果真車係咁一個成年人肥少少打側身都未必入倒... 不過模型有問題又唔淨只呢2間的，例如Carz 咁，一樣係差強人意，難怪唔少人批評呢D生產商收人呢個價又俾唔倒應有的質素...
312 M1 ↑
buzes M1、3M1 ↑
buzes M1、3M1 及 312 M1 ↑
buzes M1、3M1 ↑
都城串燒，以下危險動作切勿模仿！
buzes M1、3M1 及 312 M1 ↑
就咁睇，我都唔覺buzes有做綠窗既... 似全透明多D...
加分享Buzes 出品S3BL... 禾輋小聚會
1:76模型資料：
生產商：Buzes
限量：1800
推出日期：2008年9月
buzes 利蘭呢款模，2001年出中巴老虎果時係幾耳目一新，但生產商多年來不思進取，巴士公司又收貨呢度先神奇喎，那邊要出精細版，呢邊仲出緊玩具版... buzes同一款模玩足十幾年，仲長命過當年早退果批 EJ, EK 牌熱狗... 結果熱狗而家已經退晒了，新 / 似樣的利蘭模都仲未見有... 實在令一眾熱狗迷失望...！
11.3米vs12米 ↑
今次未影中巴ML1 初期版，因為太貴等唔倒特價所以未買... 下次影埋中巴再post 多次。因為模型場景唔夠大，4架巴士車頭平排已經擺滿，所以車同車係要迫埋一齊，幾本上一定會碰倒後鏡，所以影相要好小心！都係期待利蘭新模同埋3M1、2、3 的後期色彩...
沒有留言:
張貼留言