六十年代開始生產，於1970年投入服務因高載客量而有珍寶客機之稱的波音747，七月中傳來因訂單不足，波音將會停止生產747客機的消息，不禁感到可惜，因此舉正代表747 客機將成為活古董！竟然在同一個月再傳來國泰的747客機會係今年內退役，心中當然係依依不捨...... 無諗過會係咁短時間入面有兩個壞消息。話說當年赤鱲角機場啟用後，沙田上空常常有波音747 飛機飛過，每次抬頭望見747 從遠處飛近都會感到振奮，又一架大客機飛過而且視線都不會離開，直到飛機飛到其他大廈背後才行，747 飛機還會傳來澎湃欲聾的引擎聲！以前南跑道用作飛機降落時，廣源上空時常可見大客機飛過，而且幾分鐘又有一架，真令人懷念！據資料顯示直至2014年中，747 已生產了1500部，在2007年10月空中巴士A380正式投入服務之前，飛機的最高載客量一直是由747保持了37年！
大韓航空
除了4隻引擎外，747 的特點係機身前半部有雙層設計，不同型號的747上層長度亦不同，這個也是747女王讓人最容易識別出來的特徵，無論咩角度、幾遠都認得~
8/10 早上國泰安排航班CX8747(B-HUJ)最後一次飛越維河上空，用8747作告別飛行相信是讀音像bye747一樣！作為喜愛747的一員，對呢次特別飛行應該感到開心還是痛心？航空公司稱747 秏油量大、營運成本高，但國際油價目前比2008年時還低，加上航空公司過去十年都有上調票價，如果行走需求大的航線，善用747的高載能力，人均秏油相對下降... 情況未至於官方講到咁差，所以對於 747 要退役係有少少唔滿意！但無奈要接受... 好現實，所有做生意的都以利益為依歸，用最少成本賺到最盡，誰會同你講感情、懷緬過去... 所以都係帶住不捨的心情歡送747... 最後國泰都表示唔會保留747客機。
因為事前報導只描述CX8747會從維河西面入，東面走，其實廢話(機場係西面梗係西入東走啦)，但飛一次就玩完定還是會來回有一次就無人講，加上今次747係維河2000尺高空飛過，唔似上次A380 咁係一千多尺低飛，所以只能夠去一個比較容易影倒架機的位置，就算角度唔靚總好過距離架機太遠而影唔倒！
十月七日下午，能見度非常好，對翌日的747飛行充滿希望，但十月八日早上，起身就見天空灰濛濛的... 能見度低，非常失望！而且亦受颱風影響，擔心會落雨，但無論如何都要一睹女王的風采！早上十點，海港城天台停車場未見747影子，在場等候的人數已經越黎越多！近十點半，在場有人大叫：出左啦出左啦，大家都專注究竟在那裡呀？當見倒747時已經見倒右轉中... 已經錯過從山上升起的時刻...
本人非常不滿現場有食蕉(保安)胡亂驅趕！當大家首次見倒747 右轉時，有人走位，本人亦想轉位希望在更好位置影相，因為停車停有燈柱、旗杆及人阻，實在難以捕捉最佳角度，你唔阻倒人但人地走位會阻倒你！點知個PK食蕉就話呢度係馬路唔俾人郁，並要求所有人站在原位，仲聲大夾寸黑晒面，所以其實個人都真係幾討厭做食蕉呢D廢柴的，做埋D乞人憎的行為，人地唔搞你你米鬼搞人啦！馬路咁又點姐都無車，所以都略為企出希望欣賞女王風采！
三分鐘後，女王再次右轉向維河高空！大家都歡呼歡迎！
因為女王距離地面有2000尺，如是廣角鏡拍攝就連一粒BB蛋都大過呢架747... 加上未知飛機進入維河高空的實際位置，實在無法拍攝港島上空加埋747的情景...
女王從遠至近，寬闊的翼展盡顯氣勢！除左欣賞747 飛近的震撼，還要收聽747強勁的引擎聲！據說747兩邊翼尖的距離比萊特兄弟進行的人類首次成功試飛的距離還長！747-400 翼展闊64.4米，起落架左右軸距亦有11米。
國際金融中心大約高1350尺，即使747是大客機，但在2000尺高空相比之下亦顯得渺小！老實講如果架郵輪唔係泊係度阻住個港島景，會影得開心好多...
為左避人避旗杆，轉眼間女王已經飛過頭頂...
當年赤鱲角機場啟用後，沙田廣康上空常有747 飛過，如果以南跑道降落的話航道最接近廣源上空，女王由右至左飛過的形態早已熟悉，坦白講747咩角度睇都咁型，同十月八日所見一模一樣！仲好懷念有747飛近廣康上空的日子...！
不滿政府盲吹空氣改善三成但能見度仍然低引致影相色水死寂、不滿航空公司唔繼續重用747客機、不滿飛機飛在2000尺太高唔夠長鏡影、不滿747只飛一野之後飛出海唔肯來回飛夠一個鐘... 但始終為國泰肯舉辦747告別低飛而感到高興！因為佢其實可以唔搞呢次飛行，如果航空公司真係咁忘本的話... 正如只識加價、收車的九巴都無為熱狗退役而另外再安排遊河俾九巴之友參加反而即刻刊登文章強調巴士路線已空調化一樣，批熱狗明明行車証未到期就被提早退役還說是光榮退役！
女王扭腰左轉，沿維河兩岸曲線飛去... 原來企海港城真係錯誤之選，因為左手邊有大廈阻擋，女王被大廈遮掩... 除了聽到引擎聲，卻看不見影蹤了！
其實維河上空係航線途經範圍，其實747 同一般飛機的飛行有咩分別？就只係飛低少少囉... 其實低飛呢一個動作唔會係技術做唔倒，而係唔肯咁做姐... 要低飛的話500尺都飛倒啦，雖然太低的話沿維河河岸曲線飛係有難度的~
據說B-HUJ 是當年第一架於赤鱲角機場降落的飛機！隨著 B-HUJ 退役，服務國泰航空共37年的波音747客機歷史亦被迫劃上句號。自2013年國泰已有安排陸續淘汰747客機，相信國泰會以波音777-300及空中巴士350 取代747客機，但747 客機始終係高載客量的機體，有報導揭發航空公司將777客機加裝座位以滿足需求... 相對每個座位將會縮細，服務水平是否倒退呢？
個人有咁的諗法，就係政府既然決定填海起第三跑道，而且填海範圍廣闊，不如劃分一部分土地興建香港航空及交通博物館，專門保留及展出歷史上比較有代表性的飛機例如波音747、麥道及其他陸上交通工具例如已退役的巴士等等。遠係遠左D，但反正機場面積夠大，相反市區根本無位起，加上西九、郵碼、中環海濱都已經有用途在身所以無得寄望呢D地方會有交通博物館了。
以前無意中影落的國泰航空747 客機：
打開襟翼的時候，顯得747 對翼更加巨大，但可惜飛機模型就算1:200 咁大size都無做到打開襟翼的版本，而且市面上1:200 模型索價普遍高昂... 真機保留唔倒都想買番架留為紀念，但又太貴買唔落手！
747客機都有分唔同引擎，外殼都少許分別，但少弟對飛機認識唔深，難以單憑外殼分別出引擎種類，性能方面更加無研究！
到左今日，747都要退役，最風光時期已經過去，而家要影747越黎越難，才發覺以往影得太少... 雖然國泰仲有十幾部貨機飛緊，但始終唔夠客機咁好影！
呢排又突然好多野要入，包括last flight 747、2部3M、紅DL、白3N... 仲有D突然彈出黎的車 for example EL1075，仲有幾部carz 的車未買，包括2部BL、幾部唔洗咁急入但唔入又心掛掛想快D特價的6A、43、4A、61！嘩點掂！
10月1日從羽田機場返港的國泰747-400 客機B-HKT，聽聞將會係月底前進行最後一程，前往美國拆解... 估唔到行刑仲快過退役巴士！以後只能從書籍、照片中回顧。
JC Wings 將會推出國泰747-400 1:400 及1:200 scale 模型：
BBOX2539 Miscellaneous B747-400 Pratt & Whitney Engines B-HKT (1:200)
BBOX2537 Miscellaneous B747-400 Rolls Royce Engines "Last Flight" B-HUJ (1:200)
BBOX4001 Miscellaneous B747-400 Rolls Royce Engines "Last Flight" B-HUJ (1:400)
BBOX2536 Miscellaneous B747-400 Rolls Royce Engines B-HUI (1:200)
JC wings 出的波音飛機我個人一直覺得做得麻麻，尤其機底會有明顯接口位，呢個亦都係我當初買1:400 國泰777-300 時寧願俾多幾十蚊買另一間生產商的出品都唔選擇JC wings！；反而佢出空中巴士個模就靚好多... 但今次(好似Buzes S3BL情況一樣)只有一家生產別無他選所以1:400就要硬，仲諗緊1:200 要唔要一部... 考慮因素一黎售價偏貴，每月又有其他龐大開支、二黎屋企無太多位擺；支持因素係一黎已有1:200全日空、聯合航空原色747，欠國泰原色、二黎今次就747客機退役出左模型之後睇怕日後未必再出，唉都係等模型出左先算！
10月18日，不經不覺獅子山下歌聖：羅文 已經離開了14年，好歌獻給你的精神永遠不會磨滅！
睇番新聞，當年A380 低飛真係比747 震撼好多，感覺上747 呢次係 hea 好多... 無論如何，永遠懷念國泰空中女王(1979-2016)！
沒有留言:
張貼留言