有些空虛的感覺(更正發佈)

有時見倒日落後D雲幾靚，但沒有idea 去捕捉... 所以就唯有連個山同個天一齊影，通常個山背向陽光都會變成黑色，如果把握時間趁個天仲夠光的話就會有更強反差，唔知係咪一般人都喜歡較到個對比度強D 任那海和山都變成黑色去突顯D 雲。世人也有個習慣認為影完相唔加後製係未完成的作品...


今個星期四突然同我講：明天不用再跟東亞病夫了，心想我唔多信你講野！莫非真係調去另一條線?? 我想想由3月到而家，本字軌就好似無乜保障。一時又話條線就快取消，會調我個字軌去另一條線上牌，一時又話其他線未開得成，繼續留番係東亞病夫先，轉頭又傳出超支有要cut 字軌或提早除牌的可能性，過一排又同我講要收幾日車先喎，結果就收左幾日車，番左大陸 hea下，亦都無糧出！跟住又話安排我轉其他線，工都見埋，但早上講完下午即改變說唔洗轉住，繼續留番係東亞病夫行多幾日先！又不久又傳出喂，客量低喎番多幾日就要cut 字軌，到臨cut 字軌當日又說唔cut 得住呀，得番一架車搞唔nun 掂呀！結果就係咁，搞到時不時就有D 無謂的壓力出左黎影響左身體... 行駛這些路線壓力係幾大，D字軌上頭話cut 就cut，所以難得放假的日子，有時都會諗埋D 負面事情，想係放假做好多野，但最後又無動力行動，有些空虛的感覺。


某日，Wmb 車廠天台泊左1部九巴182同1部中巴680，但由於Wmb 車廠大樓天台距離地面有最少1350尺，因此春夏時分經常高聳入雲，雨季期間天台亦被雲霧遮蓋，車長駕車需加倍小心。為配合最近時睛時雨，小弟亦都為模型相加少少後製，使場景成為煙雨濛濛之境。

當年的182同680都以中環為總站，但我的體會就係中環D客特別麻煩，動不動就會投訴，態度又差，又無禮貌，唔多懂得尊重人，又可能他們以為自己高貴過人，其實這些人根本好可憐，因為真心同佢做野的人可能好少... 所以對中環呢個地方上面的人沒有特別好感！

八、九十年代，地鐵與巴士公司及巴士公司大家之間競爭都相當激烈，182就係其中一條巴士公司之間的競爭而出現的路線，當時城巴來往沙田第一城的88R 客量高企，於是九巴同中巴就開辦182 以作對抗！

另一條680 就可以話係九十年代巴士公司同地鐵競爭的路線，是運輸署為減輕地鐵的負荷而要求巴士公司開辦！一直以來，利蘭奧林比安均被巴士公司調派行走這些高競爭的路線，甚至過海巴士用車早已更換為空調巴士。

由於Wmb 車廠每層的面積僅四千多平方米，正透視現今社會有錢人住大屋，窮人又要捱貴租的不公平現象！因此Wmb 也頭痛要在車廠舉辦大型巴士集會如何安排更多車輛進入... 與及人流管制等問題！

早前的貼文 post 過182 巴模，今次終於搵倒182 歷次加價的資料！發現我們現在不滿九巴加價幅度太高，被漂亮的加權平均數字欺騙，而以前的票價加幅也相當巨大，而且每次加價都是超過10%並且加價次數相當密！看完後我竟然覺得近年的加幅是非常少...

182 在1989-8-12日開辦，當時全線使用普通巴士，全程$6.0。

1990-3-18，全程加至$7.0。加幅約17%

1991-3-31，全程加至$8.5。加幅約21%

1991-6-19，182 九巴班次加入空調巴士，空調票價全程$11，普通票價$8.5。空調票價約高出30%

1993-4-15，全程加至$9.5，空調票價加至$13。加幅約18%

1994-4-1，全程加至$10，空調票價維持$13。普通巴士票價加幅約5.3%。空調票價維持是估計當時中巴已有部分路線的專營權交由城巴營運，九巴想吸引乘客乘搭九巴空調班次！

1995-4，九巴加價，聯營路線182不受影響。

1995-9-1，中巴專營權結束，182中巴班次交由城巴營運，全部班次改為空調巴士。全程$13。空調票價較普通票價高30%

1996-4，全程加至$14.3。加幅約10%

1997-12-1，全程加至$15.3。加幅約7%

2008-6-8，全程加至$16。加幅約4.6%

2011-2014，九巴加價，聯營路線182 不受影響。但事實有唔少冷熱混合的路線，空調巴士票價都是偏高，但九巴只會在每次加價時將普通巴士票價加幅調高去貼近空調票價，卻是甚少會調低空調票價的！近年九巴加價的申請加幅都是貼近10%，而最後加幅約4.5-6.5%，比廿年前那些年份的加幅竟然是相當的少...


我一直覺得幾十年前的電視劇歌曲係最正的，尤其武俠劇的主題曲競爭也相當激烈！唔同人唱有唔同風格，雖然自己唔係果個年代，卻確喜歡那些年的舊歌... 有時係youtube 睇番以前電視播的金曲演唱，都令我百看不厭... 甚至一聽就要重複聽幾次。

http://www.tudou.com/programs/view/nhrA9I3qX60/

http://v.youku.com/v_show/id_XNzE3NzM5NDQ4.html



秋官同羅文同台演出的片段絕對值得欣賞，我總是認為兩者的競爭實在太大，羅文的唱功比秋官好好多，就算羅文唱秋官的歌都總是好聽過秋官唱自己D歌呀！但可惜由於當時競爭激烈，唔少武俠劇都有秋官擔當主角，主題曲交由秋官主唱觀眾又受落！加上秋官背後又有肥肥的幫助，所以就唔少主題曲都交由秋官主唱...

不過都好欣賞當時電視播呢D 金曲演唱，當中有交換唱對方D歌的部分，這樣顯得羅文即使唱對手秋官的歌，都有自己的風味，甚至比對手唱得更好... 倚天屠龍記同書劍恩仇錄更安排同時演唱，羅文現場唱書劍恩仇錄用了比平時更高音去唱，表現很好！而當年倚天屠龍記本應係由羅文唱，後來卻交由秋官唱... 而書劍恩仇錄原唱係羅文，後來亦有秋官版本... 同台較量大家各自同時唱自己的歌又不會分心唱亂，一個字：棒！不過問誰領風騷果度都係羅文同甄妮唱得最好... 而且甄妮唱人地D 歌好似仲好聽過原唱...