BHTXWmb: 十一月少入及1:76 龍運巴士小聚會

十一月少入：

有Dennis Dart@51、216M... 兩款qc都好差... 打風問題嚴重！其實本來只想買51，點知係80T望望下又買鬼埋216M... 上次機場版398今次368... 其次係BL@29M... qc好差、上層車頭好多架都谷模，而且又打大風... Carz 出車真係次次都揀餐死。

黑暗札基Dark Zagi 係焦點入手，呢隻係超人力斯大膠系列中數一數二貴的，不過有些店賣得仲貴過我入呢隻個價！力斯係06年香港播出，至今超過十年，無諗過係多數人眼中可能唔值錢或者覺得周圍都買倒的超人玩具，小弟足足於電視片集播出後十年先至買倒囉！加上自己鐘意呢套超人，所以幾貴都會入手，11月俾我入倒呢隻正野就當係俾自己的生日禮物！

我隻羅亞放左入倉，搵日要拎番出黎同札基合照下先！

1:76 龍運巴士模型小聚會：

龍運巴士是由九龍巴士於1996年成立，是用作競投當年運輸署招標的北大嶼山及赤鱲角新機場路線，於同年十月獲批來往該地及部分新界區(不包括將軍澳)的巴士專營權，並由1997年6月1日起生效。1997年5月22日，青嶼幹線通車，龍運巴士開辦其首條巴士線：E31，來往東涌市中心與舊荃灣碼頭。

由於一向少坐龍運巴士，加上對龍運巴士常見的鐵甲外貌Dennis、Volvo興趣不太大，所以模型都只係買過二、三款，仲要係靚價先捨得入！

某日，Wmb 幾部龍運巴士因車廠工程影響，停泊在臨時泊車處！

型號：丹尼士三叉戟十二米
車牌 / 車隊編號：HN9680 / 122
體積：長12米 / 闊2.5米 / 高4.4米
引擎：Cummins M11-305E(EuroII)
波箱：ZF Ecomat 5HP590
馬力：305匹
服役年份：1998-2013(龍運巴士) / 2013-2016(九巴)
載客量：上層59+下層28+企位41=128

1:76模型資料：
生產商：Carsworkshop
限量：1200
推出日期：2011年4月

呢部小飛俠係小弟第一部龍運巴士模型，因為當時有另外幾部小飛俠推出，受齊套思想影響加上出E42 沙田區路線，絕對值得入一部... 不過Carz 出的模型就始終有少少令人失望。話說呢個Trident 新模係2010年底出，價錢仲由298加到328，係咁的加幅之下對出黎的實物當然係失望啦，車殼用兩件模車頭大銀幕谷谷地都算，車頂又太厚，上層兩邊A柱又做唔倒真車果條摺痕，總之車頭成個輪廓都同真車有一段距離... 其次當然係carz 幾乎架架車都存在的谷模問題及打風問題，兼且Trident上層車頭的孖柱幾本上係有少少貼住車窗弧度，但模型全部做到平晒！

Carz Trident 除左車殼做得差，內籠亦都差強人意，座位倚背正常係微微向後斜去配合正常人類的座姿，但模型手工差，望過好多部大部份倚背都反而向前斜，試問如果真車係咁我寧願企位！而且頭枕高度都無跟足真車，做到比無頭枕高少少但又矮過有頭枕少少... 估計係想就番之後出新巴的內籠而且一模兩用，製作完全無誠意！其次廣告貼在車身同窗之間條隙比較粗，變左見倒梯位個小飛俠塊面好似有條黑線劏開左咁... 本來係少問題但因為谷模令情況明顯左... Carz D模型要彈的話真係成頁紙都講唔晒，你話點科水先得假... 唯一可以讚的係車尾做得幾似...

雖然彈多過讚，但因為龍運的丹尼士三叉戟十二米已於年中全部退役，實在好想有模型出！呢個模雖然出過已轉交九巴後的前龍運三叉戟，但實際上未出龍運時期色彩的三叉戟包括兩款座倚，所以個人都係期待快D出埋龍運原色三叉戟啦...

E50D 係第二部龍運巴模，但其實之前出的單層都想入，後來都係覺得貴無買。自從E50D投入服務以來，小弟一直滿意呢款車的行車表現，所以龍運模型都入左部... 龍運巴士於2013年購入丹尼士十二米 Enviro 500 MMC(又稱E50D)，主要取代丹尼士三叉戟巴士，部份丹尼士三叉戟巴士轉交九巴並改髹九巴色彩繼續服務，但大部分已於2016年間退役。

型號：丹尼士Enviro 500 MMC
車牌 / 車隊編號：SM2635 / 9513
體積：長12米 / 闊2.55米 / 高4.4米
引擎：Cummins ISLE340B
波箱：ZF Ecolife 6AP1700B
馬力：340匹
服役年份：2014年
載客量：上層55+下層25+企位47=127

1:76模型資料：
生產商：Carsworkshop
限量：1800
推出日期：2015年11月

Carz E50D 同 Toy1 E50D比，Carz E50D做得比較幼細包括A柱！不過正面望車頭的話，Toy1的反而順眼過Carz，牌箱對上左右窗邊位carz 做到起角，但真車弧度係順滑而上、而且carz 上層窗頂做得低左，可以睇番真車上層車頭窗最高位應該係高過側面窗，但carz 車頭窗最高位置反而做得低過側面窗，加上頭窗裝入去之後上層空隙比較大，呢兩度係成個模最大問題！不過車尾做得幾好、內籠D凳同Toy1比，Carz 係優勝，Toy1 D凳厚過張綿被，簡直不知所謂！但Carz 龍運E50D的QC好唔穩定，打大風之餘車尾D字仲印到甩色... shxt！Toy1、Carz D模型要彈的話真係成頁紙都講唔晒...

第三架龍運巴模就係期待已久的富豪十一米。1997年九巴借了5部富豪奧林比安十一米予龍運巴士，基本上這5部富豪是新車投入服務時已髹上龍運巴士色彩，其中HH2032 全車座倚是橙/淺橙色，而與其他龍運巴士不同的是這5部富豪並沒有龍運巴士車隊編號，龍運巴士於1998年底把此5部富豪歸還九巴。

型號：富豪奧林比安十一米
車牌(車隊編號)：HH2032(AV242)、HH1452(AV240)、HH1412(AV239)
體積：長11.3米 / 闊2.5米 / 高4.4米
引擎：Volvo D10A-245
波箱：Voith DIWA 863.3
馬力：245匹
服役年份：1997-1998(龍運巴士) / 1998-2015(九巴)
載客量：上層53+下層38+企位29=120(下層增位前)

1:76模型資料：
生產商：Best Choose
限量：350 / 350 / 400
推出日期：03/2016-08/2016

HH2032

呢個富豪模最初係2007年底一篇文章見過，當時係準備於2008年推出鼠年生肖巴模，過往的1:76 富豪巴士全部都係玩具外貌，根本無一部似樣，直到呢個模的出現，才覺得巴士模型界的產品係有希望的！當時留意倒上落車位置的傍板，真心覺得比唔少巴模生產商的出品有心，至少Buzes 出的利蘭玩具都無做傍板呢樣野... 到左2016年雖然已經唔再係新模，內籠亦唔係識飛，但經過內籠分色的改進，整體絕對唔失禮！甚至比唔少近年所謂的新模更加似，不過係好奇車軸好似做短左，遠睇凹左入去。

留意到模型有個搞笑之處，其實都係一個小錯處，但無乜人會講，可能無留意到未定？早期版的水塘豪水塘位原本有6個座位，後來拆走6個座位改為10個企位去增加載客量，模型最初係出水塘豪，所以內籠個模本來已經無做呢6個頭枕座位，但出龍運豪就要加番呢6個座位！究竟點加呢？bc 出過的冷氣利蘭車箱就有呢6個座位但無頭枕，結果佢將呢6個無頭枕的組件copy 去水塘豪相同位置... 但因為利蘭係無頭枕所以座位肯定矮左的，佢將呢6個無頭枕的座位拉大左令高度同有頭枕的座位一樣高！你可以拎架龍運豪出黎望望，水塘位果6個座位其實無頭枕的XD！

HH1412。唔少人覺得失望的地方係路線牌字太大，呢樣真係有少少跌眼鏡！不過E42沙田線，龍運E線黎講E42 係搭得最多，唔會唔買番部啦講真！不過bc 出呢幾部龍運巴模豪係非官方，要自己上水貼，而且qc 普遍幾差，包括油出界、谷模等等，睇幾架先有一架落倒手，但好彩無乜打風！

龍運豪最大特色係車身有3個配搭：橙白、紅橙白、紅白~

HH1412

HH1452

三色富豪串燒~

HH2032 @E32 地鐵時期的站名，而家已經改用鐵路站！

龍運巴士S64、E31、E32、E42合照！以前有D牌寫東涌中心，有D就寫東涌市中心。3款顏色的富豪bc 各出兩部 / 兩線、目的地，不過無係今次出現的另外兩部都係E31，所以唔show 咁多了~

下次玩埋啟德時期機場線小聚會先~

客串AVBWU 281A

聞說HN9680 小飛俠行過281A... 我都唔知有...

反車係諷刺富豪巴士壞車頻密，11月3日早上一名姓張的碌車王駕駛一輛AVBWU 281A 沿沙田路準備進入獅子山隧道公路，當時前面無車阻檔但大慨因為碌車原故車速只有5X/h，剛剛轉上最高波段，但姓張碌王無繼續踩油使車速處於下降狀態並降至30km/h，本人感到不滿為何於公路上可以用30km/h 慢速前進！司機時兒踩油又放油不久出現強烈震動，大量手機、行李掉在地上，熟睡的乘客被驚醒，由於新田圍位置有斜路，此時車輛仍然是在最高波段極低轉狀態，斜路在前方司機嘗試踩油但維時已晚車輛無力加速！最後於新田圍巴士站對開死火！如果姓張碌王當時判斷巴士已經失靈但仍然可以踩油前進的話理應繼續踩油，而非將車速減慢才再踩油，以本來5X/h 速度繼續踩油可以將車輛駛到更合適位置才停下！數日後早上，同一車輛於廣源開出，點知又壞車，搞到兩班車時間先開得一班車...

312 推出多明尼達模型... 又係得個炒字，售價本身已經由488加到598，每款仲要出得百幾部唔夠，零售商紛紛肆意加價，以三和為例，推出當日已經加至$880，唔少人為左心頭好都照俾炒價去買！而一些"大店"亦收起存貨在網上放售，以過千元成交... 究竟312 係咩居心先？有心出又唔出多幾百部，每款連250部都做唔夠，自己又出一次車加一次價，等左多明尼達好多年的收藏家始終無法購買！世界變得越黎越極端！因應312 大幅加價，票價自動加減機制亦即時啟動，有相同幅度的加幅！

是次加幅高達22.5%！是平均通脹的5倍，實在擔心無良生產商肆意加價，將會推高其他模型的售價、有樣學樣，最後亦會引致QC下降，同時引起炒風，炒價更高，影響實在深遠！但小市民有苦無路訴，官字兩個口，一定係同你講成本高，你一係買一係唔買唔好講咁多野，但而家買都買唔倒呢問題係，唯有在此表示強烈不滿！

目前票價為短途6.2、長途8.6