近排無乜買1:76巴士模型，98康城專線係唯一一架，辛苦晒鍾站詳兄幫忙前往屯門山長水遠購買！這次就分享呢條新開、以新車做掛牌的康城專線模型！
先分享粗略錄製的開箱片：
98線是配合將軍澳隧道轉車站啟用而新開設的兩條路線之一(一條是九巴98，另一條是經觀塘碼頭的新巴797)，提供將軍澳工業區直達轉車站及東九龍的服務，九巴標榜為"康城專線"。乘客可於將隧轉車站和觀塘市中心轉乘其他路線。
其實早在18年前(大約2003年)，新巴曾建議開辦來往將軍澳南至東九龍的巴士線，經將軍澳隧道，但當時因將軍澳南區域仍然未落實發展，當年的建議一拖就拖了17年，2020年終於開辦797線！
另外我自己有時見倒98呢個車尾廣告，真係第一時間就諗起98，唔知會唔會有d人會睇錯以為架車行98而追車或者唔係打算搭98又以為架車行緊98而無追車呢？98個字太搶眼睇錯不足為奇，如果調一調位，98個圖案放引擎蓋或者無咁易引起誤會，有時九巴d設計真係唔係咁識欣賞...又或者話我識條鐵~
之前見網上人地影d相好似幾長鏡，點知第一次黎呢個站，原來都幾細下... 而98開線當日好似仲拎左架87週年...
真車無影過，送上模型照兩張：
其實我都係未識欣賞87週年個desgin，可能d圖案設計係有意思既，但我覺得自己仲畫得靚過佢...
自從290開辦起，九巴都會為較為重要的新路線貼上車身廣告以作宣傳，今次98 以康城專線為主題，紅底白字的banner 與車身顏色好夾，其實當98有廣告以來，一直希望呢條線應該出模型，加上最近又有搭呢條線，所以98康城專線成為Wmb 近期唯一一架1:76巴士模型！
其實一直想Volvo B8L呢款車出1:43，心目中就係想1:43會出98(有埋banner)，但佢既然出1:76，即是1:43 應該無希望，另外官方1:76 B8L 已經出左海量，而小弟都只係買第二部，上一部係橙電牌260X，今次就白電牌98，1:76 B8L應該可以唔洗再買，2部都夠晒數了！
呀，post番287X先醒起，手上的B8L模型仲有呢架87週年，所以係3架先岩！
模型資料：
車型：Volvo B8L Wright Gemini 3 body 12米
車牌/編號：WU4132 / V6B152
限量：700部
生產商：80T/Carz
推出日期：04/2021
話說，行98的掛牌車車頭都有一塊98的主要車站示意圖，但今次1:76 模型竟然無做到呢塊牌，反而微影1:110玩具車就有做... 80T/Carz今次真係令人大跌眼鏡！雖然B8L個模係做得幾好，但招牌宣傳紙牌連水貼都唔印，真係有d失望喎，叫人點支持你呀... 收人460米咁慳皮啦(雖然係391買)！難怪成日有人話"邊間有心做邊間無心做，一睇就知"...
側牌出番牛頭角站，另外今次上下層左右各做番一隻活動窗框，但其實而家d活動窗係咪已經鎖番實？見有塊貼紙寫住梗窗、匆當扶手，呢個窗原意係受疫情影響，加強車箱空氣流通以免病菌積聚而設，但長期唔開又有咩用？司機就醒呢，司機位個窗隨時可以開，增加通風，又可以當熱狗咁玩！
"康城專線"對我黎講應該叫"康城專碌線"或者"康城碌線"先正確，因為搭過幾次98由觀塘去將軍澳工業區，早上繁忙時間搭98真係好危險，隨時遲到，因為班次極之唔準，成日都等唔倒車，有時就一分鐘內就出現2架，真係俾佢玩謝，其實觀塘等98、296A呢d循環線，醒目的人會望埋對面有無98、296A去牛頭角站方向，因為如果對面一直無車黎，咁即係有排唔會有車到，亦試過個app寫住1分鐘，然後就消失埋，所以乜都假，自己留意對面有無車出現最實際！加上環保大道時不時塞車，日出康城後右轉工業區的燈位經常過得幾架車又紅燈，另外司機碌車又係一個大問題，唔明點解d九巴佬好似同油門有仇咁，有V6B都唔肯踩不如派架吉偈行98算啦... 結論8:15 之後觀塘都唔敢上98...(除非有2架98一齊黎就可以上其中一架)否則都係等番296A算，起碼296A一定有大把位坐！
話說發覺今次九巴加價，轉乘優惠扣減金額係無增加到，呢樣野真係想屌屌九巴！轉車的加價幅度相當高，舉個例：
83X->296A，3/4 加價前車費係7.1+5.1-4.2=8；3/4 加價後車費係7.5+5.4-4.2=8.7，第一程 7.1->7.5 加幅為>5.63%，第二程 5.1->5.4 加幅為>5.88%，但兩程的總車費 8->8.7 加幅為 8.75%，雖然單看第一程或單看第二程的加幅比起今次的所謂平均 8.5%低，但轉車後的加幅則明顯超過 8.5%的平均數！對於大部份需要轉車的人黎講，要來回承擔超過批准的平均加幅實在欠公允！本人對再次表演高超財技及玩弄數字遊戲表示強烈不滿，但始終無法罷搭，決定如果今年九巴 88 週年推出1/76 模型的話，我係絕對不會購買，以表示反對加價！
而日後九巴/80M 推出的 1/76 模型亦將會減少購買，除了因為經濟環境欠佳之外，自己年紀不再是18/22，留番d錢會比較實際！上面的搭車例子仲有一點更值得關注，就係搭第二程車(296A為例)於3/4 前扣減優惠後車費是0.9，但3/4 加價後因轉乘優惠無相應增加，結果車費增至1.2！第二程車0.9->1.2 加幅可見高達>33.3%！加上第一程車本身亦已加價，因此加幅極度不合理，平均加 8.5%的講法根本極度取巧！回顧這15年的九巴服務，可謂日日退步，收車、脫班率持續高企(2017年專營權延續之前叫有少少改善，但專營權延續後馬上打回原形)，另外司機質素參差，意外頻生，班次之間行車速度落差太大，經常出現等極等唔倒車，一黎黎兩架之類問題，遲到過鐘私走引致班次在本身開車不足的情況下進一步減少，而且有人話近年請番黎既站長做野得過且過，成日玩手機同行出黎食煙吹水，抱住但求平安過一日既心態做野，做野又點會上心？咁既服務質素根本唔應該批准加價！所以都要屌埋批准加價既個班垃L圾根本都無腦…不過政府班官做又36，唔做又36，垃L圾就一定的！其實都明白所有服務性行業都無完美既，但咁既環境仲加咁多價真係好仆街囉，離撚晒大譜！油價平左咁多，部份隧道費、天橋費成本又低左，坦白講你加 4-5%好收手啦…
就上個月 25 號交了第二期 4XXX 的稅，屌你老味轉個頭就收到封綠色野，又要報稅真係屌你個老味！眾多的不公平稅款令Wmb經濟持續低迷，外出消費意慾下降至近乎0，Wmb 宣布盈利警告持續生效！除了重要約會(雖然都無)，謝絕所有貴價飯聚或任何消費活動。由於近一年來自己對 1/76 scale 巴士模型熱情有所減退，同時經濟環境不穩引致本人對於1/76 將持觀望態度，亦希望藉此清理一下存放空間，加上近年較感興趣的1/43、1/18 佔地都較大，Wmb 宣布將陸續放售旗下至少1/4 數量的1/76 模型，其他scale 的廢舊模型也會放售，希望透過放售喜愛程度較小的模型換取資金和空間引入其他scale，使Wmb 模型發展達至可持續發展。本身都唔想過份倚靠迷你倉，因為成日都加租，大佬疫情搞到咁多人失業，咁多人減人工，都唔同舟共濟減租，仲要加租，商家真心正仆街！
本月26日將上演一次月全蝕，是今年唯一一次月全蝕，也是今年最大的滿月，因而有超級血月之稱，但香港只能看見帶食出。5月26日當晚月全蝕食甚時間為晚上7時11分，但當晚月出時間要接近7時，這代表月亮升起時已是全蝕狀態，如天氣許可，將可見暗紅色的圓月徐徐升起，在7時26分生光，8時52分復圓進入地球半影區，晚上9時50分月蝕完結！月球在地球半影區期間因為月面已被太陽照亮，所以看上去與平日看見的月亮分别不大！香港太空館屆時亦會有直播！
騙徒呂中舜、陳志杰
https://youtu.be/1zhmozDrkME
沒有留言:
張貼留言