2021年5月30日 星期日

1/43 KMB ADL E500MMC Facelift 丹尼士(鐵甲)歐盟第六代12.8米玻璃梯 | 青衣站279X(WG9827/E6X6)

 

話說,九巴第一架1:43的玻璃梯巴士模型已經係新年期間推出,12.8米的E500MMC 成為第一款1:43 模型,開頭一直期待的Volvo B8L反而一直無1:43消息,而家聽聞好似由某玩具商生產,到時分分鐘唔只賣1250...!今次一於share番上個月hea hea地影既呢部1/43 ADL E500MMC Facelift 丹尼士(鐵甲)歐盟六型12.8米玻璃梯紅色九巴

先附上開箱片段:

https://youtu.be/Zv5JHNKmCJw

話說今次1:43玻璃梯開箱片在4月上傳,觀看次數超過了4千,成為BHTXWmb channel 所有模型片中最多的,超越勝利二型,玻璃梯真係咁多人鐘意?

其實呢款車出1/43的確有少少驚喜,除了因為而家市面上搭到既多數都係呢款車(Dennis),不過玻璃梯12.8米就未係咁普及,非玻璃梯既12米就坐得多,到了2021年的現在,望番18年前即是2003年的新款巴士(AVW/ATE)都開始陸續退役,遲早非玻璃梯到了全面退役的時候,大家又要追黎影+搭... 不過而家講都仲係好遙遠既...

E500MMC可以話係近年香港數量最多的一款雙層巴士,除了九巴,新巴城巴都有大量引入,而且長度有11.3米、12米及12.8米版本,靈活行走香港各種路段!九巴後來才購買11.3米版本以行走一些無法12米派車化的路線!

專為香港而設的第二代車身Enviro500 Facelift 在2015年9月面世,原來不經不覺,E500MMC facelift 都已經係香港行左6年半有多,起初覺得頭幅唔靚,尤其上層兩邊A柱,嚴重阻檔欣賞風景,不過隨著九巴最後一部第一代車身的E500MMC 於2015年12月投入服務,2016年起所有投入服務的新E500MMC都使用Facelift 車身,日日搭車都望見這個面孔,慢慢開始接受它的設計~


2017年中九巴開始改用紅色作為主色,E500MMC 12.8米玻璃梯(車隊編號為E6X)於2019年8月投入服務,所以全數E6X都是紅色~

有少少好奇,E500MMC facelift 12米有金色同紅色版,1/43模型反而唔出12米,而選擇出只有紅色的12.8米玻璃梯,呢個舉動與平時一模多用的作風並不一致!或者可能有人會話80T出咩車唔係老郭話事,係九巴話事...


真車資料:
型號:ADL E500MMC 12.8米(歐盟第六代)
長度:12.8米
闊度:2.55米
高度:---
服役年份:2019年8月至現在
數量:目前143部(E6X1-E6X143)

模型資料:
路線:青衣機鐵站 279X
推出日期:02/2021
限量:750

其實係出呢部1:43之前,九巴官方已經出過好幾次同款車的1:76,但因為現炒價所以都無買到,所以呢部1:43 出得正好!




車門打開



E500下層中軸同尾軸對上的車窗比前面升高左,外面望該位置係黑色,入面望就係扁左(升高)的車窗,但模型無做番呢個位,直接用車窗膠片油黑色就算,所以會見倒模型內籠無車窗升高的特徵,估計76同43個模應該係一齊做,所以感覺係76放大版,所以76有呢個問題,43都有,43因為大架所以會明顯些... 80T的出品往往令人感覺誠意欠奉...唉!


初時的玻璃梯九巴,車身銀色配合樓梯的線條,而2020年中開始,變為全紅,銀色部分消失,而KMB三個字變成大大隻白色字,所以我都係覺得模型呢個版本隻色最靚!


目前只有2款九巴紅巴士出過1/43模型,期望會有更多款式進軍1/43,例如:ATENU、B8L、E6M、E500...

E500MMC一直俾我有跑車的感覺!與AE86合照最適合不過


1:43 ADL E500MMC vs 1:43 Toyota AE86


Kyosho AE86隻紅色同九巴隻紅有幾分似,所以無辦法唔合照!所以都係個句,同比例係好緊要!


AE86 其實都幾細隻,就連一些專業車模儲家都未能一眼判斷呢2部車是否相同比例,他們一致覺得巴士"好似大過1/43"


無疑12.8 MMC 又的確係暫時香港最大體積的雙層巴士,闊2.55米,長12.8米!唔知有無機會購買13.7米呢?而家長過12.8都要運吉批准... 諗番以前好多話行唔倒12米既線而家都12米晒,12.8初來報到都傳好多路行唔倒,而家咪又係大把線可以行12.8,有朝一日買13.7米行公路線都唔係無可能,長少少可以加多一排凳,上層左右4個位、下層左右4個位及企位1-2個,total 載多9-10個人,巴士公司又可以將行倒大車既線乘機cut車,以高載班次填補... 仲可以宣傳長陣車係環保巴士,因為載客量提高,人均廢氣排放量相對下降,某程度又慳倒油!


真係無諗到兩款車咁夾~


巴士車頂有咩用?可以泊倒3架細私家車!



全紅色的九巴已經無左車頂的大KMB logo

跟住落黎近距離欣賞一下呢部車~

今次呢部車售價由990加到1150,就加了車門開關的功能,但開關方式其實好玩具化,而當中的細節又如何呢?


前軸個轆係做得幾似,但轉向功能就廢晒武功,轉向幅度都唔知有無10度,比起以前出的舊頭MMC 退步了不少!


上車門由車底手握控制,可以開單邊門,唔知大家搭巴士有無遇過d玩野的巴士司機呢?你拎住大袋野或者落雨擔遮,d 巴士佬好興只開單邊門,另外281A有個卡佬好興當有人企係車門附近就一定開晒2邊門,你以為係方便人上落?其實係想靠開門果下推d人行入d... 我本人就覺得呢種玩乘客的手法實在太低樁,根本無必要咁做...


前兩年陸續加裝的司機檔板,原意好似話想隔開乘客同司機減少乘客打司機的機會,但其實真係有少少多膠餘!


上面提到部車加左開門功能,但地台真係出晒事,加高左一級去容納落車門的開關組件... 


司機位外物件算做得唔錯


樓梯扶手、吊環做得唔錯


玻璃梯透光充足,透過增加外來光線進入車箱,可以減少車箱開燈時間達至環保,而梯位車身亦可以減少重量,亦可以減少耗油!

舊式巴士例如熱狗,樓梯前會有2-4個座位,有車窗可以透光,所以熱狗望落係光猛好多!


內籠部份位置用番啡色,望落幾靚~ 如果出熱狗,內籠分色跟番咁樣應該幾正!


開門可見傍板扶手同反射鏡,但地台真係好唔掂,升高得太多,搞到d野縮扁晒,真係好怪,其實有無其他方法可以開倒門又唔會變成高地台呢?雖然話玩1:43 咁大架就預左會做開門,但開門開到咁樣我寧願唔做開門,賣番990好過...


望入車箱係幾正既... 我諗九巴官方都唔會有一架模型大過1:43,1:43 已經係最貼近真車的了...


走廊感覺不錯的!


關愛座


上層車頭,無左舊電視機殼真係順眼好多!入面望風景都舒服好多!而上層第一排座位,都係用油黑線的方式畫條全帶出黎!


上層(非樓梯)一方17排座位,相當密集!不過多得加多一排座位,先可以坐多4個人...對於剛剛走上上層又坐倒最後幾個位既人黎講,算是派上重要用場!



車尾望向前方,都有置身車內的感覺,牌箱個殼條凹位都有做出黎~


傷殘人士位置



今次1:43 梯位扶手做番足,之前12米蛋明顯做少左扶手,諗住1:76放大無人知,其實一眼就睇得出了...


今次MMC同以前出的舊頭12米版一樣有做窗內柱,望落真實好多,但車窗有d位都係向外彎左少少,感覺唔太貼實!


兩款紅巴的車頂

加送E6X 真車照片:




而最新的一批E6X,車身已經無晒銀色貼紙,KMB三個字變成白色,睇下模型會唔會出埋... 我諗1:76實出,43呢... 好難講了... 如果再出,希望會係白光電子牌~

另外龍運擺左半年既一批12.8 MMC都係用普通版凳,改一改橙色又出得... 不過出咪買囉,唔肯出咪唔洗買囉,反正呢排好窮,對80T/Carz本身都無乜寄望架啦!

抬頭吧相信愛你便能飛,敢交出金錢你會創出傳奇!可能呢個blog主要分享模型類別,會令人有錯覺小編一定好有錢,可惜事實剛剛相反,係窮呀DLKH,每一件收藏品背後都是一個你敢交出金錢就會創出的傳奇,而且搵錢艱難,就好似最近竟然又遇到PK,讓讓野都叫晒我做,明明有d野佢自己跟開又扮晒野話無整過,不過扮野技巧太低樁,user一句話呀邊個邊個之前跟開架喎,就踢爆晒,扮晒唔識乘機唔洗做真心仆街!做左2年會唔識,信你就有病啦,表面黃但份人性格有問題一樣難相處,難怪之前一下子走左2個人...人工比做project只係多少少,但要承受唔成正比例的壓力同要調整面對仆街的心態,真係唔賺好過,不過最撚衰之前份工無限期放無薪假,d 檢測費都仲未退番俾我,唔明點解咁大間公司都可以咁仆街...

黎緊其實都有好多野想買,還是俾心機番工吧香港人...





騙徒呂中舜、陳志杰

https://youtu.be/1zhmozDrkME

沒有留言:

張貼留言