大挑戰：日落山 大東山(上)

BHT 壯舉 2013 終極大挑戰後感(上篇)。本文多圖，故記憶體不足的可以按上一頁離開！

行山最緊要係可以欣賞倒風景，但在氣溫低的秋冬天，香港空氣、美景被大陸吹來的污染物強姦，所以都有點唏噓多於歡笑... 香港山多平地少，要登上一座座高海拔幾百米的山行到無晒力落山就足見與大自然作品相比之下人的渺小！回顧過去遠足的地點路線都是偏陡峭！例如黃牛山、獅子山、觀音山、青山... 但呢幾座山的海拔高度都是五百涼米，辛苦一輪好快就到頂。2013年尾奇蹟地征服了全港第三高山：大東山^^"

獅子山，海拔495米:

觀音山，海拔546米:

青山，海拔583米:

黃牛山，海拔604米:(因角度問題看不見黃牛山主峰)

大東山英文名是日落山SUNSET PEAK，高海拔869米:

睇番網上的資料，上大東山的路線主要有3條：1)在位於東涌道最高點的伯公坳上山(見上圖，伯公坳高海拔三百多米，到山頂是最路短程的走線)，不過斜度很大！2)在大東山東面的鳳凰徑第二段(南山)上山，到山頂沿路較平緩，不過需時較長！3)沿黃龍坑道進入黃龍坑郊遊徑上山，沿路非常陡峭耗力，加上進入黃龍坑郊遊徑後並無涼亭休息點及無退出點，部分路面濕滑，是3條上山路線之中最高難度的一條！！！

正如文首題目所講，上大東山是BHT 2013年的終極挑戰！除了挑戰海拔869米之外，也向低溫挑戰，當日氣溫低過10度！而且第一次上大東山就用左上面講的第3個方法行，係最高難度的!!! 聖誕病左體力才回復80%的本編只係上左二、三百米已經出現狂咳、流鼻水、腳軟、頭暈及肚痛現象... 實在想搵個涼亭休息下然後落番山算數的...

本編八時四十五分已到東薈城，等等下到早上十時零三分才從東薈城買完補給食糧後出發，內心有點爭扎，因為大東山對本編黎講實在太高，食糧放係背包會加重體力負擔，但唔買野食上山又唔得，沿塗無補給體力更加快用完！挑戰呢條比想象中難行的高難度走線，首先經過富東，再沿裕東路向黃龍坑前進。

松仁路隔離係城巴廠，行過去望下是常識吧！

廠內的巴士有新有舊，還有賣左的幾架丹尼士十二米！不過有車阻影唔倒！

河邊有4架當圍牆用的退役巴士~

時間都不早，都要入番正題上山，前方山頂有些建築的是彌勒山，海拔754米，與鳳凰山相連。

離開松仁路後，相連的是東涌道，也是黃龍坑道上大東山的起點，一次玩命遊戲start!!!

黃龍坑怪獸訓練場！聞說此訓練場訓練出黎的怪獸最大隻有25米高！悶時有時會去東涌灣玩水XD

沿黃龍坑道斜路緩緩上山，經過一條赤立角村~ 此時坡度平緩，完全給人一種以為呢條走線容易上山的錯覺！

同行的專家已經走在前方... 沿路有石澗，亦都有幾隻狗係度訓覺~ 行過都要小心翼翼~

黃黃葉呆望秋像未能明... (羅文-秋愁歌詞~)

由東涌道轉上黃龍坑道，到上黃龍坑郊遊徑大約有2公里路程~ 沿途宜作少休息，欣賞花草，但無凳坐！

同行的專家開收音機一路聽一路行，都是行山一個解悶的方法~ 此時對面有個靚女行緊過黎，不過隔離有仔... 心情有點兒跌落谷底...

行上黃龍坑道都一段時間，望番逸東，有D覺得"回頭望路途，步了很遠"... (羅文-感激說話千百句歌詞)

開始靠近山腳，但都未正式上山，開始覺得低估左大東山的難度！

來到黃龍坑郊遊徑了！這裡大約是海拔90米左右，上大東山的玩命之路就在這裡開始！看見地圖一堆密集的等高線，有無一些退縮的意欲？呢個時候問可以肯定答暫時未有！

十一時零五分，上山前拍過與路牌的合照就拔足登山！這是一條像無盡頭的大斜梯，部分梯級非常高大，對體力本身已經不在最佳狀態的行山人士黎講，要用盡全力先上倒一級樓梯！沿途無補給、無退出點！難怪係最高難度的上山走線... 到這裡，大家已進入玩命遊戲！

黃龍坑郊遊徑滿是梁振英仆街，及CY無能等金句~ (仆，粵音付/這樣讀便不是粗口^^)

遠處可見到昂平360~

頭100米路程已經見真章，非常陡峭！這些路行100米還應付得來，但上多100米就開始全身欲仆乏力，再上多100米可能一命嗚呼... 不要忘記大東山有八百多米喎...

大樹林立，影風景是一種難度！在樹葉中的空隙攝馬灣新村~

國泰航空貨運站~ 寫呢篇文到呢度，千千靜聽隨機播放咁岩播緊歲月如歌~ 何時放鬆我自己才能花天酒地。

行到無晒力，原來只係上左海拔300米！後面是高海拔529米的薄刀屻~

薄刀屻一群恐怖的石崖...

上薄刀屻的山路~

行到一處見倒陽光的路面，可見薄刀屻至蓮花山的山都位於500-700米~

行到這裡大約是海拔380米，本編已經頂唔順D斜路同大石梯，而同行的專家亦需要休息！沿途咳、流鼻水，還出現埋抽根、肚痛、頭暈... 為什麼沿途一個涼亭都無ga 妖！睇來是需要折返... 否則再上難以想象會唔會暈低！

超越密集的大樹，這裡才見倒機場，但還未到海拔400米... 連世貿觀景台的高度都遠遠未到！本編實在高估自己的能力，但難以置信的是呢個高度比過往行過的山還低，竟然已經到了極限？還想堅持一點，所以一路休息一路望下飛機，讓體力回復！

但煙霞將能見度降至不足10公里...  就連東涌灣都灰濛濛！政府唔一日決心搞好個藍天向大陸說不，即使香港本土所有被指是污染空氣元兇的巴士消失，都解決唔倒根源問題！

蓮花山上的陡峭山崖~

頻密的飛機升降，如果巴士有如此頻密的服務，廣大的市民就唔洗受等車脫班之苦了！只懂收車、加價，不能提供應有的班次質素，苦的始終也是乘客！

短暫休息了一回，發覺體力仍然未能應付黃龍郊遊徑這些奪命大斜，黃龍坑郊遊徑應該改名為黃龍坑奪命徑！背包需要由同行的專家幫忙攜帶... 減輕負重才能繼續上山...！

來到這個位於海拔440米的小空地，比世貿觀景台的海拔高度約高10米！終於有2張凳，但可惜無涼亭，又難怪的，條路咁奪命，有邊個會搬磚頭上黎起涼亭呀！

回頭望路途，步了很遠！望番上山前經過的巴士廠，就好似1:420的紙巴士一樣... 都唔夠一隻手指咁大！隔離對住的係松仁路~

東涌康樂中心足球場~ 及逸東村~

薄刀屻上的飛機~

747-400

你說，沒有長鏡怎樣行山??

這些日子，雨量已算少，唔知夏天這裡的水量如何???

KLM747

大陸吹來可惡的煙霞，連沙洲都看不清，要不是沙洲山頂上有雷達站波波反光，都唔發覺沙洲的存在！

A340

一輛田螺車、城巴機場快線及龍運巴士在赤立角南路高速駛過~

與2位專家合照~

離開呢個兩張凳的觀景台，體力回復番少少，千奇唔好忘記離大東山頂還有1倍高度！但由於沿途無退出路線，所以呢場玩命遊戲要繼續落去！

腳骨力在前半段被黃龍坑奪命徑大洗禮，再負上背包行山就不應行得太快，太快就好易忽略四周值得欣賞的事物，山路旁邊有種似樹枝又似鐵枝的物體，唔知乜黎！？

到海拔550米，山路開始比之前的大斜平緩，這裡的空氣相對較好，但非常寒冷！而且沿路面濕滑，不小心就會仆下來！

這裡離鳳凰徑第2段還有數百米遠，睇番地圖，我估來到黃龍坑奪命徑最高的位置應該有海拔690米，中途經過一些石澗，真要小心路面濕滑，自己都幾乎有2次仆低，最緊要係唔好跌相機呀！石澗水清但非常冰冷！

離開樹林便知道開始接近鳳凰徑第二段，風景開揚，可以看見薄刀屻、東涌灣及機場。

大屏風東堤灣畔~ 也是這次旅程最初起步的位置！

同行的專家經驗充足，在後方影相時常被拋離...

嘩！好多飛機模型呀~ 抬頭望向山頂方向，雖然未見倒大東山山頂，但開始見倒石屋了^^，最辛苦的一段已經過左，不過體力所餘無幾，又行到抽根，再上山其實都仍然非常吃力！

煙霞可惡，北大嶼山公路也濛查查~

蓮花山主峰，高海拔766米。

時常說，你是經過一個地方還是經歷一個地方？行山除左影景之外，經歷一個地方也許需要人景合照，有時互相對影非常有效^^ 因為夠省時之外又夠自然、真實！不過就唔係人人都懂得或接受這個最自然的手法，因為有些人會出言侮辱，其實也只是反映對方根本沒有攝影觸覺！坦白講，手握相機拍照最忌就是自己都怕上鏡！所以互相對影要視乎唔同人而定，適可宜止，以免產生偷拍的誤會。

接近海拔680米位置，前面是凰凰徑二段，被同行的專家遠遠拋離！

黃龍坑郊遊徑成功征服！接著前往山頂還是很長的距離... 回看進入黃龍坑道之前去過的城巴廠，呢段路行一次就夠了... 下次有機會再上大東山，一定不會再由呢度上，你話本身病病地未好番先覺得非常吃力都好啦，始終真係行到抽晒根...

穩約見倒昂平360~

開始轉上鳳凰徑第2段~ 遊人開始越來越多！姐係話好少人由黃龍坑奪命徑上山？

黃龍坑奪命徑與鳳凰徑的交界~ 話說轉上鳳凰徑第二段時有位靚女望住我然後差錯腳差D跌倒，本來諗住仆上前出手扶一扶，點知隔離有仔搶先一步... 唉心情有點兒跌落谷底... 女又要靚又要隔離無仔的真實難搵... 希望你沿黃龍坑郊遊徑落山唔會太辛苦啦，根據經驗人士講沿黃龍坑落山都係非常辛苦的，廣告都有話落樓梯雙腳承受體重的4倍...

石屋群於海拔700米以上，所以來到這裡已是海拔700米，垂直還有169米，登上山頂是志在必得！

都係環境影響，行黃龍坑奪命徑因為全程上落的遊人只有幾個，條奪命斜路仿佛無盡頭，體力下降，又抽根，左邊抽完到右邊抽，想行快D都唔得，令人越行越唔想行！但上到石屋群沿途有遊人上落，見倒人地係山頂自己又會想快D上到去，成為環境上的一點推動力！

到這裡才有退出點，但都上左七百幾米，無理由唔上埋山頂咁白痴的！

後面是二東山，高海拔749米。講真本編都係第一次咁高位置食開餐的！

好多飛機模型呀!!!

下午一時二十分了，能量消耗，非常肚餓！我們選了一間石屋空地停下進午餐。專家set 好煲、燃料，我們便把辛苦帶上山的食糧拿出來瘋狂大咬！

陡峭石崖，D人真勇敢，本編自問唔得...

煲水需時，爭取時間欣賞風景同埋模型啦^^

仿佛像模型的石屋，觸手可及！屋頂的係陰影定係水漬?? 如果係影的話形狀又實在太超現實，但係水漬?? 有落過雨嗎?? 清晨山頂的霧水?? 搞到有D想試下過夜睇下第2朝有無雲海添！

上落匆匆，時間已是一時半，還未登上山頂！連忙地拿出模型來拍照數張，開完餐又需要加速了... 一句講晒大東山唔易行... 除非早多2個鐘出發...

下文繼續分享這次2013終極挑戰遊記~ 

上個月接手的一批問題車有甩水貼問題，真係難搞... 其中一架因車窗變形嘗試處理時損毀！Keep車真係少D精神都唔得！巴士模型加價對本編黎，一定係壞消息！D車價格不斷升，但又想買呢度討厭！PJ5187、ME8933 馬年廣告模型就出啦，非常爭扎究竟買唔買好... 點算... 真係唔想忍手遲左升左值要捱貴貨！但買左又想追番蛇年、龍年... 咁搞法咪回唔番聖誕節洗突左的氣？？都要講多句：反對狗巴加價！