BHTXWmb: 日星號小輪多面睇・黑白淡奶80週年Since1940 | 維河上的欖核仔 Black&Write Solar Star

就在上星期一早上趕船上班, 登上了一隻紅色的天星小輪, 感覺很新鮮, 因為平時見慣見熟都是綠色的

第二日我決定搭另一隻船, 方便影呢隻紅色天星小輪~

焦距不足, 唯有當係影碼頭景...

不知不覺, 影維河(中環)景都是以IFC做主角, 但其實到而家為止我都覺得IFC 好樣衰, 仲話甲級寫字樓, 我呸！

這次一於談談香港一種古老的交通工具: 天星小輪 Star Ferry

這隻紅色天星小輪原來是日星號(Solar Star), 日星號是天星小輪公司現存最古老的兩隻其中之一, 另一隻是午星號, 均在1958年投入服務, 現時已62歳, 我估一國兩制玩完之前, 大家想平既話都係要坐呢批古董(天星小輪公司已經無錢買船)! 大家搭船時可留意一下毎隻小輪船頭兩側均用金色油漆寫上船的中英文名及編號~

原來日星號是髹上黑白淡奶80週年主題廣告, 不講不知原來壽星公煉奶、黑白淡奶、子母牛奶、美素佳兒、康營樂等等奶製品全部都是荷蘭皇家菲仕蘭旗下産品! 菲仕蘭(香港)早在1938年在香港註冊業務, 原來其品牌(壽星公煉奶)在更早的1932年已打入香港市場, 煉奶及淡奶都是港式茶餐廳不可或缺的產品, 加上牛奶本身含有人體必需的營養素, 包括蛋白質、碳水化合物、脂肪和礦物質, 而日常生活中不少食品都含有奶成份, 所以奶製品基本上與大眾息息相關。

黑白淡奶在1940-1941年間推出, 一直主攻餐飲市場, 近年才推出家庭裝, 原來黑白淡奶是唯一一個多年來沒有更改過配方的產品! 現在荷蘭生產地毎年淡奶產量高達12億罐!

以前聽得最多是三花淡奶, 因為家用常接觸得多, 但大部份牌子的淡奶包裝都是白色、紅色, 以前唔太識分!

這星期陰晴不定, 都不是太想帶相機, 又要兩支鏡又帶埋傘, 增加不少重量！但小弟堅持在日星號上廣告的第一個星期就要影, 原因係因為天星小輪泊近碼頭時, 好多時都係撞落碼頭或者係減速期間不時會磨住船身, 如果你有留意碼頭外面的柱其實全部都被撞到變晒形, 引致船身接觸碼頭部份的油漆迅速掉落！加上上落客時, 上下層的跳板因大浪船身移動而與地面磨擦, 跳板外的油漆迅速掉落, 所以如果想影靚相, 最好頭幾日就好影定, 否則甩油露番d 黑色出黎, 就無咁靚(雖然遠睇唔覺)！

好想近距離影呢塊跳板, 但事實上好難, 個個趕住上船, 唔係咁易可以影倒既無人入鏡的低炒, 萬一有短群女士行過屈偷拍仲麻煩...

跳板外的荷蘭乳牛及橙色風車圖案是師傅人手一筆一筆油出來, 但因與地面磨擦得多, 開始甩油...

日星號竟然不及黑白淡奶古老... 真不可思議...

習慣望住綠色的天星小輪, 零零舍舍有一架紅色的小輪, 總覺得係PS 後期改色, 不過天星小輪如果諗下轉色, 我個人都係相當歡迎, 例如整隻上米下藍都幾好~ 又或者玩下野, 每隻船都有唔同拉花, 咁就肯定唔會認錯船, 不過機會好低, 成本一定太高, 而家天星小輪已經無錢搞咁多野了... 兩條航線又話客量下降, 都唔知維持到幾耐, 期望多些人放棄黨鐵, 選擇渡輪、電車呢d 既有歷史價值票價又良心的交通工具！

其實自從721(配合白衣人襲擊市民)、831(配合警方襲擊市民)事件之後唔少人把口都話唔搭黨鐵, 但自己仍然個個月幫襯緊黨鐵買月票, 講一套做一套, 口中說不身體卻太誠實, 都明既, 黨鐵收費係貴但始終時間上最快捷, 所以無論如何黨鐵仍然佔盡優勢, 或者有朝一日, 大家出入都只會記得黨鐵、有人問路都教人搭黨鐵、約人集合都是在黨鐵站, 香港只有一黨鐵專政, 沒有其他了...

不過天星小輪過去曾經試過加價並成為暴動的其中成因！曾幾何時, 六十年代, 天星小輪是當時唯一橫渡維港的公共交通工具, 1965年10月, 天星小輪向政府申請加價, 頭等收費由$0.2加至$0.25(二等收費維持$0.1不變), 當時政府莫視基層市民生活困難批准加價, 更在1966年4月帶頭增加所得稅及薪俸稅、汽車牌照費、郵費、廉租屋屋租、停車場收費等等, 一名青年絕食抗議加價事件最終演變成暴動！該名抗議人士後來被警方以阻街為由拘捕！