BHTXWmb: 新春少入

恭喜發財，BHTXWmb 祝各位學生哥學業進步、橫財就手、身體健康、家家戶戶出入平安，人人迎猴接福行大運、各位(包括自己)早日成雙成對二年抱三。

新春入手(學壞mode)少財不出，大財不入，新年幾日假期，轉個眼就過左，放假的日子真係太少，新年應該放一頭半個月先係...

當初去80T，1A 架混能曾經想入埋，不過對新車的愛好不及熱狗，所以無買到。等左好耐先有特價 $295，我諗同上網bid 都差不多價錢，所以要左，呀點知投先上網見倒有部1A ATH under 270... 雖然295 已比模型店賣的平，但都係激氣！

重點入手係機場巴士 HH2032！除左早前入左E50D之外其實個人對11米富豪呢個模真係印象深刻！所以熱烈歡迎BC 龍運富豪奧林比安11米到達本廠！呢個模，可以話小弟係BC 咁多款巴士模型之中最鐘意的。N年前"Corgi" 出的11米富豪質素係點相信不用評論，大家都有眼睇。誇張講句我直投想用呢個模重新出過晒過往出過的富豪，以善用模具！當時一直期待有富豪新模推出，千呼萬喚2008年鼠年呢個模終於出場，一睇個外型直投將成架真車的感覺造左出黎，亦都因為模型的水準優質而開始左自己第一架生肖巴模的戰線！唔計AV1、康豪的話，自從2009年牛年生肖巴士推出後，等到現在2016 年先再有呢款11米富豪推出，因此今次就算同車牌都要入一對！相比起Buzes 的S3BL 玩具，購買buzes 玩具是因為對真車的感情而非玩具的珍貴；購買BC 富豪就係因為模具比例精確而非對真車特別喜好！不過... QC都一般般... 平均12選一，大多是細少但明顯的問題包括橙色油出界、污漬、甩水潑及門位谷模等等，反而無乜打風^^！

九巴之友20週年~ 呢架Dennis Trident 廣告好靚，可惜HS牌行多幾個月就退役，影唔影倒都不敢寫包單！模型內籠座位、扶手打風嚴重... 一直覺得九巴應該每名九巴之友送一部模型先係，每出一次模型就送一部，無理由仲要會員俾錢買囉...！至於最新出果架變左精細版，太貴所以索性唔買... 同埋係80T 望過實物，都係打風嚴重... 就算九巴專頁賣廣告叫人買齊，都始終買不落手呢... 有2部ATR 當一對就算了XD^^"

基本上carz 的ATR 模架架都打風、座位向前傾斜，都唔知搞乜做得咁差...！而家數數下，屋企有成10架Dennis Trident... 數下先：HN9680(小飛俠)、JE1364(小飛俠)、HX1961(小飛俠)、42C 原色(前龍運)、HN2195紅線(49X)、HJ2127紅線(1A 初期)、HJ2127原色(89)、HN9680(九友)、40(九友)、798(Wifi)，真係唔覺唔覺，我捐左咁多錢俾80T / Carz...！！

每逢新年，唔少人會買生肖巴士模型應一應節，不過上年羊年開始轉左橙蛋模型比較做得麻麻地加上又加左價，而鐵甲威龍個人又興趣不大，所以都係日後有減價先買番，只係到時都過左新年，都無氣氛，分分鐘可以唔買添！

每逢農曆新年九巴新巴城巴都會推出生肖賀年巴士向市民拜年，車身貼有十二生肖動物之一的圖案，而顏色方面就多數以黃、紅、金、橙、紫等等喜慶而溫暖的顏色為主，除了增加新年氣氛之外，亦希望各位市民新一年大紅大紫，賺到笑笑口！不過我自己覺得似係巴士公司想自己大紅大紫，賺到笑笑口多過祝市民大紅大紫，賺到笑笑口多D囉！仲乘機出埋模型賺你一筆喎... 如果儲齊十二年生肖巴模等於年年捐錢^^" 不過計我話只要廣告真係靚，模型又做得好的話，捐錢都唔係問題...

下面呢批相，唔係新年時節都無乜機會post... 不過post 番虎年出黎，確實又太out day了... 轉眼就過左6年了... 當時九巴的富豪奧林比安11米做生肖巴士用左12年(出齊十二生肖)，2010 年轉用比較新的車型，仲一出就出兩款，有好有唔好啦，雖然耳目一新不過要買模型的話當然就不是一件好事，因為要俾多248...呀！記得出模型當日自己做緊project，係九龍城好夜先走，即刻坐車去馬鞍山80T 搶購，當時店員已經準備收工，隔離亦有人搶購中，小弟都捐左$496(2部)俾80T 才回家... 其實大家又記唔記得當年除左ME8933、MM2801 之外仲有一架LF3258 上過虎年？LF3258 顏色同ME8933 有分別的，果陣幾驚會出埋模型... 又俾多248喎...！咁買法，里加乘都有訓街的一日，千奇唔好話同一隻型號點會再出多部！2013年蛇蛋 PJ5187、RG9525 就是例子~！只能說九巴咁鐘意發、98、8988呢D車牌，因此出3258 的機會確實好低。

ME8933 Year of the "Tiger"2010 1:76模型資料：

車牌：ME8933、車隊編號：ATE236

型號：Dennis Trident Enviro500 12M

體積：長12米、闊2.5米、高4.4米

引擎：Cummins Euro III

載客量：124人

生產商：卡士工場

限量：3000部

推出日期：2010年1月

MM2801 Year of the "Tiger"2010 1:76模型資料：

車牌：MM2801、車隊編號：AVBW44

型號：Volvo Super-Intelligent Wright 12M

體積：長12米、闊2.52米、高4.38米

引擎：Volvo D9A 300 EC01

載客量：123人

生產商：Drumwell

限量：3000部

推出日期：2010年1月

呢2部虎年而家要買都仲買倒，因為當年產量較多，各出3000部，雖然80T 的價格已升左去498、328，但二手價應該都係二百頭有交易... 手頭上呢2架車QC 而家睇番原來都幾差，D拉花上得好差，深淺色同真車廣告有出入... 無可否認以前買車可以好快就走得，雖然番到屋企細心望或者拆盒影相會慢慢發現好多QC 差的地方，但的確近年巴士模型越出越多，QC 越出越差，買車分分鐘幾個字都未買倒，仲要好多時見係咁上下貨色就收貨，番到屋企再望嘩大獲，QC 可能差到唔識講！

(網上圖片)

今日睇左2012年在韓國上映的韓國災難片：火海108 The Tower / 火燒108大樓。災難畫面做得不錯，當中也有一些感人的場面。平安夜的表演引致的一場雙子塔摩天大廈大災難，包括直升機撞樓、大爆炸、火災、高溫引致鋼筋熔化、爆破使大廈倒塌等等！及一些人性醜惡例如先讓上流人士獲救等等。過百層的摩天大廈、雙子塔、火場高達一千度這些都似曾相識？

世界上從來未試過有大廈在1312尺高空發生大火，這個是正確，亦是救火的重點難題！九一一事件飛機撞擊北塔92-96樓位置，火場剛在1312尺以下。但... 火場有三萬人被困似乎不可能吧，一千人的話比較合理！一千度炎熱高溫引致鋼筋熔化？咁熟的？區區一架直升機撞樓應該不足以造成這個嚴重性，都係果句如果溫度真係咁高的話消防員係無可能到達火場救火... 不過海報上誇張吹噓以增加吸引力是可以接受！