十月少入

本月唔少車彈出黎，幾乎殺我措手不及... 

唉！既然都留唔住，要離開的始終要離開！走吧、離開吧！Wmb 因私人理由宣佈放棄在omsi Bowdenham 區的專營權(詳見文底)。

雖然10月仲有幾日，但繼續開源，黎緊幾日唔再入手了，所以提早總結本月少入~ 熱狗退左咁耐，某日路過碼頭80T，見有交通書籍減價，所以買番幾本巴士回顧作紀念，當然唔少得極少有用熱狗做封面果本2013，不過坦白講，其實我睇書主要都係收集資料，當然相片都要夠大夠清夠多！其實覺得D相有D我仲影得好過佢... XD!! 

另外中巴DM 同AD1 短時間內推出，辛苦晒幫忙購買的師兄。

巴士站經運送後到廠，Wmb 終於有Wmb第一隻巴士站！呀... 這裡幾本書幾部車幾個站已經令今個月的支出到左紅區！即日起到下月7號前一律減少/暫停入手！ :(




獅子山下歌聖羅文離開了我們12年，近日繼續聽他的歌懷念他，他的歌耐聽、千聽不厭！日前獅子山上掛上了巨型banner，即刻諗起羅文！可惜一日後便被拆下，我都未影相... 真係正經野唔做，拆人banner 就快到pk！其實當日下午中環有恐襲演習，我係中環碼頭隱約見倒呢條"我要真普選"banner^^！網上圖片：

最初羅文唱的獅子山下我認為是咬字太清，而後來的唱法有所改變令小弟喜歡了呢首歌，甚至近年"參考"獅子山下的同舟之情都根本上沒有羅文唱獅子山下的神緒，所以呢首可以話無可代替，真係香港之歌！加上近日香港出現分化，然而多數錢作怪，警方打完人又有錢收，真係世界變！同處海角天邊，攜手踏平崎嶇，感觸萬分！



一個多年前曾向無乜作為的陳議員提出近似概念的轉乘優惠今日終於出現...：

九巴將於10月25日(星期六)起提供大老山隧道轉乘優惠，方便市民，涵蓋的路線：74C、74X/B、75X、80X、82X/P、83X、84M、85M、85X/S、88X、89C、89D、89X、 286M、272S、277X、277E/P 及 373。優惠後總車資為下列兩者中的較低者:
1. 第一程應付車資或第二程全程車資中的較高者或 
2. 第一程加第二程的應付總車資,再扣除$4.2 的轉乘優惠(如適用)。

雖然睇完好似唔明，最好實際搭車時留意一下，其實亦曾提出74X、277X 等在沙田出九龍票價太高問題，不過我個人覺得無論九巴同港鐵都係咁狗，票價死都唔肯減，寧願俾八達通優惠，因為唔係個個人會都轉車，相對減票價，俾轉車優惠比減票價賺到更多... 所以利益當前，乘客永遠是輸家！


本月Wmb 開支已經到達上限，專家警告連月到達/超越上限的開支會對Wmb 造成上調票價壓力！

Wmb  因私人理由宣佈交出在omsi Bowdenham 區的專營權，方案在10月17日向運輸司提交並獲接納，可望在11月1日生效。屆時前一晚不會加開班次招待巴士迷！

Bowdenham 區是去年年初Wmb 首先實施新收費模式的地區，以巴士路線里數作計算單位，同時亦重組路線號碼，批准每一公里最高收費是$0.5，因此當地很多路線的票價加幅驚人，唔少路線長於10公里，票價由$2.5 加至$5.0以上！雖然起初Wmb 設有適應期及少量路線短於4公里可穫調低票價，但仍引起唔少乘客不滿。

去年年中及本年期間分別有暴民因不滿當地巴士票價太高，向Wmb 巴士施毒手，包括破壞巴士波箱及拆毀巴士司機位設施連標板位置，部分巴士連座位及車箱光管周邊配件也被拆去。其實Wmb 曾考慮下調票價到每一公里收取$0.33 或 3公里收$1.0，不過當地區民的過份要求包括每天免費乘車去補償他們在Wmb加價後的損失使Wmb 絕對未能答應！Wmb 本年統計，本年客量損失了一半！奇怪的係，穫下調票價的路線(路程短過4公里)客量也未有提高！起初是有增加，但後來當地的白牌車以低票價搶生意日見瘋狂，而客量上升使白牌車有加價空間，即使白牌車票價近月已比Wmb 同水平及更高，但乘客普遍接受他們可隨時上落無規管，車程時間較短的優點...

Wmb 是次以交出在Bowdenham 區的專營權去換取一次調整整體票價當是等價交換，並穫運輸司接納提議，原因是在暴民破壞巴士期間，Wmb 仍提供穩定班次及車長待客以禮，現作嘉許！同時也考慮到Wmb 自2006年在SF區提供服務至今一向以區內線劃一$2.0；誇區線劃一$2.5 的票價，是非常惠及大眾的做法。唯獨在 Bowdenham 區的票價較高，Wmb 退出Bowdenham 區專營權可穫一次調整票價機會以平均整體票價。

Wmb 表示，在退出 Bowdenham 區服務的同日起，即11月1日全面上調票價，會追溯番本年度九巴的加價幅度：3.9%，Wmb表明是3.9%就是3.9%，不會像九巴一樣玩數字遊戲去增加實際加幅非常可恥！有當地學者擔心，Wmb 退出經營間接令白牌車合法化及更見瘋狂，使票價有加無減，而Wmb 高層則表示，要離開的始終要離開，留都留唔住，今次是以私人理由放棄 Bowdenham 地區，期間的得失唯有視作幸運、倒霉。以後無拖無欠，所有事務再與Wmb 無關！

2006年Wmb 設定票價為區內線劃一$2.0；誇區線劃一$2.5，這收費模式至今已沿用8年，最初是參考到香港一些較有良心的交通工具例如電車、天星小輪的票價，同時定立便宜票價以反映部分巴士公司、鐵路公司的票價實在高得不仁道！由本年11月1日起生效，全面加價3.9%！新票價為區內線劃一$2.1；誇區線劃一$2.6！乘客請留意。


當年今日，以照片回顧那些年...

2007-10-22。當年行上觀塘IVE，裕民坊、月華街可謂常經之路，因為抗通脹，堅持唔會搭小巴上去！而住沙田，都城、三菱、長茅欠奉。這日難得巧遇一台東洋之風行走14C!!!
不過而家14C 已取消(由貴價路線14X取代)、三菱亦魂歸天角、裕民坊舊樓、巴士站都通通炸毀... 重建真係消失左好多野，填海連碼頭都無埋... 都係政府的錯！

2006-10-23。八年前呢批伊斯利蘭奧林比安係暑假前續命4個月，陪了小弟過了一個暑假，可惜只續4個月而不是一年... 最終暑假一完他們便到達死亡尾站。很多時望住呢批熱狗，明明性能理想但又唔可以玩耐D，都感到十分浪費/可惜，唔似得而家空調巴士有得玩夠18年...
左邊呢架白色巴士有D似訓練巴士~

2007-10-25。今日起大老山隧道線實施補差價的轉乘優惠，而優惠範圍仍需觀察。當年16M 熱狗同大隧線有優惠，坐一程16M 熱狗可$0^^

1A Carz Toy 巨龍玩具閒攝 & 永遠懷念的羅文Roman Tam

今日係羅文逝世了12年... 我到而家都有聽他的歌~

有時覺得他應該長命，唱更多好歌，可惜人生短暫。當自己認真當一個前輩為偶像時，並不是他唱某一首歌你會覺得好聽，而係會被他的風範令到自己覺得佢唱首首歌都好聽，還要超越這個程度，連唱人地D歌都覺得好聽，更比人地唱的更加有味道！在我心中只有一位，他就是羅文！

好歌獻給你 願你藏心裡，日後但願重見 替你獻上勁歌，每次聽都有感觸。正如他自己也說在唱歌風格上作了很多嘗試同改進，呢點也是有目共睹，故很欣賞他唱同一首歌，有不同的演譯。

願望就是明天係我自己比較喜歡的歌，這個版本是1996 年重唱版，聲音比較溫柔耐聽。

近期又聽番激光中!! 有唔少歌手都唱過，雖然歌詞相近，但唔知點解由羅文唱才可做到把成首歌的意境擴闊！

https://www.youtube.com/watch?v=fzj3ILhy6KA

羅文應該是1945-2002~ 雖然生命短暫，但積極求變的態度令我敬佩~ 實力派的歌手總不像而家個個都係靠搞新聞出位... 

最近的巴模一浪接一浪，元氣難免受傷！我一直認為一款車可以長出長有的時候，生產商係應該不計成本去起一個"全新"/高仿真度的模具去滿足大眾，因為推出的數量多，很快便可收回成本！可惜事實卻係推出為數往往只有數百部果D 生產商，個模先有真車神緒... 而且量大QC 越差... 點解膠車做倒咁精細，官方出的車反而差天共地?? 維護官方車的人常說金屬模做唔倒極幼細，但想講幼細同輪廓係兩回事，做唔倒極幼細的凹凸位、接合位的空隙非常粗糙、藉口車身上油太厚減低了立體感都算。但輪廓係一部車有無神緒的重點，不如你整隻雞蛋出黎，可以整到雞殼上面有埋雞糞係度，夠精細啦掛?? 但原來隻雞蛋整出黎係圓形的，咁有無人信你講係金屬模的諸多局限呀??? AD1 冷氣糟更加退步用黑色油了事... 雖然車箱座位好欣賞，但車窗又唔知搞乜整咁厚搞到D 凳迫晒入中間，連車箱通道都幾乎消失了！

今次出的中巴DM、九巴AD1 都係沿用carz 的所謂巨龍新模，當初見到呢個模的外形就令人覺得只不過係一體化左N 年前dumpwell 個巨龍模而已... 一睇車尾就有點接受唔倒的感覺... 雖然有些地方比舊模有改善，但仍然係舊模的影子之下，出的車唔會靚得去邊了...。所以當時很多的不足之處雖然早在出開龍時指出，但因為誠意欠奉唔改模，錯誤仍然複制延續後代。

雖然係模型的立場黎講，模型的精確度永遠不能比得上一台真車，不過模型不是玩具，如果生商可以再改進，相信會更好，但如果是將價就貨，對於喜歡真車而買模型的人黎講(包括小弟)，就是太不公平了！

如果有機會出11米巨龍空調版，希望會係carz ADS 的效果~ 因為ADS 個外觀一望落去都感覺有神緒，車頭頂部的斜位及尤其車尾，最起碼牌箱唔係平滑囉~ 根本上用上油厚做藉口係無腦的講法！不過ADS的車咀就有D失望... (當然而家AD1、DM、S3N 都唔係好)。

Carz 隻DM 牌箱做大左，我諗不如話個牌箱統一左size 會較為美化呢個錯處^^ 話說有日時空交錯，某公司1A 脫班嚴重，因旺角有警察發動對示威者的對立戰，引致交通阻塞，警方迫使示威者聚集在馬路，沿線巴士無法通行，最後由另一間公司出手，為九龍區市民提供臨時非空調巴士服務，票價$10/大小同價！

而由於港島區亦有警方策劃清場行動！為了接載更多市民到場聲緩，某公司臨時調派開龍行走港島23線，票價$20！大小同價！

正常巨龍上層車身應該係少少斜上頂，基本上款款熱狗都係咁，但呢個模似乎上層同下層一樣咁直立... 上層車頭隻窗以為改善左，其實係有改善左，標準角度影相係順眼左，但只係視角上，實際個窗都係咁突，仲衰過S3M... AD1 更加突得誇張... 

Carz隻巨龍的牌箱size 統一左，我第一時間諗緊會唔會生產商自己都唔知原來唔同時期的巨龍個牌箱位有分別XD?? N年前自己都唔留意巨龍牌箱位置、大小呢個問題，直到細心留意312 發覺有分別，然後先希望比較真車，由於當時312所出的模型真車已經退役，所以較難核實。打破了以為只是S3V同S3BL 先有唔同的印象！(吉拿時代款式除外)

車尾都係好怪，上層仲肥過下層，起碼引擎位係應該突番出黎，車頂應該圓番少少，車牌做番厚少少！其實當初係對carz 呢個模拒絕入手的，之不過見飛龍的圖案美化左個模，加上二手價較為接受就入番部黎收藏咁解，不過二手通常QC 好差囉... 之後發覺呢個模可以應運倒好多款車的出現，e.g.開龍早期、密龍早/後期、ES龍、中巴/新巴DM/DA、城巴/新創建訓練巴士、AD1等。當中有D 款式亦只有carz 推出，別無他選，加上自己又鐘意Dennis 熱狗，而且熱狗而家又退晒，又想追入番批熱狗banner 的S3N，最後唯有降低對模型的要求入手... 或者有一日呢個本來不like 的模具會成為小弟家中最多的車型... OMG！ 

本月仍是積極OT，以及減少不必要開支為主。條友成日無啦啦走黎問我野，要我即刻答倒佢，真係低能的，條友台面無啦啦多左D 電線係度呢，就走黎問我D 線擺係度係做咩，大佬D 野係你台面你都唔nun知，我又點會知呀！跟住又屈尻我話係我擺D 野係佢度，一日咁多人出出入入，其他人亂擺野唔通你又入我數呀？！不如唔好姓o5啦，姓尻啦！有時D 電腦唔知邊個拎左出黎有用途又好咩都好，又走黎問我呢部機做咩放左出黎！大佬，一日咁多人拎過D機，點知咩事呀... 直投想佢問乜都話唔知算，實在幾銀煩！仲要搵機會話你呢度先PK喎，仲話D野你唔知點解又唔問喎，其實我想知自然會問啦，我鬼知你咁on9 走黎問我先！？幾乎想頂番佢你自己都唔nun知啦，走黎問我，D野又唔係我擺的，我知咁多黎做乜呀！一時又話人地個位亂，一時又話D 野成日周圍擺，叫人做野就洗人唔洗本，自己就繞埋對手坐係度！要人番星期六就講到好多野做，條友自己去左邊？！咪又係炸病唔番... 前一日仲精精神神的！一個月炸幾日病，仲勁過之前公司果個吞樸王，西利！真係想搵人放工係樓下捕佢打7佢一大獲！

見人地貼當年今日咁成功，自己又貼埋一份，希望從昔日美好的景物中取得少少正能量，繼續努力向前！

2008-10-16。以前觀碼都係一個唔錯的影熱狗地方。

2006-10-17。以前見慣吉蘭上層車頭的兩隻窗，顯得坦克蘭總係怪怪地！今日再望坦克蘭，呢種怪之感仍然係度。


本文所用的模型生產商名稱不是正確寫法！只取其讀音，以免雷同！

都普客車・中巴利蘭勝利二型 1:76 模型分享

是次貼文終於可以post 番一次都普雞~ 主角係近期被正義市民和平佔領的銅鑼灣巴士路線~~~

萬眾期待，中華巴士利蘭勝利二型都普車身高載客車終於重出江湖！best choose 終於肯出番中巴利蘭勝利二型模型！真係估唔到10年前出過一次利蘭勝利二型都普車身高載客車，一直都無再出，網上的炒價亦去到千幾蚊... 十年有多，難得再出無得唔入手了！

不過都普車身的勝利二型，總係俾我覺得係丹尼士的產品而不是利蘭。今次模型主角LV166配來往近期被正義市民和平佔領的銅鑼灣區中巴72號。話說香港有不良份子發起藍絲帶行動，去支持警方的"適當"執法，他們透過藍色恐怖去抗衡黃絲帶的和平行動！Wmb 認為縱容暴力打香港人是邪惡行為，警方責無旁貸需要向大眾道歉！故邪能否勝正則各有各見解，Wmb 當日為歡迎中巴利蘭模型推出，專登為車隊一部利蘭巴士塗上與當年LV166 相近的車身色彩，而在Wmb 這部近似LV166 的色彩當中隱藏著一些意義。

中巴的上半黃下半藍的車身顏色，一直都俾我配搭完美的感覺。然而Wmb 為車隊一部利蘭巴士髹上的近似中巴色彩，其實並不是100% 相似，背後的意義卻是Wmb 義工辛苦在烈日當空下為巴士塗裝時投放下去的！當日有份參與車身塗裝的義工所講，他早已預知幾星期後的香港將有一場和平示威，但示威當中將會出現黃色及藍色的正邪對抗。預見到警方惡意使用武力、有意對暴徒對待從寬，警方成為設計師的恥辱！故設計師巧妙地把黃色安排在車身上半部；藍色則油在下半部，除了顏色奪目之餘，更是預意黃色力量將凌駕在邪惡的藍色力量之上，取得永遠勝利！Wmb 不支持惡意示威，但支持和平示威，更認為和平示威者的毅力、堅持、勇氣可嘉！希望他們堅守下去！

回到中巴的熱狗時代^^ 背景：某日，W地區氣溫下降，四周圍都結成冰，冰面都被中巴的色彩染成淺藍色，非常壯麗！

勝利二型是前置引擎巴士，司機位特設落車門供車長進出駕駛室，而為了使駕駛室更通風，很多司機在行車時喜歡打開車門~

眼見警方對市民的殘酷武力，Wmb 允許司機門被示威人士借用作盾牌之用XD~ 

這輛勝利二型在冰面上起步十分吃力，擺位拍照花了很多時間！就好似OMSI 較落雪天氣，起步踩盡油尾軸自轉，但實際難以推動車輛前進一樣....

今次終於做番車尾的粗大泵把~ 有番勝利二型的感覺~

同10年前的LV149相比，今次LV166 上落車門做得退步左，架架D藍色油都出界，同埋唔知點解度門斜上左去，應該係個模的問題...

以前只知丹尼士巨龍S3N、3N用都普車身，利蘭S3BL、3BL、AL、富豪S3V、AV、3AV都係亞歷山大車身，到金巴的3ASV、ASV、ATR都是亞歷山大車身，但原來都普的前身：金屬部份，一直有為香港巴士提供車身。從香港第一架雙層巴士丹拿A型到丹拿F型、珍寶巴士、亞比安、AEC大水牛，都是由金屬部份提供車身。但70年代中，巴士公司使用線條更美觀的亞歷山大車身，並開始廣範使用，引致金屬部份在香港市場佔有率下降。其後金屬部份被都普車身製造商收購(不肯定是否這時改稱都普金屬)，為了積極挽回香港市場，便在70年代尾推出了改良型車身！這款改良型車身最先裝配在九巴丹尼士祖比倫和最後一批的中巴勝利二型身上。

要提一提珍寶巴士時代，其實在70年代初至中，中巴引入的珍寶巴士使用金屬部份提供的車身，已經與九巴同期引入的珍寶巴士外觀過於相似，因為大家都是使用金屬部份生產的車身！當時中巴已要求金屬部份為部分珍寶巴士車身作重點改良，希望塑造出同一型號但比九巴更獨特的巴士。可惜雖然金屬部份已經按中巴要求對車身作出修改，但抱歉仍未能達到中巴的要求！見眼當時兩巴競爭激烈，中巴希望車隊比九巴的車身更獨特，中巴便唯有另謀高就，採用其他車身製造商！

因為金屬部份未能滿足中巴的要求，其中40部珍寶巴士LF107-LF146 使用了亞歷山大車身！金屬部份對於中巴的行動大為震驚，為了挽回中巴，便立刻嘗試進一步的車身改良，日後獨一無二的LF106便成為金屬部份在挽回中巴下的產品。

可是當時亞歷山大的車身令中巴非常滿意，車身線條又給人流暢，所以LF106 沒有帶給中巴驚喜，往後的車身訂單全部落入亞歷山大手中！為了挽回香港市場佔有率，當時都普金屬改良了現有巴士車身的外貌、車窗窗架，加入玻璃纖維材料在車身組件。

中巴於1979-1982年共引入167部勝利二型，一向有眾多樣版車的中巴一反過往習慣，在未有樣板車試用之下購買勝利二型^^！勝利二型爬坡能力理想，在攀爬斜度達1:8的斜路時可縱容起步！這時都普金屬的改良型車身對於舊有車身可謂全面改良，當時九巴同中巴的勝利二型都是使用亞歷山大提供的車身，都普金屬的改良型車身正切合一直希望比九巴顯得更獨特的中巴使用。1981年中巴向利蘭訂購了最後一批共20部勝利二型便使用了都普車身的配置，在1982年初投入服務，由於中巴沒有再購買更多勝利二型，這20部都普勝利二型就成為獨特的勝利二型！

車隊編號：LV166，車牌：CU4529，登記日期：1982-3-1日，退役日期：1999-1月。

都退左十幾年... 但仍然對呢款巴士相當感興趣！回到勝利二型的時代，與已故世界貿易中心雙塔合照~ 

Wmb Transport Department

我係一個唔識計數的"員工"，因為今個星期請一日假可連星期二、三及六、日連放5天；而請三日諗極都諗唔倒點解放倒9日！原來係請一、二可以成個星期都放，加埋過去的星期六、日就有9日假！証明我唔識計數啦，如果你係老闆，會唔會請我呢個唔識計數的員工?? ^^ 讚一讚自己！

活在香港，香港有咩唔好都係政府唔好，呢句說話上個世紀已經有人講過！

前兩年，Best Choose 終於出貨車模型，香港彈丸之地，卻有林林總總的汽車在穿梭，而當香港終於有密斗貨車模型出的時候，唔少喜歡車模的朋友都毫不猶豫俾68蚊入手。目前Wmb 的非公共客車數量有所增加，Wmb 宣佈Wmb Transport Department 正式成立！以便管理車隊XD。

我在家中開post，佔中的朋友卻留守街上作戰，因此他們的毅力、意志十分可嘉！本人在此向他們致敬，從來歷史上的學生運動都是為了將來而發起，一切都是為香港前途、未來而戰！過去的中國歷史亦一一印證到學生運動的重要性，自己都讀過歷史，想想如果無任何的運動，沒有有識之士推行變革，角家/地區只會變得死寂！是愛這個地區才會冒險，唔該反對搞運動的人試下諗深一層，不要只著眼目前一片刻利益一味說他們阻礙交通而盲目聲討！



分享一首勵志歌，支持在街上的朋友！(純中立分享)

星宿可引路係一首非常正面的歌！但相對比較少人識... 大家要繼續留守！身邊有唔少朋友都到場支持，仲有兩個妹妹都話想去，早知星期二晚親身到場支持一下，又咁近現場，而家覺得自己真係有點怯弱，其實又好矛盾的心情，又想影低勁多人佔領馬路的場面，但又有少少唔太想同人迫去到無乜野做！但精神上是絕對支持！團結就是力量，正如羅文呢首歌一樣，敢抵抗高山攀過望遠方！能抵抗才望得見遠方，永遠不攀上山又怎可擴闊眼光？

角慶唔燒煙花，又節省最少幾百萬！如果將呢D 錢用黎救濟基層市民重有意義！但政府一定會話角慶的慶祝活動是吸引遊客增加收入，淨係識講呢句！同埋角慶有咩好慶祝??


以下是Wmb 某一日的活動：
暑假完左，但吃雪糕卻沒有季節限制，某日Wmb 安排流動雪糕車在W地區進行活動。

W 地區是N年前怪獸出現的地區，因環境受破壞四周空虛，所以Wmb 希望佔領整個地區(和平佔領)進行日常活動^^

目前Wmb 雪糕車只有一輛，而售賣的雪糕每杯售價為$2.0，濃味版$2.5。售價是已考慮大眾的經濟能力及參考Wmb 巴士路線票價的水平( 區內線$2.0；誇區線$2.5、Bowdenham市則按距離收費除外)

工作人員亦擺放好招牌及欄杆，各位請合作排隊，和平等候，否則警方將會以武力對待不合作例如插隊的人士或施放催淚彈！如有人反抗即背後開槍制止！呢個做法都係參考警方的行為，只是和平示威都要出到開槍字眼去恐嚇市民！是錯永不對真永是真，人在做，世界在看！

一輛物品車亦到場分發食物~

呢D 細車出得真係幾好，要讚！手指咁長但有真車神緒！叫人沒有不入手的理由，相對1:76單層巴士模型黎講，呢D貨車比較抵玩~~

Wmb Transport Department 會不定期舉辦小型交通模型集會~

還一有台封左車2年的工程車！這台車的引入原是方便在W 地區大興土木興建1:1000世界貿易中心雙塔時運用，但W 地區環境複雜，世界貿易中心動工建造不久亦因水災而無法修複！整個興建計劃至今仍未恢複，泥頭車及田螺車一直留廠封塵！

平時見多數係四軸工程車！之前來往順利上班，日日都見有唔少工程車經新清水灣道上落安達臣大興土木，有時坐一程29M 見到不下十架呢類車。而模型卻出三軸短車其實我諗係best choose 想省成本而專出細車！因為在商言商，出多一軸成本高左，多兩個車胎賣貴4蚊唔係個個小買家都俾得起架！(但調番轉係買家角度諗，出12米車一個定價，但出9.5米又唔見話做少一軸、少幾個窗而減票價喎！)因此唔想賺少左，加票價又怕唔受大眾歡迎，始終唔係巴士模型，對象較小眾。個人好鐘意車頂個燈，透明件^^

當日諗用咩背景諗到我暈，最後用一個青色草地，以示泥頭車大興土木，將原本綠化的地區都變成地盤，九龍東的安達臣就是例子... 

真係講唔出點解，同熱狗一樣，黑軸永遠都係咁靚，連工程車、田螺車都係。

上面呢堆泥頭車相係兩年前影，攝於泥頭車封車前的最後一次出動！還有因為個吊臂爛左，封車至今未被維修，睇番D相個背景暗左，應該因為個背景無面向燈光，加上景深太深，接合位容易察覺... 呢個都係非大光圈難以解決的問題，只能靠人手執靚個背景...！

呢堆泥頭車原相同埋同期的大批非空調巴士相都遺失了，好似之前壞左機無晒，有幸事先upload 左上 FB 先睇得番！如時間許可，Wmb 將安排泥頭車維修及再影番一批模型相！！！