這次終於的起心肝影呢2架胃仙U廣告巴模，其實打算影好耐...
十年前小弟路過彩虹巴總時，間中都會見到呢架行走113的胃仙U富豪，大約3年前，Model1(Toy1)推出呢架巴士模型，基於那些年自己成日見到呢架車原故，所以買了一部以作留念，之後Toy1 亦出埋另一款E500MMC 12.8 Facelift 較新的胃仙U廣告，早排終於在會員特價時200蚊入手，就當是儲一套胃仙U廣告模型吧~
先來GV6348 / VA36 Volvo Olympian 富豪奧林匹克11米
好記得呢架車拎到手時，除左靚qc 已經俾人分晒之外，最難過係剛剛被人呃左一大筆錢去，真係蝕到入肉，那些年自己都好主張支持非官方車出品，因為覺得好多非官方做的車都好有心做，所以多數非官方車有車出自己都會買，但自從當時財政狀況持續處於警告狀態，好多車都等特價或者唔買，當時仲平價放左唔少車出去，所以當我望倒呢架車，某程度上又會諗起當時處於低迷的處境，因此一直沒有拆盒拍照，但明白到有些事總要面對，被人呃錢只能說自己倒霉到一個點，但與此車始終無直接關係，所以決定為呢架車影番四面相！幸好事件發生後經過兩年的努力，財政重新回復到戰前水平，再一年後的今日，基本上可以忘記過去，這個局面自己都是滿意的，我最多只是損失了兩年多少少的青春去將財政狀況回復戰前水平，雖然話口未完未來的環境仍然多變，但WMB 好有信心可以克服困難，這三年真是令我畢生難忘！
模型在2017年11月推出，路線113限量438部，此車另一個版本的路線是65，不同我因為同一架車，只買113夠了！(成日見113，無理由唔買113走去買65既姐)
呢隻色非常之夾呢個背景，同埋正光d 顏色好靚~ 其實GV6348 呢架車無記錯的話，當年中巴時期未出牌時，已經油左綠色底色，換句話說呢架車一直以來都是藍綠色！巴士黎講算是十分罕有，因絕大多數都是投入服務後才上廣告的。
總覺得中巴當年批LA、VA 上層好有坦克蘭元素，其實一直希望Toy1 可以改改個模，出九巴坦克蘭！我已經唔會再用buzes 個舊模改任何坦克了！
但呢個模出坦克有個好大問題，就係車窗係一條過膠片，窗柱唔係連車身，所以只能局限出黑窗框的款式，因黑色唔覺窗柱同車身分開，如果出熱狗或白窗框的款，就應該只能用老虎蘭個模改？
其實Toy1 出呢架車QC好差下，好多架扶手打風，車門黑邊貼得唔對位，但呢架底色都至少是油的，差唔晒，跟住落黎另一架E500MMC 廣告全水貼，仲恐怖...
睇番當年GV6348真車，原來小弟曾經影過2個版本~
2008年時，胃仙-U 一句放在牌箱上方，而下面2011年後的版本也是模型的版本，胃仙-U 一句放在牌箱兩邊，而車身廣告都有些少不同，但不作對比了。
其實除了GV6348 這架印象最深的胃仙U，到了6348 退役時，新巴都有將其他車再上番同一個廣告，印象中AH4134 底色都是油上去，再之後的應該都係貼的~
找回一些舊照，順便加送AH4134 超豪：
另外亦很難得原來影過HX2026行113，呢架車的廣告就係貼的，我估因為當時呢批Dennis Trident 距離2015年夠17年退役不遠(新巴1998年買呢批車作為服務初期的新車)，所以貼上去算，順便貼埋(呢張應該係等候某KR牌接送車時攝)：
跟住就是今年才入黎平玩的另一款胃仙U，胃仙U 真車雖然有幾款，但模型就得唔知2款定3款only！
模型在2019年7月推出，限量388部。不過售價468，所以一直等特價先買，最後早前會員+200換購，仲平過全白色E500，不過全水貼真係要扣少少分，因為水貼要貼得靚又真係幾難，事關車身有唔少凹凸位...
新版胃仙U廣告連車窗都有圖案，算是比較特別又能夠運用車身的設計。而且廣告上所謂"雙層"藥片，其實都是因為配合"雙層"巴士而設
車頂都有廣告的，所以專登高炒番一張標準相~
加送另一架藥品廣告模型：
Carz 推出的平治O305 馬百良
平治巴士係九巴車隊中只有41架，一直想呢款車出模型，又係等左超過十年... 幸好最後都有個新模出番，原色、車皇色已購置多時，一直未開盒影，今次影開胃仙U 順便影埋呢架馬百良，1:76 巴士模型一直是以原色為主，廣告車一直都好少機會推出，近幾年叫做多少少機會出，但都是以藥品為主例如雙飛人藥水、紫花油等等，都可以話多元化了一些，但對我黎講，本身對呢d 產品不是太渴望有巴模的... 只是車型值得儲而已！
DG2612 / ME22 模型於2019年3月推出，限量為400部。講多少少，其實買呢架平治其中一個原因係當時仲出左另一架紅A廣告的平治，但火速售馨，所以諗住廣告車好受歡迎，出呢架馬百良時就馬上買了一部，不過呢架而家好似仲有貨，但紅A就好似真係無... 有時忍唔住要鬧，d 車受歡迎既又出得鬼死咁少，新車市面上已經不停出，蟹到仆街，唔明生產商搞乜的...
隔離架超人同工程車純粹是入鏡~
沒有留言:
張貼留言