全日空，深藍色機尾加上大大隻ANA字樣，早已成為辨認全日空飛機的特徵，而全日空的舊色一直只是在照片中才可找到！JA602A，一部原本普普通通的全日空波音767客機，卻因髹上了復古色而成為同型號中唯一一部。
先回顧一下最近少入，近一個月入車減少，主要因為九巴官方模型售價大幅度加價而決定減少入手，而九巴83週年模型上年夠膽死賣498...結果有關部門存倉為安，新年前80T 終於有198特價，所以入左ATENU、AVBWU... 講真，唔係198我真係唔會買，因為AVBWU蛋模自從俾左carz之後，車頭廣告貼到一忽忽仲要架架都有水貼深色邊，真係浪費左個模...；另外上年order 左的最後幾部美國航空74S同聯合航空細機最近到手！
聯合航空1:400 細機同美國航空74S
美國航空74S 係Inflight 出... Inflight D qc 又係一向麻麻，但有証書！
P&T 模型... 唉，小多係近年入咁多312 模型最嚴峻的一次，因為17 完全買唔倒，82K 都係哎晒救命先有一部！炒價回落實在係一件好事！農曆新年希望今年所有炒家損手爛腳，積爆倉庫放唔出、收埋D貨想加價的店鋪早日關門大吉，早些結業一了百了！今次小多打破本人入手312 模型的最高價格！唉，一山還有一山高，上年3月卡樂B 已經創左最高入手價，估唔倒而家D野加價加得咁密... 炒家當道，班炒家一日唔死，一眾基層買家都係要捱貴車...
稱為ANA Mohican Jet 的復古色配搭有少少似中巴冷氣巴士的車身顏色，對於一些交通工具愛好者，講到復古色會諗起2013年九巴80週年期間的八款復古熱狗色，但全日空的復古色雖然只有一部，感覺卻比九巴的來得大方，因為全日空這部復古塗裝機玩了起碼四年；九巴的八部復古巴士只係當廣告咁玩左幾個月就收左皮！
全日空歷史(網上資料)：全日空(All Nippon Airways) 在1952年成立，日文漢字為全日本空輸，原本長達數十年都屈居於日本航空(Japan Airlines)之後，是日本第二大航空公司，但在日航於2010年申請破產保護後由全日空取代，成為日本規模最大的航空公司。
全日空成立之初名為日本直升機公司(Nippon Helicopter)，而全日空的IATA code－NH就是取字該公司英文字首。日本直升機公司經過了數年的草創艱難時期，正式於1960年初期更名為全日空，在1963年併購一家小型航空公司後加速了公司發展，並在1964年引進首架噴射機－波音727。不知不覺全日空與日本航空在1970年代的國內航線載客量已呈分庭抗禮的局面，最後全日空坐上了國內航線載客量龍頭寶座。在1986年起，全日空開始發展國際航線，航線的擴展相當快速，對於日本航空的威脅已愈來愈嚴重，隨著業績的提昇，全日空陸續引進波音747和波音767等廣體客機加入機隊，並在2004年首度盈餘超過日航。
全日空為人印象深刻的是其飛機以藍色系為主的塗裝和尾翼藍底與白色ANA的標誌。這個以深藍色系為主的塗裝其實是始自1986年，全日空早期的塗裝是以淺藍色為基本，尾翼上有全日空的初始商標－モヒカンルック(Mohican Livery)，這個標誌是一個圓形圖案，當中繪有抽象的直升機，四週為全日空的英文全名(與中巴同九巴初時的logo形狀上很相似)。這個商標一直跟了全日空30年，跟全日空是以直升機公司起家有絕對的關係！現在就將全日空史上曾出現過的幾種塗裝概述如下：
網上照片
第一代塗裝：機身中段自機鼻延伸到機尾有與窗戶同寬的深藍色條紋區分機身上下兩段，上端前緣漆上漢字全日空黑字，後端為ALL NIPPON AIRWAYS黑字。尾翼，白色底漆，有直條深藍粗線漆於外側，中為全日空初始商標。第一代塗裝約略存在於1950年代後期至1960年代後期。
網上照片
第二代塗裝：機身頂端自窗戶有淺藍色條紋延伸至尾翼前端、中段自機鼻延伸到機尾有與窗戶同寬的淺藍色條紋區分機身上下兩段，上端前緣漆上漢字全日空黑字，後端為ALL NIPPON AIRWAYS黑字。尾翼，淺藍色底漆，中為全日空初始商標。此塗裝約自1969年5月至1989年3月間使用，JA602A的復古色便是這個版本。
網上照片
第三代塗裝：自尾翼往機頭有深藍色和淺藍色斜紋，機身上端前緣漆上漢字全日空黑字，後端為All Nippon Airways黑字或僅有漢字全日空，並無英文名稱等兩種格式。尾翼為接續機身藍條紋的深藍色底色，外緣有淺藍色細紋，尾翼中央有斜置的ANA白字。全日空自1986年起逐步更換為此塗裝。
網上照片
第四代塗裝：此塗裝約自2001年開始使用；大體上塗裝均與第三代類似，但機身以白色ANA大字取代以往的漢字與英文名稱，並在ANA前端加上全日空標誌。
網上照片
波音787塗裝：此塗裝是專用於波音787，由於全日空是波音787的啟始客戶，全日空希望使用一個有別於其他飛機、並專用於波音787的特別塗裝以達宣傳之效，這個塗裝大致仍沿襲著第四代塗裝，但在機身前緣兩側加上深藍色787字樣。
全日空歷史上的標準塗裝大體上僅有以上5種，但全日空更為人所印象深刻的塗裝反而是神奇寶貝彩繪機，全日空曾靠著神奇寶貝彩繪機的吸引力，創下國內線極高的載客率，相關的飛機模型更是價格驚人。2009年時，在社員提案下重新復刻第二代塗裝於一架波音767-300客機上，編號為JA602A，於1998年1月服役，2009年髹上復古色後於同年12月1日首飛，飛遍日本國內航線。在2014年8月11日完成復古色的最後一趟任務後曾在桃園機場長榮航空修護工廠進行D-CHECK，在台灣待了三週多的時間才飛回日本並回復標準色，不少航空迷都曾在桃園機場長榮航空修護工廠外拍到這架飛機的英姿，可惜小弟對這架復古767認識得太遲，無機會一睹其風采...
轉載自http://cwhung.blogspot.hk/2014/08/ja602a.html 在台最後告別的全日空JA602A復古塗裝機
JA602A已於2016年7月離開全日空，是次將分享1:200 模型以作懷念！去年9月入手，不過因為屋企無乜位的原故，用Sigma 50-500mm 長鏡影完相之後已經存倉為安...
機型：波音767-381
服役年份：1998----(20/01/1998-05/2016-全日空、12/07/2016----AIR DO)
長度：55米
機身高：5.41米
總高度：約16米
機身闊：5.03米
翼展：48米
座位數目：218-351個
淨重：約八萬六千公斤
滿載起飛所需距離：約2.4公里
最高速度：9XXkm/h
JA602A ANA係JC Wings出，JC Wings D機主要係機翼同機身的接位有條隙，有少少似巴士模型用兩件模的情況，但價錢就適合我呢D 窮L玩... JA602A 限量240部，2014年9月出，但JC Wings 係唔肯印埋証書...
500mm下的767，十分有氣勢
全日空藍、白色的簡單色彩配搭就好似藍天白雲一樣，與日與空十分配合，所以專登用番藍天做背景襯托一下！
超臨界機翼起飛姿態
本來呢，對全日空呢隻色就唔係十分熱切話要買模型，不過李生張生成日引誘話唔買遲D無晒買唔番，加上唔係貴最後都入一部... 其實都值得買的，全日空767投入服務果時都已經係新塗裝，情況同九巴80週年一樣，批蛋出牌時已經金色，現實就無出現過熱狗色既！如果佢肯出1:400 會好D囉... 但JC wings 1:400機底一定粗隙... 好心改下個模啦...
舊全日空logo 可見當中有抽象的直升機，四週為全日空的英文全名
剛剛玩飛機時，感覺JC Wings 做機翼的隙係幾粗，最近發覺原來唔少其他廠D舊模都係咁上下，架架都有少少油出界的情況，其實同巴士模型的QC差唔多，巴士要睇埋內籠所以難搞少少，飛機根本理唔倒咁多，因為無得開盒驗屍！
1:400 Wmb國際機場上，1:200 的波音767降臨，本來諗住有機場景，比例唔岩尤得佢，點知睇睇下越睇越覺得唔match... 但又唔想浪費左堆相，所以搵左幾張近鏡的照post 上黎，同樣都係用Sigma 50-500mm 手持操刀！
767-300長55米，如果擺1:400機場上，1:200 的現實版即等於有110米長，體積是1:400的八倍，機師有無咁好技術去控制？
早排淘寶見倒1:200 車仔十蚊八蚊一大袋，諗住入黎做情景，喂但機場入面正常應該唔會有私家車的喎？1:400 的話太細又太假，要做情景有時真係甚艱難！總之有機場有飛機就算鬼數唔想搞咁多野...
1:200 機頂上的透明燈及天線，如果1:400 只會係印一點紅色上去...
不過其實覺得1:200 飛機模型都係有少少玩具feel，e.g.機身的骨位無印埋上去、機身平滑、襟翼唔做打開、機頭鼻咀好多都無印個圓形上去，有D有印但印到斜曬，會唔會如果係樹脂膠模的話會精細好多呢？合金雖然有重量唔會發黃、變形但好多時一舊鐵就算，突然間幻想如果carz、312、buzes、dw、bc 起模出飛機的話會唔會做得好D呢？唔洗好似巴士咁要整埋內籠，專注做好外面就得，所以有D人覺得飛機模型賣得貴係真既，因為得個殼，1:400細細架都賣幾舊水；1:200 雖然大架但QC、像真度又唔係話靚好多，價錢多一倍個質素只係好少少，機身有污漬抹唔甩都唔出奇因為自己有幾架係咁，簡單講機身越大就越易有QC上的問題，機翼平行都係要留意，因為可能有高低不一、垂直變傾斜等等情況，但又無得選擇喎因為有D機型今時今日係好難搵，有都貴左唔少但又係舊模因為出左好耐！正如美國航空鋼管色767-200、757-200、聯合航空戰機灰色767-200 好應該出1:200啦... 但都未見曙光=.=" 而家AA 767-200、757-200同UA 757-200、767-200 1:400 又唔齊、1:200 又唔齊... 都幾無奈，買家同生產商又缺乏渠道溝通！
全日空飛機的編號多是印在機翼上，另一邊翼就有圓形紅點，以前文具鋪賣的全日空飛機玩具都有做呢兩個特徵，又假唔晒^^！
波音767 個人認為係各方面表現最平均的機型，雖然比747細很多，但比737、757 大，亞洲用戶黎講全日空擁有最多767，ER型航程超過一萬公里(可誇越太平洋)，雖然機倉空間不及DC-10、MD-11，但燃料消耗相對較三引擎低，呀特_ _總統用757黎改私人機，佢都傻的，識改梗係改架767-200做私人機啦！
雙發引擎，通用電器CF-6-80C2B6F ？
再見 ‧ 全日空JA602A(1998-2016)
從youtube 轉貼一段JA602A 片段
話說最近上fb 都會見倒好多炫富的人，其實為人喜唔喜歡炫耀，拆利事一件咁少的事會見倒既，每逢拆利事的日子都有唔少人對住堆利事同錢影相放上社交網站呃like，早幾年仲多小朋友係咁，個人真係好討厭呢D人，收利事係一種祝福並唔應該拎黎曬命，拎成疊錢出黎影相好把炮？好有米？係咪覺得自己擁有左全世界？好心呢D人得閒做多D善事啦，淨係識得曬命呃like！拿所以話fb 係一個邪惡網站黎，可以分化人類，社會上貧富懸殊，呢D人係度炫富呃like 的行為間接增加社會上仇富的心理，久而久之就會有一些人對呢D 乳臭未乾只懂呃like 的白痴仔形成怨恨，因為覺得你生活富足而自己生活艱苦，唔公平，容易做出過激行為例如斬人、放火、開槍殺人之類，根源問題始終係人為、社會造成！話說做野果度有個人新年期間扮清高，大大聲話唔會收利事，話因為佢做人有原則，哦，隔唔得幾耐呢就有意無意其實故意同人講某某俾左幾多錢利事佢呀... 旁人聽倒表面替佢開心因為出於禮貌，但其實心諗，憑咩話自己有原則姐，有錢唔要你有無咁清高呀？咁有原則應該一封都唔好收呀麻，收完又要忍唔住曬命話俾人聽自己有幾多錢，自相大矛盾，咁樣既造詣會唔會低左少少？
沒有留言:
張貼留言