2020年壓軸入手，這個稍後會開箱的~
轉眼已踏入2021年，我記得2020年第一個post 就是1:43 勝利二型模型分享，今年都係一樣，第一個post 又輪到分享勝利二型，並祝所有BHT成員及BHTXWmb觀眾，新一年是勝利的一年，未有女友的快d有(包括我本人)，而車模收藏家新一年就有更多1:43及1:18模型入手, 創建更多1:43及1:18的車隊！最重要的係2021年疫情消失，因為呢個疫情，本人都受到好大影響，希望呢個香港政府唔好再咁垃撚圾，做番d 德政出黎好無！
自從幾年前My Tony微影發佈推出1:43利蘭勝利二型, 一直都期待有中巴款式! 適逢剛剛的聖誕節，新巴版本(無新巴logo)的勝利二型亦正式發售，馬上便入了一部！這次一於分享小弟新買的1:43 新巴利蘭勝利二型，但因為之前的中巴勝利二型仍然未post，加上又係出同一架，所以索性一次過post！而模型片段日前已上傳到BHTXWmb Youtube channel, 馬上按like 及訂閲吧!
這次分享的主角是LV30 CH5001
中巴的勝利二型是My Tony 第3架出的1/43勝利二型~
外盒都是類似的design，以車身主色作藍本
1:43 Leyland Victory 與 Lamborghini Reventon
中巴勝利二型的3條路線配件，是要加錢購買的... 心諗微影已經賣成1250一架，都唔送路線牌仲要加錢買...
三部勝利二型的証書亦都係類似design
不過，証上竟然印左KMB... 証明design時無留心改番好d資料... 呢樣野真係幫唔落！
中巴第一輛勝利二型的車隊編號為LV1(LV代表Leyland Victory), 於1979年10月投入服務, 馬上被安排行走41號線, 中巴發現勝利二型巴士駛上斜度達1:8的炮台山道表現理想, 中巴便再向利蘭訂購多164 輛勝利二型。同時, 因利蘭車廠未能為中巴提供一輛11米長的泰坦型巴士, 中巴便將此車的訂單改為兩輛勝利二型, 因此中巴引入的勝利二型共有167輛。
車門半開關時，影出黎好似後期熱狗車門(非摺合式)
基於港島地區山路較多, 前置引擎的勝利二型可以盡展所長。而由於當時勝利二型的載客量跟丹拿/利蘭珍寶稍為減少但相差不遠。因此中巴安排一些後期投入服務的勝利二型行走一些路況較平坦而客量高的路線, 所以中巴的勝利二型亦跟九巴一樣, 幾乎服務過港島區所有路線甚至過海線。同樣地, 中巴引進30輛設計相若的丹尼士祖比倫/喝采型巴士時, 勝利二型亦同樣被調離東區。
中巴所有配亞歷山大車身的勝利二型在使用了一段時間後, 被加強了車體結構。而為了減輕車身重量, 中巴拆除了頭尾的巨型防撞桿, 車尾部份以鋁片填補空間(不設防撞桿); 車頭則由玻璃纖維製造的假防撞桿代替!
與九巴的勝利二型不同的是, 中巴絕大部份使用亞歷山大車身的勝利二型, 司機門都是向外掀開, 只有LV1及個別後期改裝的車輛才使用趟門設計。
中巴一直不希望與九巴引入的同款車型太過相似, 缺乏特色, 於1981年購買的最後一批共20輛的勝利二型(LV148-167)就改用了都普車身。
雖然勝利二型是有攀爬上太平山的能力, 但由於巴士車身超過了4.15米高, 所以勝利二型不能行走途經渣甸橋底的15線!
在1993年及1995年, 中巴有共40條路線的專營權被削減, 也令中巴車隊規模縮減, 中巴車隊內一些較舊巴士如丹拿/利蘭珍寶(LF)、倫敦寶(XF)及佳牌阿拉伯五型巴士(LX)被淘汰。不過勝利二型不但沒有被中巴放棄, 而且都取代了以上巴士車型原本的任務, 安排行走途徑薄扶林道、柴灣道及大潭道等斜度較大的路線。而部份勝利二型則屬於後備車, 只在繁忙時間支援其他路線之用, 據説曾經支援過如504 一類全空調路線的加班車, 這角色直至中巴失去專營權時仍無太大變化。
加送中巴(KMB)勝利二型開箱片：
剛剛的聖誕節，My Tony 出埋LV30 新巴(白橙色)版，但因為無拎版權，所以無任何新巴logo...
因自己喜歡勝利二型，基本上出邊款都會想買，但口唔會買多，各一部就夠，適逢同一日有1:43 煞臣裝甲車90號開訂，所以訂車同時，買埋勝利二型現貨~
先加送新巴勝利二型開箱片：
如果細心留意，片段中可見我呢架車下車門的旁板係曲左，心諗中伏，呢個位咁濕尻，平時都唔會留意倒，然後發現係旁板頂部未插入天花條坑，引致扶手被摺曲，但你知開門的空間有限，一係當睇唔倒，一係要睇下洗唔洗拆車，但我拍片一定會俾全世界見倒呢d 咁伏既微影手工... 為了保住微影的聲譽，我決定搞搞佢，用了一條硬的竹籤出力矯番出車殼方向，係竹籤面臨折斷之際，終於將旁板頂部插番入天花條坑，扶手角度亦再經過悉心的調整，叫做推番直，望落去總算可以接受！本來想係片度屌屌微影，但人開箱我開箱，開到中晒伏，我都覺得好無面，同埋為左盡快出片，就無刻意突出呢個問題，可以留意番片中的03:35，我都係focus 中下車門時才發現，暴力地悉心調整後，微距影車箱的時候一切正常^^
經過中巴模型証書寫錯KMB之後，新巴呢次索性唔寫巴士公司名，不過最大原因係佢無拎新巴版權，証書應該唔可以寫NWFB一字，所以就算無NWFB一字我個人覺得無所謂~
今次雞車的開門手握位又做大左，門底一大塊膠凸出黎，好礙眼！所以小弟決定油黑個手握位！
油黑左當堂順眼番晒，至少唔會一塊白色膠凸出黎...
LV30於1980年投入服務，與其他中巴勝利二型一樣，此車曾被派往不同路線行走，例如過海路線109、南區路線94X等。中巴年代，LV30曾漆上不銹鋼廚具全車身廣告。
中巴在1998年失去專營權後，此車隨即被新巴購入，繼續行走一般路線，例如往石澳的9號線。初時LV30與其他中巴巴士一樣都是沿用上米下藍的中巴色彩，只是在車身當眼處貼上白色底的新巴公司標誌。
2000年8月31日，為紀念勝利二型即將全面退役，新巴舉辦了一個勝利二型告別遊河活動，將LV30髹上特別設計的廣告圖案，並有一句"勝利廿載 光榮引退"的標語，然後行走多年來一直以勝利二型行走的9號線。
LV30在活動後不是即時退役，還行走了一段日子，據說在來往柴灣興華邨至大坑勵德邨之間的81號線經常可以找到它，這也是今次模型的所選用路線，但可惜的是微影竟然唔做當年LV30的勝利廿載 光榮引退廣告圖案... 一架車賣1250都可以求其到咁...已經唔要求一定有新巴logo了，但至少都應該做番LV30的特色啦，唔係既話洗咩出LV30呢，求其一架LV都得啦，大可以先出其他編號的LV，然後又可以出多次有廣告的LV30，一模多用！
開門
關門
時空交錯，加送同場出現的LV30，事實上中巴的LV30與新巴的LV30是同一架車，係唔可能同場出現的，不過影模型無所謂啦~
拿，有讚有彈！讚的係好難得微影肯出呢款車，否則至今都唔會有1:43 雞車；彈既係唔知大家有無留意到，中巴雞車呢個模，下層車頭大窗中間做得直左，真車係下面貼近車身，上面係斜入去，成個窗係有向後傾斜的感覺，但微影呢個模做唔倒真車應有的形狀... 仲話真車數據，我呸！呢d咁基本的我唔洗用相去對就已經一眼睇得出，我都唔明微影出一架車搵咁大班人去做都咁樣，係咪食屎既...
期待出埋城巴例如CN2611(36)、嶼巴雞車，最好出埋九巴訓練雞，如果肯出1/43的冷氣雞車同解凍雞我都會支持，雖然無真車參考，但內籠都可以參考書籍上圖片及之前出過的1:76，相信要做都唔係太難！之後可以改改模做埋九巴及中巴丹尼士祖比倫，同埋冷氣鴨、解凍鴨等等！或者出番一次空白版或全白色版的雞車，數量唔需要太多，500架或以下已經夠，鐘意改車既改車，鐘意儲的又可以多個選擇，一舉兩得，所以其實雞車呢個模都可以做倒好多款車，變化不亞於而家的E500MMC，分分鐘仲比E500MMC精彩！
當然，除了亞歷山大呢個車身，都普車身的我都非常希望會有生產商做1:43，可以出倒九巴祖比倫上米下紅、現代色同埋中巴都普雞，肯玩多d的可以做埋訓練巴士，總覺得勝利二型不應只有亞歷山大車身，都普車身的同樣重要！
沒有留言:
張貼留言